ನಿವಾರ್​ ಬಳಿಕ ತಮಿಳುನಾಡಿಗೆ ಕಾದಿದೆ ಮತ್ತೊಂದು ಚಂಡಮಾರುತದ ಅಬ್ಬರ…!

ನಿವಾರ್​ ಚಂಡಮಾರುತ ದಕ್ಷಿಣ ಭಾರತಕ್ಕೆ ಬಂದಪ್ಪಳಿಸಿ ಕೇವಲ ಒಂದು ವಾರದ ಬಳಿಕ ಇನ್ನೊಂದು ಚಂಡಮಾರುತ ತಮಿಳುನಾಡನ್ನ ಅಪ್ಪಳಿಸುವ ಸಾಧ್ಯತೆ ಇದೆ.

ಡಿಸೆಂಬರ್​ ನಾಲ್ಕರಂದು ಈ ಹೊಸ ಚಂಡಮಾರುತ ಬಂದಪ್ಪಳಿಸಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಮಾಹಿತಿ ನೀಡಿದೆ. ಮಂಗಳವಾರ ತಡರಾತ್ರಿ ವೇಳೆಗೆ ಬಂಗಾಳಕೊಲ್ಲಿಯಲ್ಲಿನ ಚಂಡಮಾರುತ ಮತ್ತಷ್ಟು ತೀವ್ರಗೊಳ್ಳಲಿದೆ ಎಂದು ಹೇಳಿದ್ದಾರೆ.

ಡಿಸೆಂಬರ್​ 2ರ ಸಂಜೆ ಅಥವಾ ರಾತ್ರಿ ಸಮಯದಲ್ಲಿ ಶ್ರೀಲಂಕಾ ಕರಾವಳಿ ಭಾಗದಲ್ಲಿ ಗಂಟೆಗೆ 75-85 ಕಿಲೋಮೀಟರ್​​ ವೇಗದಲ್ಲಿ ಚಲಿಸಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಮಾಹಿತಿ ನೀಡಿದೆ.

ಈ ಚಂಡಮಾರುತ ಪಶ್ಚಿಮ ದಿಕ್ಕಿನಲ್ಲಿ ಚಲಿಸುವ ಸಾಧ್ಯತೆ ಇದೆ. ಡಿಸೆಂಬರ್​ 3ರಂದು ಮನ್ನಾರ್​ ಕೊಲ್ಲಿ ಹಾಗೂ ಪಕ್ಕದ ಕೊಮೊರಿನ್​ ಪ್ರದೇಶಕ್ಕೆ ಹೋಗಲಿದೆ. ಇದಾದ ಬಳಿಕ ಈ ಚಂಡಮಾರುತ ಪಶ್ಚಿಮ ನೈಋತ್ಯ ದಿಕ್ಕಿನಲ್ಲಿ ಚಲಿಸಲಿದೆ. ತಮಿಳುನಾಡಿನ ಕರಾವಳಿ ಭಾಗ ಕನ್ಯಾಕುಮಾರಿ ಹಾಗೂ ಪಂಬನ್​ ನಡುವೆ ಡಿಸೆಂಬರ್​ 4ರಂದು ಚಂಡಮಾರುತ ಅಪ್ಪಳಿಸಲಿದೆ ಎಂದು ಮಾಹಿತಿ ನೀಡಲಾಗಿದೆ.