ಮೀನಿನ ಆಸೆಗೆ ಬಿದ್ದವನು ಮಾಡಿದ ಯಡವಟ್ಟೇನು…?

ನೀವೇನಾದರೂ ಮೀನು ಪ್ರಿಯರಾಗಿದ್ರೆ ಅದನ್ನ ತಿನ್ನೋದು ಹೇಗೆ ಅನ್ನೋದು ನಿಮಗೆ ಚೆನ್ನಾಗಿಯೇ ಗೊತ್ತಿರುತ್ತೆ. ಸಣ್ಣ ಸಣ್ಣ ಹೋಳುಗಳನ್ನ ನೀವು ಬಾಯಿಗೆ ಹಾಕಿಕೊಳ್ತೀರಿ. ಆದರೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆದ ವಿಡಿಯೋವೊಂದರಲ್ಲಿ ಕೊಲಂಬಿಯಾದ ವೈದ್ಯನೊಬ್ಬ ರೋಗಿಯ ಬಾಯಿಯಿಂದ ಬರೋಬ್ಬರಿ 7 ಇಂಚು ಉದ್ದದ ಮೀನನ್ನ ಹೊರ ತೆಗೆದಿದ್ದಾರೆ.

24 ವರ್ಷದ ವ್ಯಕ್ತಿ ಜನವರಿ 23ರಂದು ಮೀನು ಹಿಡಿಯಲು ತೆರಳಿದ್ದ ಈ ವೇಳೆ ಈ ಘಟನೆ ಸಂಭವಿಸಿದೆ. ಗಾಳಕ್ಕೆ ಮೀನು ಬಿದ್ದ ಬಳಿಕ ಅದನ್ನ ಕೈಯಲ್ಲಿ ಹಿಡಿದು ಮತ್ತೊಮ್ಮೆ ಮೀನನ್ನ ಹಿಡಿಯಲು ಗಾಳವನ್ನ ನೀರಿಗೆ ಬಿಟ್ಟಿದ್ದ. ಈ ವೇಳೆ ಎರಡನೇ ಮೀನು ಈತನ ಗಾಳಕ್ಕೆ ಬಿದ್ದಿದೆ.

ಈತನ ಒಂದು ಕೈಯಲ್ಲಿ ಈ ಹಿಂದೆ ಹಿಡಿದ ಮೀನು ಇತ್ತು. ಇನ್ನೊಂದು ಕೈಯಲ್ಲಿ ಎರಡನೇ ಮೀನನ್ನ ಹಿಡಿದ ಗಾಳವಿತ್ತು. ಹೊಸ ಬೇಟೆಯನ್ನ ಕಳೆದುಕೊಳ್ಳೋಕೆ ಈತನಿಗೆ ಇಷ್ಟವಿರಲಿಲ್ಲ. ಹೀಗಾಗಿ ಈತ ಮೊದಲನೇ ಮೀನನ್ನ ಬಾಯಲ್ಲಿ ಕಚ್ಚಿಕೊಂಡು ಎರಡನೇ ಮೀನನ್ನ ದಡಕ್ಕೆ ತಲುಪಿಸೋ ಬಗ್ಗೆ ಪ್ಲಾನ್​ ಮಾಡಿದ್ದ.

ಆದರೆ ದುರಾದೃಷ್ಟವಶಾತ್​ ಮೊದಲನೇ ಮೀನು ಈತನ ಪ್ಲಾನ್​ನಂತೆ ವರ್ತಿಸಲಿಲ್ಲ. ಅವನು ಯಾವಾಗ ಆ ಮೀನನ್ನ ಬಾಯಿಗೆ ಹಾಕಿಕೊಂಡನೋ. ಅದು ಮುಂದಕ್ಕೆ ಹೋಗಿ ಈತನ ಗಂಟಲಿನಲ್ಲಿ ಸಿಲುಕಿದೆ.

ಈತ ಕೂಡಲೇ ಆಸ್ಪತ್ರೆಗೆ ತೆರಳಿದ್ದ. ಆದರೆ ಗಂಟಲಿನಲ್ಲಿ ಮೀನು ಸಿಕ್ಕಿ ಹಾಕಿಕೊಂಡಿದ್ದರಿಂದ ಮಾತನಾಡಲೂ ಸಾಧ್ಯವಾಗ್ತಿರಲಿಲ್ಲ. ಕೂಡಲೇ ವೈದ್ಯರು ಆತನ ಗಂಟಲನ್ನ ಸ್ಕ್ಯಾನ್​ ಮಾಡಿದ್ದಾರೆ. ಹಾಗೂ ಗಂಟಲಿನಲ್ಲಿದ್ದ ಮೀನನ್ನ ತೆಗೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ವ್ಯಕ್ತಿಯನ್ನ 2 ದಿನಗಳ ಆಸ್ಪತ್ರೆಯಲ್ಲಿ ನಿಗಾದಲ್ಲಿ ಇಡಲಾಗಿತ್ತು. ಅದೃಷ್ಟವಶಾತ್​ ಆತನ ಜೀವಕ್ಕೆ ಯಾವುದೇ ಅಪಾಯವಾಗಿಲ್ಲ.