BIG NEWS: ನೇರ ಪ್ರಸಾರದಲ್ಲೇ ಕೊರೊನಾ ಲಸಿಕೆ ಪಡೆದ ಜೋ ಬಿಡೆನ್​

ಅಮೆರಿಕ ಅಧ್ಯಕ್ಷರಾಗಿ ಚುನಾಯಿತರಾಗಿರುವ ಜೋ ಬಿಡೆನ್​ ಅವರು ಕೊರೊನಾ ಲಸಿಕೆಯನ್ನ ನೇರ ಪ್ರಸಾರದಲ್ಲಿಯೇ ಸ್ವೀಕರಿಸಿದ್ದಾರೆ. ಅಮೆರಿಕದ ಜನತೆಗೆ ಕೊರೊನಾ ಲಸಿಕೆ ಸುರಕ್ಷಿತವಾಗಿದೆ ಎಂದು ಮನವರಿಕೆ ಮಾಡಿಕೊಡುವ ಸಲುವಾಗಿ ಬಿಡೆನ್​ ಸೋಮವಾರ ಟಿವಿ ನೇರ ಪ್ರಸಾರದಲ್ಲಿ ಲಸಿಕೆ ಪಡೆದಿದ್ದಾರೆ.

ಮೊಡರ್ನಾ ತಯಾರಿಸಿರುವ ಲಸಿಕೆ ಅಮೆರಿಕಕ್ಕೆ ಬಂದು ತಲುಪಿದೆ. ಕೊರೊನಾ ವಿರುದ್ಧ ಈ ಲಸಿಕೆ ಸುರಕ್ಷಿತ ಎಂದು ತೋರಿಸಲು ಜೋ ಬಿಡೆನ್​ ಈ ನಿರ್ಧಾರ ಕೈಗೊಂಡಿದ್ದಾರೆ. ಅಮೆರಿಕದಲ್ಲಿ ಈವರೆಗೆ ಕೊರೊನಾದಿಂದ 3.17 ಲಕ್ಷಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿದ್ದಾರೆ.

ಅಮೆರಿಕದ ಜನರಿಗೆ ಲಸಿಕೆ ಸುರಕ್ಷತೆ ಖಾತರಿ ಮಾಡುವ ಸಲುವಾಗಿ ನಾನು ಈ ನಿರ್ಧಾರ ಕೈಗೊಂಡಿದ್ದೇನೆ ಎಂದು ಬಿಡೆನ್​ ಹೇಳಿದ್ದಾರೆ. ಕೊರೊನಾ ಲಸಿಕೆ ಸ್ವೀಕಾರದ ಬಳಿಕ ಬಿಡೆನ್​ ಹಾಗೂ ಅವರ ಪತ್ನಿ ಜಿಲ್ ಆರೋಗ್ಯ ಕಾರ್ಯಕರ್ತರಿಗೆ ಧನ್ಯವಾದ ತಿಳಿಸಿದ್ದಾರೆ. ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್​ ದಂಪತಿ ಮುಂದಿನ ವಾರ ಕೊರೊನಾ ಲಸಿಕೆ ಪಡೆಯುವ ಸಾಧ್ಯತೆ ಇದೆ.