ಬಾಂಗ್ಲಾದೇಶದ ಮೂವತ್ತೈದು ವರ್ಷದ ಭಿಕ್ಷುಕನೊಬ್ಬ ತನಗೆ ಇಪ್ಪತ್ತೊಂದು ಮಂದಿ ಪತ್ನಿಯರಿದ್ದಾರೆ ಎಂದು ಹೇಳಿಕೊಳ್ಳುವ ಮೂಲಕ ಸಾಮಾಜಿಕ ಜಾಲತಾಣದಲ್ಲಿ ದೊಡ್ಡ ಮಟ್ಟದ ಚರ್ಚೆಗೆ ಗ್ರಾಸವಾಗಿದ್ದಾನೆ. ತನಗೆ ಇಷ್ಟೊಂದು ಮಂದಿ ಪತ್ನಿಯರಿದ್ದರೂ ಎಲ್ಲರ ಹೆಸರುಗಳನ್ನು ನೆನಪಿನಲ್ಲಿಟ್ಟುಕೊಳ್ಳಲು ಸಾಧ್ಯವಾಗದೆ ಪರದಾಡುತ್ತಿರುವುದಾಗಿ ಈತ ಸ್ಥಳೀಯ ಮಾಧ್ಯಮಗಳ ಮುಂದೆ ಹೇಳಿಕೊಂಡಿದ್ದಾನೆ.
ಸ್ಥಳೀಯ ಮಾಧ್ಯಮಗಳೊಂದಿಗೆ ಮಾತನಾಡಿದ ಮೊರು ಮಿಯಾ ಎಂಬ ಈ ವ್ಯಕ್ತಿ, “ನಾನು ಎಂದಿಗೂ ಯಾವುದೇ ಮಹಿಳೆಯ ಬಳಿ ಹೋಗಿ ಮದುವೆಯ ಪ್ರಸ್ತಾಪ ಇಟ್ಟಿಲ್ಲ. ಅವರೇ ನನ್ನ ಬಳಿ ಬಂದು ಮದುವೆಯಾಗೋಣ ಎಂದು ಕೇಳಿಕೊಳ್ಳುತ್ತಿದ್ದರು. ನನ್ನಲ್ಲಿ ಅವರಿಗೆ ಏನು ಇಷ್ಟವಾಯಿತೋ ನನಗೂ ತಿಳಿಯದು. ಮಹಿಳೆಯರು ತಾವಾಗಿಯೇ ಬಂದಾಗ ಅದನ್ನು ನಿರಾಕರಿಸುವುದು ಗೌರವವಲ್ಲ ಎಂದು ಭಾವಿಸಿ ನಾನು ಎಲ್ಲರನ್ನೂ ಮದುವೆಯಾದೆ” ಎಂದು ತಿಳಿಸಿದ್ದಾನೆ. ಈತನನ್ನು ಮದುವೆಯಾದ ಹಲವು ಮಹಿಳೆಯರು ಈತನಿಗಿಂತ ವಯಸ್ಸಿನಲ್ಲಿ ಹಿರಿಯವರಾಗಿದ್ದಾರೆ ಎಂಬುದು ವಿಶೇಷ.
ಇಷ್ಟೊಂದು ದೊಡ್ಡ ಸಂಸಾರವಿದ್ದರೂ ಈತ ಒಂದೇ ಸಣ್ಣ ಗುಡಿಸಲಿನಲ್ಲಿ ವಾಸಿಸುತ್ತಿದ್ದು, ಭಿಕ್ಷಾಟನೆಯೇ ಈತನ ಕುಟುಂಬದ ಪ್ರಮುಖ ಜೀವನೋಪಾಯವಾಗಿದೆ. ಪ್ರತಿದಿನ ಭಿಕ್ಷಾಟನೆಗೆ ತೆರಳುವಾಗ ಸರದಿಯಂತೆ ಒಬ್ಬೊಬ್ಬ ಪತ್ನಿಯನ್ನು ತನ್ನೊಂದಿಗೆ ಕರೆದುಕೊಂಡು ಹೋಗುವ ವಿಚಿತ್ರ ಅಭ್ಯಾಸವನ್ನು ಈತ ಇಟ್ಟುಕೊಂಡಿದ್ದಾನೆ. ಮಾಧ್ಯಮದವರು ಪತ್ನಿಯರ ಹೆಸರುಗಳನ್ನು ಕೇಳಿದಾಗ ಈತನಿಗೆ ಕೆಲವೇ ಕೆಲವು ಹೆಸರುಗಳು ಮಾತ್ರ ನೆನಪಿಗೆ ಬಂದಿದ್ದು, ಎಲ್ಲರ ಹೆಸರುಗಳನ್ನು ನೆನಪಿಟ್ಟುಕೊಳ್ಳುವುದು ತನಗೆ ನಿಜಕ್ಕೂ ಸವಾಲಿನ ಕೆಲಸ ಎಂದು ಒಪ್ಪಿಕೊಂಡಿದ್ದಾನೆ.
ಈ ಸಂದರ್ಶನದ ತುಣುಕುಗಳು ಅಂತರ್ಜಾಲದಲ್ಲಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ವಿಭಿನ್ನ ರೀತಿಯಲ್ಲಿ ಪ್ರತಿಕ್ರಿಯಿಸುತ್ತಿದ್ದಾರೆ. ಕೆಲವರು ಕೇವಲ ಭಿಕ್ಷಾಟನೆಯನ್ನೇ ನಂಬಿ ಇಷ್ಟೊಂದು ದೊಡ್ಡ ಸಂಸಾರವನ್ನು ಹೇಗೆ ನಿರ್ವಹಿಸಲು ಸಾಧ್ಯ ಎಂದು ಆಶ್ಚರ್ಯ ವ್ಯಕ್ತಪಡಿಸಿದರೆ, ಇನ್ನು ಕೆಲವರು ಸಮಾಜದಿಂದ ನಿರ್ಲಕ್ಷಿಸಲ್ಪಟ್ಟ ಹಾಗೂ ಬೆಂಬಲವಿಲ್ಲದ ಮಹಿಳೆಯರಿಗೆ ಈತ ತನ್ನ ಹೆಸರನ್ನು ನೀಡಿ ಆಸರೆಯಾಗಿದ್ದಾನೆ ಎಂದು ವಿಶ್ಲೇಷಿಸುತ್ತಿದ್ದಾರೆ.
