ಹಿರಿಯ ನಟ ದಿವಂಗತ ಖಾದರ್ ಖಾನ್ ಹಿರಿಯ ಪುತ್ರ ಅಬ್ದುಲ್ ಖುದ್ದೂಸ್ ಕೆನಡಾದಲ್ಲಿ ನಿಧನರಾಗಿದ್ದಾರೆ.
ಇವರು ಖಾದರ್ ಖಾನ್ರ ಮೊದಲ ಪತ್ನಿಗೆ ಜನಿಸಿದ ಮಗನಾಗಿದ್ದರು. ಅಬ್ದುಲ್ ಸಾವಿಗೆ ನಿಖರ ಕಾರಣ ತಿಳಿದು ಬಂದಿಲ್ಲ.
ಸಿನಿರಂಗದಿಂದ ದೂರವೇ ಇದ್ದ ಅಬ್ದುಲ್ ಖುದ್ದೂಸ್ ಕೆನಡಾದ ಏರ್ಪೋರ್ಟ್ನಲ್ಲಿ ಭದ್ರತಾ ಅಧಿಕಾರಿಯಾಗಿ ಸೇವೆ ಸಲ್ಲಿಸಿದ್ದರು.
ಈ ಹಿಂದೆ ಸಂದರ್ಶನವೊಂದರಲ್ಲಿ ಖಾದರ್ ತನ್ನ ಹಿರಿಯ ಪುತ್ರ ಅಬ್ದುಲ್ ಕಾರಣಕ್ಕೆ ನಾನು ಖಳನಾಯಕನ ಪಾತ್ರ ಮಾಡೋದನ್ನ ನಿಲ್ಲಿಸಿದ್ದೆ ಎಂದು ಹೇಳಿದ್ದರು. ನನ್ನ ಹಿರಿಯ ಪುತ್ರ ಅಬ್ದುಲ್ ಖಳನಾಯಕರಂತೆ ಬಟ್ಟೆಗಳನ್ನ ಹರಿದುಕೊಂಡು ಮನೆಗೆ ಬರ್ತಿದ್ದ. ಸಿನಿಮಾಗಳಲ್ಲಿ ನಾನು ಕೊನೆಯಲ್ಲಿ ಹೊಡೆತ ತಿನ್ನುತ್ತಿದ್ದೆ. ಇದನ್ನ ಆತನ ಸ್ನೇಹಿತರು ಆಡಿಕೊಳ್ಳುತ್ತಿದ್ದರು. ಕೋಪಗೊಳ್ತಿದ್ದ ಅಬ್ದುಲ್ ಸ್ನೇಹಿತರೊಂದಿಗೆ ಜಗಳ ಮಾಡಿಕೊಂಡು ಹೊಡೆತ ತಿನ್ನುತ್ತಿದ್ದ. ಅಂದಿಗೆ ನಾನು ಖಳನಾಯಕನ ಪಾತ್ರವನ್ನ ಮಾಡಬಾರದು ಎಂದು ನಿರ್ಧರಿಸಿದೆ. ಅಂದಿನಿಂದ ನಾನು ವಿದೂಷಕನ ಪಾತ್ರ ಮಾಡಲು ಪ್ರಾರಂಭಿಸಿದೆ ಎಂದು ಹೇಳಿದ್ದರು.
ಖಾದರ್ ಖಾನ್ರ ಪುತ್ರ ಸರ್ಫರಾಜ್ ʼತೆರೇ ನಾಮ್ʼ, ʼಮೈನೆ ದಿಲ್ ತುಜ್ ಕೋ ದಿಯಾʼ ಸೇರಿದಂತೆ ಕೆಲ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಖಾದರ್ರ ಕಿರಿಯ ಪುತ್ರ ಶಾ ನವಾಜ್ ಕೆನಡಾದಲ್ಲಿ ತನ್ನ ಶಿಕ್ಷಣವನ್ನ ಪೂರ್ಣಗೊಳಿಸಿ ಮಿಲೆಂಗೆ ಮಿಲೆಂಗೆ, ವಾದಾ ಹಾಗೂ ಹಮ್ ಕೋ ತುಮ್ ಸೇ ಪ್ಯಾರ್ ಹೈ ಸಿನಿಮಾದಲ್ಲಿ ಅಸಿಸ್ಟಂಟ್ ಆಗಿ ಕೆಲಸ ಮಾಡಿದ್ದಾರೆ.
ಖಾದರ್ ಖಾನ್ 2018ರ ಡಿಸೆಂಬರ್ 31ರಂದು ದೀರ್ಘಕಾಲದ ಅನಾರೋಗ್ಯದಿಂದಾಗಿ ನಿಧನರಾಗಿದ್ದರು. ಈ ವೇಳೆ ಅವರಿಗೆ 81 ವರ್ಷ ವಯಸ್ಸಾಗಿತ್ತು.
Loading ...