ಶಾಲಾ ಕಟ್ಟಡದಲ್ಲಿ ರಾತ್ರಿ ಕಳೆದ ಅರ್ನಬ್​ ಗೋಸ್ವಾಮಿ

ಇಂಟೀರಿಯರ್​ ಡಿಸೈನರ್​ ಆತ್ಮಹತ್ಯೆಗೆ ಪ್ರಚೋದನೆ ನೀಡಿದ ಆರೋಪದಡಿಯಲ್ಲಿ ಬಂಧನಕ್ಕೊಳಗಾಗಿರುವ ರಿಪಬ್ಲಿಕ್​ ಟಿವಿ ಸಂಪಾದಕ ಅರ್ನಬ್​ ಗೋಸ್ವಾಮಿ ಸ್ಥಳೀಯ ಶಾಲೆಯಲ್ಲಿ ರಾತ್ರಿ ಕಳೆದಿದ್ದಾರೆ. ಅರ್ನಬ್​ ರಾತ್ರಿ ಕಳೆದ ಶಾಲೆ ಅಲಿಬಾಗ್​ ಜೈಲಿನ ಕೋವಿಡ್​ ಕೇಂದ್ರ ಅಂತಾ ತಿಳಿದು ಬಂದಿದೆ.

ಮಹಾರಾಷ್ಟ್ರದ ರಾಯಗಢ್​ ಜಿಲ್ಲೆಯ ಅಲಿಬಾಗ್​ ಕೋರ್ಟ್,​ ಗೋಸ್ವಾಮಿ ಹಾಗೂ ಇತರೆ ಇಬ್ಬರು ಆರೋಪಿಗಳನ್ನ 2018ರ ಆತ್ಮಹತ್ಯೆ ಪ್ರಕರಣ ಸಂಬಂಧ ನ.18ರವರೆಗೆ ನ್ಯಾಯಾಂಗ ಬಂಧನದಲ್ಲಿರಿಸಿದೆ. ಪೊಲೀಸರು ಅರ್ನಬ್​ರನ್ನ 14 ದಿನಗಳ ಕಾಲ ಕಸ್ಟಡಿಗೆ ಒಪ್ಪಿಸುವಂತೆ ಕೋರ್ಟ್ ಬಳಿ ಮನವಿ ಮಾಡಿದ್ದರು. ಆದರೆ ಕೋರ್ಟ್​ ಕಸ್ಟಡಿ ವಿಚಾರಣೆ ಅಗತ್ಯವಿಲ್ಲ ಎಂದು ಹೇಳಿತ್ತು.

ಬುಧವಾರ ರಾತ್ರಿ ಆರೋಪಿ ಗೋಸ್ವಾಮಿಯನ್ನ ಕರಾವಳಿ ಪಟ್ಟಣದ ಸರ್ಕಾರಿ ಆಸ್ಪತ್ರೆಯಲ್ಲಿ ವೈದ್ಯಕೀಯ ಪರೀಕ್ಷೆಗೆ ಕರೆದುಕೊಂಡು ಹೋಗಲಾಗಿದೆ ಅಂತಾ ಖಾಸಗಿ ಮಾಧ್ಯಮ ವರದಿ ಮಾಡಿದೆ. ಇಲ್ಲಿಂದ ನೇರವಾಗಿ ಅವರನ್ನ ಅಲಿಬಾಗ್​ ಶಾಲೆಗೆ ಕರೆದೊಯ್ಯಲಾಗಿದೆ ಅಂತಾ ಅಧಿಕಾರಿಗಳು ತಿಳಿಸಿದ್ದಾರೆ.

ಇನ್ನು ಇದೇ ಪ್ರಕರಣದ ಇನ್ನಿಬ್ಬರು ಆರೋಪಿಗಳಾದ ಫಿರೋಜ್​ ಮಹಮ್ಮದ್​ ಶೇಖ್​ ಹಾಗೂ ನಿತೇಶ್​ ಸರ್ದಾರನ್ನ ಬುಧವಾರ ಅಲಿಬಾಗ್​ ಕೋರ್ಟ್ಗೆ ಪೊಲೀಸರು ಹಾಜರುಪಡಿಸಿದ್ದರು. ಇವರಿಬ್ಬರನ್ನ ಕೋರ್ಟ್ ನ.18ರವರೆಗೆ ನ್ಯಾಯಾಂಗ ಬಂಧನದಲ್ಲಿರಿಸಿದೆ.