ಆತಂಕಕ್ಕೆ ಕಾರಣವಾಗಿದೆ ದಿನೇ ದಿನೇ ಏರಿಕೆಯಾಗುತ್ತಿರುವ ʼಕೊರೊನಾʼ ಸೋಂಕಿತರ ಸಂಖ್ಯೆ

ಕಳೆದ 24 ಗಂಟೆಗಳಲ್ಲಿ ಭಾರತ 14,199 ಹೊಸ ಕೊರೊನಾ ಕೇಸ್​ಗಳನ್ನ ದಾಖಲಿಸಿದೆ. ಈ ಮೂಲಕ ದೇಶದಲ್ಲಿ ಒಟ್ಟು ಕೊರೊನಾ ಸೋಂಕಿತರ ಸಂಖ್ಯೆ 11 ಮಿಲಿಯನ್​ಗೆ ಏರಿಕೆ ಕಂಡಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಮಾಹಿತಿ ನೀಡಿದೆ.

ಈ ಮೂಲಕ ಸತತ ಐದನೇ ದಿನವೂ ಭಾರತ ಕೊರೊನಾ ಪ್ರಕರಣದಲ್ಲಿ ಏರಿಕೆ ಕಾಣುತ್ತಲೇ ಇದೆ.

ಇನ್ನು ಕೊರೊನಾದಿಂದ ಕಳೆದ 24 ಗಂಟೆಗಳಲ್ಲಿ 83 ಮಂದಿ ಸಾವಿಗೀಡಾಗಿದ್ದು ಈ ಮೂಲಕ ದೇಶದಲ್ಲಿ ಡೆಡ್ಲಿ ವೈರಸ್​ನಿಂದ ಬಲಿಯಾದವರ ಸಂಖ್ಯೆ 1,56,385ರಷ್ಟಾಗಿದೆ. ದೇಶದಲ್ಲಿ ಗುಣಮುಖರಾದವರ ಪ್ರಮಾಣ 97.22 ಪ್ರತಿಶತದಷ್ಟಿದೆ. ಅಂದರೆ ಈವರೆಗೆ ಒಟ್ಟು 1,06,99,410 ಮಂದಿ ಕೊರೊನಾದಿಂದ ಗುಣಮುಖರಾಗಿದ್ದಾರೆ.

ಆದರೆ ದೇಶದಲ್ಲಿ ಕಳೆದ 5 ದಿನಗಳಿಂದ ಕೊರೊನಾ ಪ್ರಕರಣದಲ್ಲಿ ಏರಿಕೆ ಕಾಣುತ್ತಲೇ ಇರೋದು ಆತಂಕಕ್ಕೆ ಕಾರಣವಾಗಿದೆ. ಕಳೆದ 5 ವಾರಗಳಲ್ಲಿ ಇದೇ ಮೊದಲ ಬಾರಿಗೆ ಈ ರೀತಿ ನಿರಂತರ ಏರಿಕೆ ಕಂಡಿದೆ. ಫೆಬ್ರವರಿ 21ರವರೆಗೆ ಅಂದರೆ ವಾರಾಂತ್ಯದಲ್ಲಿ 1,00,990 ಪ್ರಕರಣ ದಾಖಲಾಗಿತ್ತು. ಆದರೆ ವಾರದ ಆರಂಭದಲ್ಲೇ ದೇಶ 77,284 ಹೊಸ ಕೇಸ್​ಗಳನ್ನು ದಾಖಲಿಸಿದೆ. ಅಂದರೆ ಕಳೆದ ವಾರಕ್ಕೆ ಹೋಲಿಸಿದ್ರೆ ಕೊರೊನಾ ಸೋಂಕಿನ ಪ್ರಮಾಣ 31 ಪ್ರತಿಶತದಷ್ಟು ಏರಿಕೆ ಕಂಡಿದೆ.

ಮಹಾರಾಷ್ಟ್ರದಲ್ಲಂತೂ ಕೋವಿಡ್​ ಪ್ರಕರಣ ಏರಿಕೆ ಕಾಣುತ್ತಲೇ ಇದೆ. ಮಹಾರಾಷ್ಟ್ರದಲ್ಲಿ 6971 ಹೊಸ ಕೊರೊನಾ ಕೇಸ್​ ಹಾಗೂ 24 ಗಂಟೆಗಳಲ್ಲಿ 35 ಸಾವುಗಳು ವರದಿಯಾಗಿದೆ. ಕಳೆದ 121 ದಿನಗಳಲ್ಲಿ ಇದು ದಾಖಲೆಯ ವರದಿಯಾಗಿದೆ. ಪುಣೆ ಜಿಲ್ಲೆಯೊಂದರಲ್ಲೇ ಕಳೆದ 24 ಗಂಟೆಗಳಲ್ಲಿ 1176 ಹೊಸ ಕೇಸ್​ ಹಾಗೂ 6 ಸಾವುಗಳನ್ನ ದಾಖಲಿಸಿದೆ. ಕೊರೊನಾ ಕೇಸ್​​ ಹೆಚ್ಚುತ್ತಿರುವ ಹಿನ್ನೆಲೆ ಜಿಲ್ಲಾಡಳಿತ ಎಲ್ಲಾ ಶಿಕ್ಷಣ ಸಂಸ್ಥೆಗಳನ್ನ ಬಂದ್​ ಮಾಡುವಂತೆ ಆದೇಶ ಹೊರಡಿಸಿದೆ.

ಕೇರಳದಲ್ಲೂ ಕೂಡ ಕೊರೊನಾ ಕೇಸ್​ನಲ್ಲಿ ಗಣನೀಯ ಪ್ರಮಾಣದ ಏರಿಕೆ ವರದಿಯಾಗ್ತಿದೆ. ಕಳೆದ 24 ಗಂಟೆಗಳಲ್ಲಿ 4070 ಹೊಸ ಕೊರೊನಾ ಕೇಸ್​ಗಳು ದಾಖಲಾಗಿದೆ. ದೆಹಲಿಯಲ್ಲಿ 24 ಗಂಟೆಗಳಲ್ಲಿ 145 ಹೊಸ ಕೊರೊನಾ ಕೇಸ್​ಗಳು ವರದಿಯಾಗಿದ್ದು ಈ ಮೂಲಕ ಸೋಂಕು ನಿಯಂತ್ರಣದಲ್ಲಿದೆ ಎಂದು ಅಂದಾಜಿಸಬಹುದಾಗಿದೆ.