ತುರ್ತಾಗಿ ಪ್ರಯಾಣಿಸಬೇಕಾಗಿದೆ.. ಆದರೆ ಕೈಯಲ್ಲಿ ರೈಲು ಟಿಕೆಟ್ ಇಲ್ಲ. ತತ್ಕಾಲ್ ಟಿಕೆಟ್‌ಗಾಗಿ ಪ್ರಯತ್ನಿಸಿದರೆ ಕೆಲವೇ ಸೆಕೆಂಡ್‌ಗಳಲ್ಲಿ ವೇಟಿಂಗ್ ಲಿಸ್ಟ್‌ಗೆ ಹೋಗುತ್ತದೆ. ಇನ್ನು ರೈಲು ಪ್ರಯಾಣ ಕ್ಯಾನ್ಸಲ್ ಮಾಡಬೇಕೆಂದುಕೊಂಡಿದ್ದೀರಾ? ಹಾಗಾದರೆ ರೈಲು ಹೊರಡುವ ಕೆಲವೇ ಗಂಟೆಗಳ ಮೊದಲು ಕನ್ಫರ್ಮ್ ಟಿಕೆಟ್ ಪಡೆಯಲು ಐಆರ್‌ಸಿಟಿಸಿಯಲ್ಲಿ ವಿಶೇಷ ಆಯ್ಕೆಯೊಂದು ಇದೆ ಎಂಬುದು ನಿಮಗೆ ಗೊತ್ತೇ? ಆ ಆಯ್ಕೆ ಯಾವುದು, ಅದನ್ನು ಹೇಗೆ ಬಳಸಬೇಕು ಎಂಬುದನ್ನು ಈ ಸ್ಟೋರಿಯಲ್ಲಿ ತಿಳಿದುಕೊಳ್ಳೋಣ.
ಕೇವಲ ಕೆಲವೇ ಗಂಟೆಗಳ ಮೊದಲು ಕನ್ಫರ್ಮ್ ಟಿಕೆಟ್.. ಹೇಗೆ ಬುಕ್ ಮಾಡುವುದು?
ತುರ್ತು ಸಂದರ್ಭದಲ್ಲಿ ಪ್ರಯಾಣಿಸಬೇಕಾದರೂ ರೈಲು ಟಿಕೆಟ್ ಸಿಗದಿರುವುದು ಹಲವರು ಎದುರಿಸುವ ಸಮಸ್ಯೆ. ಅದರಲ್ಲೂ ತತ್ಕಾಲ್ ಟಿಕೆಟ್‌ಗಳು ಸಿಗದಿದ್ದರೆ ಪ್ರಯಾಣವನ್ನೇ ರದ್ದುಗೊಳಿಸಬೇಕಾಗಬಹುದು. ಆದರೆ ಇಂತಹ ಸಂದರ್ಭಗಳಲ್ಲಿ ಪ್ರಯಾಣಿಕರಿಗೆ ಭಾರತೀಯ ರೈಲ್ವೆ ಮತ್ತು ಐಆರ್‌ಸಿಟಿಸಿ ವಿಶೇಷ ಸೌಲಭ್ಯವೊಂದನ್ನು ಒದಗಿಸುತ್ತವೆ.
ಚಾರ್ಟ್ ಸಿದ್ಧವಾದ ಬಳಿಕವೂ ಖಾಲಿ ಇರುವ ಸೀಟ್‌ಗಳಿಗೆ ಲಾಸ್ಟ್‌ ಮಿನಿಟ್‌ನಲ್ಲಿ ಟಿಕೆಟ್ ಬುಕ್ ಮಾಡುವ ಸೌಲಭ್ಯವೇ ‘ಕರೆಂಟ್ ರಿಸರ್ವೇಶನ್’. ಈ ಸೌಲಭ್ಯದ ಮೂಲಕ ರೈಲು ಹೊರಡುವ ಕೆಲವೇ ಗಂಟೆಗಳ ಮೊದಲು ಕೂಡ ಕನ್ಫರ್ಮ್ ಟಿಕೆಟ್ ಪಡೆಯುವ ಅವಕಾಶವಿದೆ. ಈ ಕರೆಂಟ್ ಬುಕ್ಕಿಂಗ್ ಹೇಗೆ ಕಾರ್ಯನಿರ್ವಹಿಸುತ್ತದೆ ಮತ್ತು ಇದರ ನಿಯಮಗಳೇನು ಎಂಬುದನ್ನು ತಿಳಿದುಕೊಳ್ಳೋಣ.
ಕರೆಂಟ್ ಬುಕ್ಕಿಂಗ್ ಎಂದರೇನು?
ಸಾಮಾನ್ಯವಾಗಿ ರೈಲು ಹೊರಡುವ ಸುಮಾರು 4 ಗಂಟೆಗಳ ಮೊದಲು ಮೊದಲ ರಿಸರ್ವೇಶನ್ ಚಾರ್ಟ್ ಸಿದ್ಧವಾಗುತ್ತದೆ. ಈ ಚಾರ್ಟ್ ಸಿದ್ಧವಾದ ಬಳಿಕವೂ ರೈಲಿನಲ್ಲಿ ಖಾಲಿ ಉಳಿದಿರುವ ಬರ್ತ್‌ಗಳು ಮತ್ತು ಸೀಟ್‌ಗಳನ್ನು ಪ್ರಯಾಣಿಕರಿಗೆ ಬುಕ್ ಮಾಡಲು ಅವಕಾಶ ನೀಡುವ ವ್ಯವಸ್ಥೆಯೇ ಕರೆಂಟ್ ರಿಸರ್ವೇಶನ್.
ಕರೆಂಟ್ ಟಿಕೆಟ್ ಬುಕ್ ಮಾಡುವುದು ಹೇಗೆ?
ಐಆರ್‌ಸಿಟಿಸಿ ಆ್ಯಪ್ ಅಥವಾ ವೆಬ್‌ಸೈಟ್ ಮೂಲಕ:
ಐಆರ್‌ಸಿಟಿಸಿ ಆ್ಯಪ್ ಅಥವಾ ವೆಬ್‌ಸೈಟ್‌ಗೆ ಲಾಗಿನ್ ಮಾಡಿ, ಪ್ರಯಾಣಿಸಬೇಕಾದ ಮಾರ್ಗ ಮತ್ತು ರೈಲನ್ನು ಆಯ್ಕೆ ಮಾಡಿದಾಗ Current Booking ಆಯ್ಕೆ ಕಾಣಿಸಿಕೊಳ್ಳುತ್ತದೆ. ಸೀಟ್‌ಗಳು ಲಭ್ಯವಿದ್ದರೆ ಆನ್‌ಲೈನ್‌ನಲ್ಲೇ ತಕ್ಷಣ ಕನ್ಫರ್ಮ್ ಟಿಕೆಟ್ ಬುಕ್ ಮಾಡಬಹುದು.
ರೈಲು ನಿಲ್ದಾಣದ ಕೌಂಟರ್ ಮೂಲಕ:
ಪ್ರಯಾಣ ಆರಂಭಿಸುವ ರೈಲು ನಿಲ್ದಾಣದಲ್ಲಿರುವ ಪ್ಯಾಸೆಂಜರ್ ರಿಸರ್ವೇಶನ್ ಸಿಸ್ಟಮ್ (PRS) ಕೌಂಟರ್‌ಗೆ ತೆರಳಿ ನೇರವಾಗಿ ಕರೆಂಟ್ ಬುಕ್ಕಿಂಗ್ ಟಿಕೆಟ್ ಪಡೆಯಬಹುದು.
ಕರೆಂಟ್ ಬುಕ್ಕಿಂಗ್‌ನ ಪ್ರಮುಖ ನಿಯಮಗಳು
ಸಮಯ: ರೈಲು ಹೊರಡುವ ಕೆಲವು ಗಂಟೆಗಳ ಮೊದಲು ಕರೆಂಟ್ ಬುಕ್ಕಿಂಗ್ ಲಭ್ಯವಾಗುತ್ತದೆ ಮತ್ತು ರೈಲು ಹೊರಡುವವರೆಗೆ ಖಾಲಿ ಸೀಟ್‌ಗಳಿದ್ದರೆ ಟಿಕೆಟ್ ಬುಕ್ ಮಾಡಬಹುದು.ಕನ್ಫರ್ಮ್ ಟಿಕೆಟ್ ಮಾತ್ರ: ಕರೆಂಟ್ ಬುಕ್ಕಿಂಗ್‌ನಲ್ಲಿ ವೇಟಿಂಗ್ ಲಿಸ್ಟ್ ಟಿಕೆಟ್‌ಗಳನ್ನು ನೀಡಲಾಗುವುದಿಲ್ಲ. ಖಾಲಿ ಇರುವ ಸೀಟ್ ಅಥವಾ ಬರ್ತ್‌ಗಳಿಗೆ ಮಾತ್ರ ನೇರವಾಗಿ ಕನ್ಫರ್ಮ್ ಟಿಕೆಟ್ ನೀಡಲಾಗುತ್ತದೆ.
ಬೋರ್ಡಿಂಗ್ ಪಾಯಿಂಟ್ ಬದಲಾವಣೆ ಸಾಧ್ಯವಿಲ್ಲ: ಕರೆಂಟ್ ಟಿಕೆಟ್ ಬುಕ್ ಮಾಡಿದ ಬಳಿಕ ಬೋರ್ಡಿಂಗ್ ಪಾಯಿಂಟ್, ಪ್ರಯಾಣಿಕರ ಹೆಸರು ಅಥವಾ ವಯಸ್ಸಿನಂತಹ ವಿವರಗಳನ್ನು ಬದಲಾಯಿಸಲು ಸಾಧ್ಯವಾಗುವುದಿಲ್ಲ.ರಶ್ ಕಡಿಮೆ ಇರುವ ಸಮಯದಲ್ಲಿ ಹೆಚ್ಚು ಅನುಕೂಲ: ಹಬ್ಬದ ದಿನಗಳು ಅಥವಾ ಹೆಚ್ಚು ಬೇಡಿಕೆ ಇರುವ ಅವಧಿಗಳನ್ನು ಹೊರತುಪಡಿಸಿ ಸಾಮಾನ್ಯ ದಿನಗಳಲ್ಲಿ ಹಾಗೂ ಕೆಲವು ದೂರದ ರೈಲುಗಳಲ್ಲಿ ಖಾಲಿ ಸೀಟ್‌ಗಳು ಲಭ್ಯವಾಗುವ ಸಾಧ್ಯತೆ ಹೆಚ್ಚು. ಹೀಗಾಗಿ, ಆಕಸ್ಮಿಕವಾಗಿ ಪ್ರಯಾಣಿಸಬೇಕಾದ ಸಂದರ್ಭದಲ್ಲಿ ಏಜೆಂಟ್‌ಗಳನ್ನು ಸಂಪರ್ಕಿಸುವ ಅಗತ್ಯವಿಲ್ಲದೆ ಅಥವಾ ತತ್ಕಾಲ್ ಟಿಕೆಟ್‌ಗಾಗಿ ಪರದಾಡದೆ ಐಆರ್‌ಸಿಟಿಸಿಯ ಕರೆಂಟ್ ಬುಕ್ಕಿಂಗ್ ಸೌಲಭ್ಯವನ್ನು ಬಳಸಿಕೊಳ್ಳಬಹುದು. ಖಾಲಿ ಸೀಟ್‌ಗಳು ಲಭ್ಯವಿದ್ದರೆ ಲಾಸ್ಟ್‌ ಮಿನಿಟ್‌ನಲ್ಲೂ ಕನ್ಫರ್ಮ್ ಟಿಕೆಟ್ ಪಡೆಯಲು ಇದು ಉಪಯುಕ್ತ ಆಯ್ಕೆಯಾಗಬಹುದು.
