ಮಾಜಿ ಸಿಎಂ ಕುಮಾರಸ್ವಾಮಿ ವಿರುದ್ಧ ಕೋಡಿಹಳ್ಳಿ ಆಕ್ರೋಶ; ಹೆಚ್.ಡಿ.ಕೆ. ಒಬ್ಬ ಡೀಲ್ ಮಾಸ್ಟರ್ ಎಂದು ಕಿಡಿ

ಬೆಂಗಳೂರು: ರೈತರ ಹೋರಾಟಕ್ಕೆ ನಮ್ಮ ಬೆಂಬಲವಿಲ್ಲ ಎಂದು ಹೇಳಿರುವ ಮಾಜಿ ಸಿಎಂ ಹೆಚ್.ಡಿ. ಕುಮಾರಸ್ವಾಮಿ ವಿರುದ್ಧ ರೈತ ಮುಖಂಡ ಕೋಡಿಹಳ್ಳಿ ಚಂದ್ರಶೇಖರ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಸುದ್ದಿಗಾರರೊಂದಿಗೆ ಮಾತನಾಡಿದ ಕೋಡಿಹಳ್ಳಿ ಚಂದ್ರಶೇಖರ್, ರೈತರ ಬಾಯಿಗೆ ಮಣ್ಣು ಹಾಕುವವರ ಬೆಂಬಲ ನಮಗೆ ಬೇಕಿಲ್ಲ. ಬೆಳಿಗ್ಗೆ ಬಂದು ರೈತರ ಬಾಯಿಗೆ ನೀರು ಹಾಕುತ್ತಾರೆ. ಸಂಜೆ ಬಂದು ಮಣ್ಣು ಹಾಕುತ್ತಾರೆ. ನಮಗೆ ಕುಮಾರಸ್ವಾಮಿಯವರ ಬೆಂಬಲ ಬೇಕಿಲ್ಲ ಎಂದು ಕಿಡಿಕಾರಿದ್ದಾರೆ.

ಕುಮಾರಸ್ವಾಮಿಯವರಿಗೆ ರೈತರಿಗಿಂತ ರಾಜಕೀಯವೇ ಮುಖ್ಯವಾಗಿದೆ. ಹಾಗಾಗಿ ರೈತರ ಪರವಿಲ್ಲ. ರೈತರ ಸಂಕಷ್ಟದ ಅರಿವಿದ್ದಿದ್ದರೆ ಅವರು ಸದನದಲ್ಲಿ ಭೂ ಸುಧಾರಣಾ ಕಾಯ್ದೆಗೆ ಬೆಂಬಲ ಘೋಷಿಸುತ್ತಿದ್ದರೆ? ಕುಮಾರಸ್ವಾಮಿ ದೊಡ್ಡ ಡೀಲ್ ಮಾಸ್ಟರ್. ಬೆಳಿಗ್ಗೆ ಬಂದು ರೈತರ ಪರ ಮಾತನಾಡಿ ಸಂಜೆ ಹೋಗಿ ಬಿಜೆಪಿಯೊಂದಿಗೆ ಒಳ ಒಪ್ಪಂದ ಮಾಡಿಕೊಂಡಿದ್ದಾರೆ ಎಂದು ವಾಗ್ದಾಳಿ ನಡೆಸಿದರು.