ತೀವ್ರ ಆರ್ಥಿಕ ಹಾಗೂ ಕಾನೂನು ಸಂಕಷ್ಟಕ್ಕೆ ಸಿಲುಕಿರುವ ಎಡ್-ಟೆಕ್ (Ed-tech) ದೈತ್ಯ ಸಂಸ್ಥೆ ಬೈಜೂಸ್ (Byju’s) ಸಂಸ್ಥಾಪಕ ಬೈಜು ರವೀಂದ್ರನ್‌ಗೆ ಜಾಗತಿಕ ಮಟ್ಟದಲ್ಲಿ ಮತ್ತೊಂದು ಭಾರಿ ದೊಡ್ಡ ಆಘಾತ ಎದುರಾಗಿದೆ. ತಮ್ಮ ಆಸ್ತಿಪಾಸ್ತಿಗಳಿಗೆ ಸಂಬಂಧಿಸಿದ ನ್ಯಾಯಾಲಯದ ಆದೇಶಗಳನ್ನು ಪದೇ ಪದೇ ಉಲ್ಲಂಘಿಸಿದ (ನ್ಯಾಯಾಂಗ ನಿಂದನೆ) ಹಿನ್ನೆಲೆಯಲ್ಲಿ ಸಿಂಗಾಪುರ ನ್ಯಾಯಾಲಯವು ಬೈಜು ರವೀಂದ್ರನ್‌ಗೆ 6 ತಿಂಗಳ ಅವಧಿಗೆ ಜೈಲು ಶಿಕ್ಷೆ ವಿಧಿಸಿ ಮಹತ್ವದ ಆದೇಶ ಹೊರಡಿಸಿದೆ ಎಂದು ಬ್ಲೂಮ್‌ಬರ್ಗ್ ವರದಿ ಮಾಡಿದೆ.
ನ್ಯಾಯಾಲಯವು ಬೈಜು ರವೀಂದ್ರನ್ ಅವರಿಗೆ ತಕ್ಷಣವೇ ಅಧಿಕಾರಿಗಳ ಮುಂದೆ ಶರಣಾಗುವಂತೆ (Surrender) ಆದೇಶಿಸಿದೆ. ಇದರೊಂದಿಗೆ ಸಿಂಗಾಪುರ ಡಾಲರ್ 90,000 (ಸುಮಾರು $70,500 ಅಮೆರಿಕನ್ ಡಾಲರ್) ಕಾನೂನು ವೆಚ್ಚವನ್ನು ಪಾವತಿಸುವಂತೆ ಹಾಗೂ ಸಂಬಂಧಿತ ಕಂಪನಿಯೊಂದರಲ್ಲಿ ಷೇರುಗಳನ್ನು ಹೊಂದಿರುವ ‘ಬೀಯಾರ್ ಇನ್ವೆಸ್ಟ್‌ಕೋ ಪ್ರೈವೇಟ್ ಲಿಮಿಟೆಡ್’ (Beeaar Investco Pte) ಎಂಬ ಕಾರ್ಪೊರೇಟ್ ಸಂಸ್ಥೆಯ ಮಾಲೀಕತ್ವವನ್ನು ಸಾಬೀತುಪಡಿಸುವ ದಾಖಲೆಗಳನ್ನು ಒಪ್ಪಿಸುವಂತೆ ಕೋರ್ಟ್ ನಿರ್ದೇಶನ ನೀಡಿದೆ.
ಕತಾರ್ ಇನ್ವೆಸ್ಟ್‌ಮೆಂಟ್ ಅಥಾರಿಟಿಯಿಂದ ಕೇಸ್
ಬೈಜೂಸ್ ಸಂಸ್ಥೆಯು ತೀವ್ರ ಉದ್ಯೋಗ ಕಡಿತ ಹಾಗೂ ಮರುಸಂಘಟನೆಯ ಪ್ರಕ್ರಿಯೆಯಲ್ಲಿದ್ದ ಕೊನೆಯ ಹಂತದ ಫಂಡಿಂಗ್ ರೌಂಡ್‌ನಲ್ಲಿ ಹೂಡಿಕೆ ಮಾಡಿದ್ದ ‘ಕತಾರ್ ಇನ್ವೆಸ್ಟ್‌ಮೆಂಟ್ ಅಥಾರಿಟಿ’ (QIA) ಸಂಸ್ಥೆಯ ಅಂಗಸಂಸ್ಥೆಯು ಈ ಸಿಂಗಾಪುರ ನ್ಯಾಯಾಲಯದಲ್ಲಿ ಕಾನೂನು ಪ್ರಕ್ರಿಯೆಯನ್ನು ಆರಂಭಿಸಿತ್ತು. ಈ ಪ್ರಕರಣದಲ್ಲಿ ಕತಾರ್ ಹೋಲ್ಡಿಂಗ್ಸ್ ಪರವಾಗಿ ‘ಡ್ರೂ ಮತ್ತು ನೇಪಿಯರ್’ (Drew & Napier) ಕಾನೂನು ಸಂಸ್ಥೆ ವಾದ ಮಂಡಿಸಿದ್ದರೆ, ಬೈಜೂಸ್ ಇನ್ವೆಸ್ಟ್‌ಮೆಂಟ್ ಪರವಾಗಿ ಫರ್ವೆಂಟ್ ಚೇಂಬರ್ಸ್ (Fervent Chambers) ವಾದ ಮಂಡಿಸಿದೆ.ಬೈಜು ರವೀಂದ್ರನ್ ಸದ್ಯ ಸಿಂಗಾಪುರದಲ್ಲಿದ್ದಾರೋ ಅಥವಾ ಬೇರೆ ಎಲ್ಲಿದ್ದಾರೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ ಹಾಗೂ ಅವರು ಈ ಬಗ್ಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
ಅಮೆರಿಕದಲ್ಲೂ ಮುಂದುವರಿದಿದೆ ಕಾನೂನು ಸಮರ
ಬೈಜು ರವೀಂದ್ರನ್ ಅವರ ಕಾನೂನು ಸಂಕಷ್ಟಗಳು ಕೇವಲ ಸಿಂಗಾಪುರಕ್ಕೆ ಮಾತ್ರ ಸೀಮಿತವಾಗಿಲ್ಲ. ಅಮೆರಿಕದಲ್ಲೂ $1.2 ಬಿಲಿಯನ್ (ಬರೋಬ್ಬರಿ 120 ಕೋಟಿ ಡಾಲರ್) ಸಾಲದ ಮರುಪಾವತಿಗೆ ಸಂಬಂಧಿಸಿದಂತೆ ಅವರು ಸಾಲದಾತರೊಂದಿಗೆ ತೀವ್ರ ಹೋರಾಟ ನಡೆಸುತ್ತಿದ್ದಾರೆ.
ಯುಎಸ್ ಕೋರ್ಟ್‌ನಿಂದಲೂ ನಿಂದನೆ ಶಿಕ್ಷೆ: ಈ ಹಿಂದೆ ಅಮೆರಿಕದ ದಿವಾಳಿತನ ನ್ಯಾಯಾಲಯವೂ (US Bankruptcy Court) ಸಹ ಆಸ್ತಿ ವಿವರ ಬಹಿರಂಗಪಡಿಸದ ಕಾರಣಕ್ಕೆ ಬೈಜು ಅವರಿಗೆ ಸಿವಿಲ್ ನ್ಯಾಯಾಂಗ ನಿಂದನೆ ಶಿಕ್ಷೆ ವಿಧಿಸಿತ್ತು.
ಡೆಲಾವೆರ್ ಕೋರ್ಟ್ ಆದೇಶ: ಈ ಮಧ್ಯೆ, ಡಿಸೆಂಬರ್ 2025 ರಲ್ಲಿ ಅಮೆರಿಕದ ಡೆಲಾವೆರ್ ನ್ಯಾಯಾಲಯವು ಬೈಜು ವಿರುದ್ಧ ನೀಡಿದ್ದ $1 ಬಿಲಿಯನ್ ತೀರ್ಪನ್ನು ಮರುಪರಿಶೀಲನೆಗಾಗಿ ಹಿಂಪಡೆದಿತ್ತು. ಸಾಲದಾತರ ಒಕ್ಕೂಟವಾದ ಗ್ಲಾಸ್ ಟ್ರಸ್ಟ್ (GLAS Trust) ಪ್ರಮುಖ ಮಾಹಿತಿಗಳನ್ನು ಮರೆಮಾಚಿದೆ ಎಂದು ಬೈಜು ಪರ ವಕೀಲರು ಆರೋಪಿಸಿದ್ದರು.
ಕ್ಲಾಸ್‌ರೂಮ್ ಕೋಚ್‌ನಿಂದ ಹಿಡಿದು ಬಿಲಿಯನೇರ್ ಸಾಮ್ರಾಜ್ಯದ ಪತನದ ಕಥೆ
ಭವ್ಯ ಇತಿಹಾಸ: 2011 ರಲ್ಲಿ ಬೈಜು ರವೀಂದ್ರನ್ ತಮ್ಮ ಪತ್ನಿ ದಿವ್ಯಾ ಗೋಕುಲನಾಥ್ ಅವರೊಂದಿಗೆ ಸೇರಿ ಥಿಂಕ್ ಅಂಡ್ ಲರ್ನ್ ಪ್ರೈವೇಟ್ ಲಿಮಿಟೆಡ್’ (Think & Learn Pvt Ltd) ಸಂಸ್ಥೆಯನ್ನು ಸ್ಥಾಪಿಸಿದ್ದರು. ಗಣಿತ ಕೋಚ್ ಆಗಿ ಹೆಸರು ಮಾಡಿದ್ದ ಅವರ ಬೈಜೂಸ್ ಆ್ಯಪ್ ಭಾರತದ ಸ್ಟಾರ್ಟ್‌ಅಪ್ ಇತಿಹಾಸದಲ್ಲೇ ದೊಡ್ಡ ಯಶಸ್ಸು ಕಂಡಿತ್ತು.
ಕೊರೊನಾ ಅವಧಿಯಲ್ಲಿ ಗರಿಷ್ಠ ಮಟ್ಟಕ್ಕೆ: ಕೋವಿಡ್-19 ಸಾಂಕ್ರಾಮಿಕದ ಅವಧಿಯಲ್ಲಿ ಆನ್‌ಲೈನ್ ಕಲಿಕೆಗೆ ಭಾರಿ ಬೇಡಿಕೆ ಬಂದಿದ್ದರಿಂದ, 2022 ರ ವೇಳೆಗೆ ಬೈಜೂಸ್ ಮೌಲ್ಯ ಬರೋಬ್ಬರಿ $22 ಬಿಲಿಯನ್ (ಸುಮಾರು 1.8 ಲಕ್ಷ ಕೋಟಿ ರೂಪಾಯಿ) ತಲುಪಿ, ವಿಶ್ವದ ಅತ್ಯಂತ ಮೌಲ್ಯಯುತ ಎಡ್-ಟೆಕ್ ಸಂಸ್ಥೆಯಾಗಿತ್ತು. ಆಕಾಶ್ ಎಜುಕೇಷನಲ್ ಸರ್ವೀಸಸ್, ವೈಟ್‌ಹ್ಯಾಟ್ ಜೂನಿಯರ್ ನಂತಹ ದೊಡ್ಡ ಸಂಸ್ಥೆಗಳನ್ನು ಬೈಜೂಸ್ ಖರೀದಿಸಿತ್ತು.
ಸಾಮ್ರಾಜ್ಯದ ಪತನ: 2023 ರಿಂದ ಕಂಪನಿಯ ಆಡಳಿತ ಹಳಿ ತಪ್ಪಲಾರಂಭಿಸಿತು. ಸಾಲದ ಸುಳಿ, ತಡವಾದ ಆರ್ಥಿಕ ವರದಿಗಳು ಮತ್ತು ಭಾರಿ ನಷ್ಟದಿಂದಾಗಿ ಸಾವಿರಾರು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಲಾಯಿತು. ಭಾರತದಲ್ಲಿ ಜಾರಿ ನಿರ್ದೇಶನಾಲಯ (ED) ವಿದೇಶಿ ವಿನಿಮಯ ಕಾಯ್ದೆ (FEMA) ಉಲ್ಲಂಘನೆ ಆರೋಪದಡಿ ಬೈಜೂಸ್ ಕಚೇರಿಗಳ ಮೇಲೆ ದಾಳಿ ನಡೆಸಿತ್ತು.
ಷೇರುದಾರರ ಬಂಡಾಯ, ಬೋರ್ಡ್ ಸದಸ್ಯರ ರಾಜೀನಾಮೆ ಮತ್ತು ಭಾರತದಲ್ಲೂ ದಿವಾಳಿತನ ಪ್ರಕ್ರಿಯೆ ಎದುರಿಸುತ್ತಿರುವ ಬೈಜೂಸ್ ಮೌಲ್ಯ ಸದ್ಯ ‘ಶೂನ್ಯ’ಕ್ಕೆ (Zero) ತಲುಪಿದೆ ಎಂದು ಸ್ವತಃ ಬೈಜು ರವೀಂದ್ರನ್ ಅವರೇ ಒಪ್ಪಿಕೊಂಡಿದ್ದಾರೆ. ಇದರ ಬೆನ್ನಲ್ಲೇ ಈಗ ಸಿಂಗಾಪುರ ಕೋರ್ಟ್ ವಿಧಿಸಿರುವ ಜೈಲು ಶಿಕ್ಷೆ ಬೈಜೂಸ್ ಭವಿಷ್ಯವನ್ನು ಮತ್ತಷ್ಟು ಕತ್ತಲಿಗೆ ತಳ್ಳಿದೆ.
