ಭಾರತದಲ್ಲಿ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ರಸ್ತೆ ಅಪಘಾತಗಳನ್ನು ತಡೆಯಲು ಹಾಗೂ ರಸ್ತೆ ಸುರಕ್ಷತೆಯನ್ನು ಮತ್ತಷ್ಟು ಬಲಪಡಿಸಲು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಮಹತ್ವದ ಹೆಜ್ಜೆ ಇಟ್ಟಿದೆ. ವಾಹನಗಳು ಪರಸ್ಪರ ನೇರವಾಗಿ ಮಾಹಿತಿ ವಿನಿಮಯ ಮಾಡಿಕೊಳ್ಳುವ ವೆಹಿಕಲ್-ಟು-ವೆಹಿಕಲ್ (V2V) ಕಮ್ಯುನಿಕೇಷನ್ ವ್ಯವಸ್ಥೆಯನ್ನು ಭಾರತದಲ್ಲಿ ಹಂತ ಹಂತವಾಗಿ ಜಾರಿಗೆ ತರಲು ಪ್ರಸ್ತಾವನೆ ಸಿದ್ಧಪಡಿಸಲಾಗಿದೆ.
ಈ ತಂತ್ರಜ್ಞಾನದ ಮೂಲಕ ಕಾರುಗಳು ಹಾಗೂ ಇತರ ವಾಹನಗಳು ಸಂಚಾರದ ವೇಳೆ ಪರಸ್ಪರ ಮಾಹಿತಿ ಹಂಚಿಕೊಳ್ಳಲಿದ್ದು, ಅಪಘಾತದ ಸಾಧ್ಯತೆ ಎದುರಾದಾಗ ಚಾಲಕರಿಗೆ ಮುಂಚಿತವಾಗಿಯೇ ಎಚ್ಚರಿಕೆ ನೀಡಲಿವೆ.
V2V ತಂತ್ರಜ್ಞಾನ ಹೇಗೆ ಕಾರ್ಯನಿರ್ವಹಿಸುತ್ತದೆ?
V2V ಕಮ್ಯುನಿಕೇಷನ್ ವ್ಯವಸ್ಥೆಯು ಸಮೀಪದಲ್ಲಿ ಸಂಚರಿಸುವ ವಾಹನಗಳ ನಡುವೆ ರಿಯಲ್‌ಟೈಮ್‌ ಡೇಟಾವನ್ನು ಹಂಚಿಕೊಳ್ಳುತ್ತದೆ. ವಾಹನದ ವೇಗ, ನಿಖರ ಸ್ಥಳ, ಚಲಿಸುವ ದಿಕ್ಕು, ವೇಗವರ್ಧನೆ ಹಾಗೂ ಬ್ರೇಕಿಂಗ್‌ನಂತಹ ಮಾಹಿತಿಗಳು ಇತರ ವಾಹನಗಳಿಗೆ ತಲುಪುತ್ತವೆ.ಉದಾಹರಣೆಗೆ, ಮುಂದೆ ಸಾಗುತ್ತಿರುವ ವಾಹನ ಏಕಾಏಕಿ ಬ್ರೇಕ್ ಹಾಕಿದರೆ, ಲೇನ್ ಬದಲಿಸಿದರೆ ಅಥವಾ ಬ್ಲೈಂಡ್‌ ಸ್ಪಾಟ್‌ನಲ್ಲಿ ಮತ್ತೊಂದು ವಾಹನ ಇದ್ದರೆ, ಹಿಂಬದಿಯಿಂದ ಬರುವ ವಾಹನದ ಚಾಲಕನಿಗೆ ತಕ್ಷಣ ಎಚ್ಚರಿಕೆ ಸಂದೇಶ ರವಾನೆಯಾಗುತ್ತದೆ.ಅಷ್ಟೇ ಅಲ್ಲದೆ, ಆಂಬುಲೆನ್ಸ್, ಅಗ್ನಿಶಾಮಕ ವಾಹನಗಳಂತಹ ತುರ್ತು ವಾಹನಗಳು ಸಮೀಪಿಸುತ್ತಿದ್ದಾಗಲೂ ಈ ವ್ಯವಸ್ಥೆ ಮುಂಚಿತವಾಗಿ ಎಚ್ಚರಿಕೆ ನೀಡಲಿದೆ.
ಉಚಿತ ಫ್ರೀಕ್ವೆನ್ಸಿ ಬ್ಯಾಂಡ್
ವಾಹನಗಳ ನಡುವೆ V2V ಮಾಹಿತಿ ವಿನಿಮಯ ವ್ಯವಸ್ಥೆಯನ್ನು ಹಂತ ಹಂತವಾಗಿ ಜಾರಿಗೆ ತರಲು ಕೇಂದ್ರ ಮೋಟಾರು ವಾಹನ ನಿಯಮಗಳು, 1989ಕ್ಕೆ ತಿದ್ದುಪಡಿ ಮಾಡುವ ಪ್ರಸ್ತಾವನೆಯೊಂದಿಗೆ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಕರಡು ಅಧಿಸೂಚನೆ ಹೊರಡಿಸಿದೆ.V2V ಹಾಗೂ ಇಂಟೆಲಿಜೆಂಟ್ ಟ್ರಾನ್ಸ್‌ಪೋರ್ಟೇಶನ್ ಸಿಸ್ಟಮ್ಸ್ (ITS) ಬಳಕೆಗಾಗಿ ಕೇಂದ್ರ ಸರ್ಕಾರವು 5.875 GHzರಿಂದ 5.925 GHz ವರೆಗಿನ ಫ್ರೀಕ್ವೆನ್ಸಿ ಬ್ಯಾಂಡ್ ಅನ್ನು ಪ್ರಸ್ತಾಪಿಸಿದೆ.
ದೂರಸಂಪರ್ಕ ಇಲಾಖೆ 2026ರ ಜೂನ್ 10ರಂದು ಹೊರಡಿಸಿದ G.S.R. 466(E) ಮೂಲಕ ಈ ಫ್ರೀಕ್ವೆನ್ಸಿ ವ್ಯಾಪ್ತಿಯ ಬಳಕೆಗೆ ಸಂಬಂಧಿಸಿದ ಪರವಾನಗಿ ನಿಯಮಗಳಿಂದ ವಿನಾಯಿತಿ ನೀಡಿದೆ. ಇದರಿಂದ ವಾಹನ ತಯಾರಕರು ಯಾವುದೇ ಕಾನೂನು ತೊಡಕುಗಳಿಲ್ಲದೆ ಈ ತಂತ್ರಜ್ಞಾನವನ್ನು ಕಾರುಗಳಲ್ಲಿ ಅಳವಡಿಸಲು ಸಾಧ್ಯವಾಗಲಿದೆ.ಸಾಮಾನ್ಯ ಸುರಕ್ಷತಾ ವ್ಯವಸ್ಥೆಗಳು ವಾಹನದಲ್ಲಿರುವ ಸೆನ್ಸರ್‌ಗಳು ಹಾಗೂ ಚಾಲಕರ ತಕ್ಷಣದ ಪ್ರತಿಕ್ರಿಯೆಯನ್ನೇ ಅವಲಂಬಿಸಿರುತ್ತವೆ. ಆದರೆ V2V ತಂತ್ರಜ್ಞಾನ ಇದಕ್ಕಿಂತ ಭಿನ್ನವಾಗಿದ್ದು, ಚಾಲಕನಿಗೆ ನೇರವಾಗಿ ಕಾಣದ ಅಪಾಯಕಾರಿ ಪರಿಸ್ಥಿತಿಗಳ ಬಗ್ಗೆಯೂ ಮುಂಚಿತವಾಗಿ ಮಾಹಿತಿ ನೀಡಲು ಸಾಧ್ಯವಾಗುತ್ತದೆ.
ಇದು ಸುಧಾರಿತ ಚಾಲಕ ಸಹಾಯಕ ವ್ಯವಸ್ಥೆ (ADAS) ತಂತ್ರಜ್ಞಾನಕ್ಕೆ ಮತ್ತಷ್ಟು ಬೆಂಬಲ ನೀಡಲಿದ್ದು, ಅಪಘಾತಗಳನ್ನು ಮುಂಚಿತವಾಗಿ ತಡೆಯಲು, ವಾಹನಗಳ ಪರಸ್ಪರ ಸಂಪರ್ಕ ಹಾಗೂ ಭವಿಷ್ಯದ ಸ್ಮಾರ್ಟ್‌ ಸಾರಿಗೆ ವ್ಯವಸ್ಥೆಗಳ ಅಭಿವೃದ್ಧಿಗೆ ಸಹಕಾರಿಯಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.
ಯಾವಾಗಿನಿಂದ ಕಡ್ಡಾಯ?
ಕರಡು ಅಧಿಸೂಚನೆಯಲ್ಲಿ ಹಂತ ಹಂತವಾಗಿ ಜಾರಿಗೆ ತರಲು ಈ ಕೆಳಗಿನ ಗಡುವುಗಳನ್ನು ಪ್ರಸ್ತಾಪಿಸಲಾಗಿದೆ:
2027ರ ಅಕ್ಟೋಬರ್ 1ರಿಂದ ಅಥವಾ ಅದರ ನಂತರ ತಯಾರಾಗುವ V2V ಕಮ್ಯುನಿಕೇಷನ್ ವ್ಯವಸ್ಥೆ ಹೊಂದಿರುವ L, M ಮತ್ತು N ವರ್ಗದ ವಾಹನಗಳು AIS-230 ನಿಯಮಗಳಿಗೆ ಅನುಗುಣವಾಗಿರಬೇಕು.
2028ರ ಅಕ್ಟೋಬರ್ 1ರಿಂದ ಅಥವಾ ಅದರ ನಂತರ ತಯಾರಾಗುವ ಎಲ್ಲಾ L, M ಮತ್ತು N ವರ್ಗದ ವಾಹನಗಳಲ್ಲಿ, AIS-230 ನಿಯಮಗಳಿಗೆ ಅನುಗುಣವಾದ V2V ಕಮ್ಯುನಿಕೇಷನ್ ವ್ಯವಸ್ಥೆ ಕಡ್ಡಾಯವಾಗಿ ಅಳವಡಿಸಬೇಕಾಗುತ್ತದೆ.
ಈ ಹಂತ ಹಂತದ ಜಾರಿ ವಿಧಾನವು ವಾಹನ ತಯಾರಕರು ಹಾಗೂ ಇತರ ಪಾಲುದಾರರಿಗೆ ಹೊಸ ನಿಯಮಗಳ ಅನುಷ್ಠಾನಕ್ಕೆ ಸಿದ್ಧರಾಗಲು ಸಾಕಷ್ಟು ಸಮಯ ಒದಗಿಸಲಿದೆ.
V2V ವ್ಯವಸ್ಥೆಯಲ್ಲಿ ಸಿಗಲಿರುವ ಪ್ರಮುಖ 4 ಎಚ್ಚರಿಕೆಗಳು
- ತುರ್ತು ಬ್ರೇಕ್ ಎಚ್ಚರಿಕೆ:
ಮುಂದೆ ಸಾಗುತ್ತಿರುವ ವಾಹನ ಏಕಾಏಕಿ ಅಥವಾ ತೀವ್ರವಾಗಿ ಬ್ರೇಕ್ ಹಾಕಿದಾಗ, ಹಿಂಬದಿಯಿಂದ ಬರುತ್ತಿರುವ ವಾಹನಗಳ ಚಾಲಕರಿಗೆ ತಕ್ಷಣ ಡಿಜಿಟಲ್ ಅಲರ್ಟ್ ಕಳುಹಿಸಲಾಗುತ್ತದೆ. ಇದರಿಂದ ಸಮಯಕ್ಕೆ ಸರಿಯಾಗಿ ಬ್ರೇಕ್ ಹಾಕಿ ಅಪಘಾತ ತಪ್ಪಿಸಲು ಸಾಧ್ಯವಾಗಲಿದೆ. - ಮುಂದೆ ಇರುವ ವಾಹನಕ್ಕೆ ಡಿಕ್ಕಿ ಹೊಡೆಯುವ ಅಪಾಯದ ಎಚ್ಚರಿಕೆ:
ನಿಮ್ಮ ವಾಹನವು ಮುಂದೆ ಸಾಗುತ್ತಿರುವ ವಾಹನದತ್ತ ವೇಗವಾಗಿ ಸಮೀಪಿಸುತ್ತಿದ್ದರೆ, ಎರಡೂ ವಾಹನಗಳ ವೇಗದ ವ್ಯತ್ಯಾಸವನ್ನು ಆಧರಿಸಿ ಸಂಭವನೀಯ ಡಿಕ್ಕಿಯ ಅಪಾಯದ ಬಗ್ಗೆ ಮುಂಚಿತವಾಗಿ ಎಚ್ಚರಿಕೆ ನೀಡಲಾಗುತ್ತದೆ. - ತಪ್ಪು ದಿಕ್ಕಿನಲ್ಲಿ ಬರುವ ವಾಹನದ ಎಚ್ಚರಿಕೆ:
ರಸ್ತೆ ಅಥವಾ ಒನ್‌ವೇ ಮಾರ್ಗದಲ್ಲಿ ಯಾವುದಾದರೂ ವಾಹನ ತಪ್ಪು ದಿಕ್ಕಿನಲ್ಲಿ ಸಂಚರಿಸುತ್ತಿದ್ದರೆ, ವ್ಯವಸ್ಥೆ ಅದನ್ನು ಗುರುತಿಸಿ ಸಮೀಪದಲ್ಲಿರುವ ಇತರ ವಾಹನಗಳ ಚಾಲಕರಿಗೆ ಮುಂಚಿತ ಎಚ್ಚರಿಕೆ ನೀಡುತ್ತದೆ. - ತುರ್ತು ವಾಹನಗಳ ಎಚ್ಚರಿಕೆ:
ಆಂಬುಲೆನ್ಸ್, ಅಗ್ನಿಶಾಮಕ ವಾಹನ ಅಥವಾ ಪೊಲೀಸ್ ವಾಹನಗಳು ಸಮೀಪಿಸುತ್ತಿರುವಾಗ ಇತರ ವಾಹನಗಳ ಚಾಲಕರಿಗೆ ಮುಂಚಿತವಾಗಿ ಮಾಹಿತಿ ನೀಡಲಾಗುತ್ತದೆ. ಇದರಿಂದ ತುರ್ತು ವಾಹನಗಳಿಗೆ ದಾರಿ ಮಾಡಿಕೊಡುವುದು ಸುಲಭವಾಗಲಿದೆ.
V2V ವ್ಯವಸ್ಥೆಗೆ ಟಾಸ್ಕ್‌ಫೋರ್ಸ್
ದೇಶದಲ್ಲಿ V2V ತಂತ್ರಜ್ಞಾನಕ್ಕೆ ವಿಶೇಷ ಆದ್ಯತೆ ನೀಡಿರುವ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಇಂಟೆಲಿಜೆಂಟ್ ಟ್ರಾನ್ಸ್‌ಪೋರ್ಟೇಶನ್ ಸಿಸ್ಟಮ್ (ITS) ಅಭಿವೃದ್ಧಿ ಮತ್ತು ಅನುಷ್ಠಾನಕ್ಕಾಗಿ ಟಾಸ್ಕ್‌ಫೋರ್ಸ್ ರಚಿಸಿದೆ.ರಸ್ತೆ ಸುರಕ್ಷತೆಯನ್ನು ಹೆಚ್ಚಿಸಲು 5.9 GHz ITS/V2X ಫ್ರೀಕ್ವೆನ್ಸಿ ವ್ಯಾಪ್ತಿಯನ್ನು ಬಳಸುವಂತೆ ಈ ಟಾಸ್ಕ್‌ಫೋರ್ಸ್ ಶಿಫಾರಸು ಮಾಡಿದೆ.
2026ರ ಮೇ 7ರಂದು ನಡೆದ ಕೇಂದ್ರ ಮೋಟಾರು ವಾಹನ ನಿಯಮಗಳ ತಾಂತ್ರಿಕ ಸ್ಥಾಯಿ ಸಮಿತಿಯ 56ನೇ ಸಭೆಯಲ್ಲಿ AIS-230 ರೂಪಿಸುವ ಕುರಿತು ಪರಿಶೀಲನೆ ನಡೆಸಲಾಗಿದೆ. ಭಾರತದಲ್ಲಿ V2V ತಂತ್ರಜ್ಞಾನದ ಕಾನೂನುಬದ್ಧ ಅನುಷ್ಠಾನಕ್ಕೆ ಈ ಮಾನದಂಡವು ತಾಂತ್ರಿಕ ಬಲ ನೀಡಲಿದೆ.ಪ್ರಸ್ತಾವಿತ V2V ವ್ಯವಸ್ಥೆಯು ವಾಹನಗಳ ಸುತ್ತಮುತ್ತಲಿನ ಪರಿಸ್ಥಿತಿಗಳ ಬಗ್ಗೆ ಚಾಲಕರ ಅರಿವನ್ನು ಹೆಚ್ಚಿಸಿ, ಸಮಯೋಚಿತ ಸುರಕ್ಷತಾ ಎಚ್ಚರಿಕೆಗಳನ್ನು ನೀಡಲಿದೆ ಎಂದು ನಿರೀಕ್ಷಿಸಲಾಗಿದೆ. ಇದರ ಮೂಲಕ ರಸ್ತೆ ಅಪಘಾತಗಳ ಅಪಾಯವನ್ನು ಕಡಿಮೆ ಮಾಡಲು ಸಂಪರ್ಕಿತ ತಂತ್ರಜ್ಞಾನಗಳ ಬಳಕೆಯೂ ಮತ್ತಷ್ಟು ಬಲಗೊಳ್ಳಲಿದೆ. ಕರಡು ನಿಯಮಗಳ ಕುರಿತು ಸಾರ್ವಜನಿಕರಿಂದ ಬರುವ ಸಲಹೆ ಮತ್ತು ಅಭಿಪ್ರಾಯಗಳನ್ನು 30 ದಿನಗಳ ಅವಧಿ ಪೂರ್ಣಗೊಂಡ ನಂತರ ಪರಿಶೀಲಿಸಲಾಗುತ್ತದೆ. ಬಳಿಕ ಅಂತಿಮ ಅಧಿಸೂಚನೆ ಹೊರಡಿಸಲಾಗುತ್ತದೆ.
