ಗುರುಗ್ರಾಮ, ಪುಣೆ, ನಾಗ್ಪುರ ಪೊಲೀಸರು ಕೊರೊನಾ ವೈರಸ್ ಸಾಂಕ್ರಾಮಿಕ ಮತ್ತು ಹೆಲ್ಮೆಟ್ ತೊಡುವ ವಿಚಾರದಲ್ಲಿ ಜನಜಾಗೃತಿ ಮೂಡಿಸಲು ಸಾಮಾಜಿಕ ಜಾಲತಾಣದಲ್ಲಿ ಸೃಜನಶೀಲ ಪೋಸ್ಟ್ ಗಳನ್ನು ಹಂಚಿಕೊಂಡು ಜನಪ್ರಿಯರಾಗಿದ್ದಾರೆ. ಇದೀಗ ಮೇಘಾಲಯ ಪೊಲೀಸರು ತಮ್ಮ ಹಾಸ್ಯದ ಪೋಸ್ಟ್ ನಿಂದ ಇನ್ಸ್ಟಾಗ್ರಾಮ್ ನಲ್ಲಿ ಸಂಚಲನ ಮೂಡಿಸಿದ್ದಾರೆ.
ಗಾಂಜಾವನ್ನು ಹೊತ್ತೊಯ್ಯುತ್ತಿದ್ದ ಟ್ರಕ್ ಬಗ್ಗೆ ಅಪ್ ಡೇಟ್ ಪೋಸ್ಟ್ ಮಾಡಿದ್ದ ಮೇಘಾಲಯ ಪೊಲೀಸರು, ಕೊರೋನಾದ ಕಾಲದಲ್ಲಿ ಸಾಗಿಸಲು ಅನುಮತಿಸಲಾದ ಎಲ್ಲಾ ಅಗತ್ಯ ವಸ್ತುಗಳ ಪೈಕಿ ಮರಿಜುವಾನಾ ಸೇರಿಲ್ಲ ಎಂದು ಸಾರ್ವಜನಿಕರಿಗೆ ತಿಳಿಸಲು ಇಚ್ಚಿಸುತ್ತೇವೆ. ನಮ್ಮ ಮೊಂಡತನಕ್ಕೆ ಕ್ಷಮಿಸಿ……ಎಂದು ಕುಟುಕಿದ್ದರು.
ಸರಿ ಸುಮಾರು 500 ಕಿಲೋಗ್ರಾಂ ಗಾಂಜಾ ಸಾಗಿಸುತ್ತಿದ್ದ ಟ್ರಕ್ ಅನ್ನು ಮೇಘಾಲಯದ ರಿ-ಭೋಯ್ ಜಿಲ್ಲೆಯ ಪೊಲೀಸರು ಹಿಡಿದಿದ್ದರು. ಇನ್ಸ್ಟಾಗ್ರಾಮ್ ಬಳಕೆದಾರರು ಮೇಘಾಲಯ ಪೊಲೀಸರ ಹಾಸ್ಯ ಪ್ರಜ್ಞೆ ಮತ್ತು ಉತ್ತಮ ಕೆಲಸಕ್ಕಾಗಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಉತ್ತಮ ಸಂದೇಶದೊಂದಿಗೆ ಉತ್ತಮ ಕೆಲಸ ಮಾಡಲಾಗಿದೆ ಎಂದು ಶಬ್ಬಾಸ್ ಗಿರಿ ನೀಡಿದ್ದರೆ, ಈ ಸಮಯದಲ್ಲಿ ಸ್ವಲ್ಪ ಹಾಸ್ಯ ಅಗತ್ಯ ಎಂದು ಮತ್ತೊಬ್ಬರು ಪ್ರತಿಕ್ರಿಯೆ ನೀಡಿದ್ದಾರೆ.
Loading ...