ನಟಿ ರಶ್ಮಿಕಾ ಮಂದಣ್ಣ ಅವರ ಸೌಂದರ್ಯ ಮತ್ತು ಸದಾ ಹಸನ್ಮುಖಿಯಾಗಿರುವ ಅವರ ಮುಖದ ಹೊಳಪಿನ ಹಿಂದೆ ಕಠಿಣ ಪರಿಶ್ರಮ ಮತ್ತು ಶಿಸ್ತಿನ ಜೀವನವಿದೆ. ಇತ್ತೀಚೆಗೆ ವಿಜಯ್ ದೇವರಕೊಂಡ ಅವರೊಂದಿಗೆ ಮದುವೆಯ ವದಂತಿಗಳು ಕೇಳಿಬರುತ್ತಿದ್ದರೂ, ರಶ್ಮಿಕಾ ಮಾತ್ರ ತಮ್ಮ ಫಿಟ್ನೆಸ್ ವಿಷಯದಲ್ಲಿ ಕಿಂಚಿತ್ತೂ ರಾಜಿ ಮಾಡಿಕೊಂಡಿಲ್ಲ. ಅವರ ಅದ್ಭುತ ಜಾಲೈನ್ (Jawline) ಮತ್ತು ಫಿಟ್ ದೇಹದ ರಹಸ್ಯವೇನು ಎಂಬ ಕುತೂಹಲಕ್ಕೆ ಇಲ್ಲಿದೆ ಉತ್ತರ.
ಮನೆ ಊಟಕ್ಕೇ ಮೊದಲ ಆದ್ಯತೆ: ವಿಶ್ವದಾದ್ಯಂತ ಓಡಾಡಿ ಸಕಲ ಬಗೆಯ ರುಚಿಕರ ಆಹಾರಗಳನ್ನು ಸವಿದಿದ್ದರೂ, ರಶ್ಮಿಕಾ ಅವರಿಗೆ ಇಂದಿಗೂ ಇಷ್ಟ ‘ಮನೆಯ ಊಟ’ (Ghar ka Khana). “ನಾನು ಪ್ರಪಂಚದ ಎಲ್ಲಾ ರೀತಿಯ ಡಯಟ್ ಪ್ಲಾನ್ಗಳನ್ನು ಟ್ರೈ ಮಾಡಿ ನೋಡಿದ್ದೇನೆ. ಆದರೆ ಕೊನೆಯದಾಗಿ ನನಗೆ ಅನ್ನಿಸಿದ್ದು ನಮ್ಮ ಮನೆಯ ಊಟವೇ ಅತ್ಯುತ್ತಮ ಎಂದು,” ಎಂದು ಅವರು ಹೇಳುತ್ತಾರೆ. ಬೆಳಿಗ್ಗೆ ಎದ್ದ ಕೂಡಲೇ ಆಪಲ್ ಸೈಡರ್ ವಿನೆಗರ್ ಕುಡಿಯುವುದನ್ನು ಅವರು ಮರೆಯುವುದಿಲ್ಲ. ದಿನವಿಡೀ ದೇಹವನ್ನು ಹೈಡ್ರೇಟ್ ಆಗಿಟ್ಟುಕೊಳ್ಳಲು ಅವರು ಸದಾ ನೀರಿನ ಬಾಟಲಿಯನ್ನು ಜೊತೆಯಲ್ಲೇ ಇಟ್ಟುಕೊಂಡಿರುತ್ತಾರೆ.
ಪ್ರೋಟೀನ್ ಮತ್ತು ಸಮತೋಲಿತ ಆಹಾರ: ತಮ್ಮ ಡಯಟ್ ಬಗ್ಗೆ ಮಾತನಾಡುವ ರಶ್ಮಿಕಾ, “ನಾನು ಸಂಪೂರ್ಣ ದಕ್ಷಿಣ ಭಾರತದ ಶೈಲಿಯ ಊಟವನ್ನು ಇಷ್ಟಪಡುತ್ತೇನೆ. ಆದರೆ ಅನ್ನವನ್ನು ಹೆಚ್ಚಾಗಿ ತಿನ್ನುವುದಿಲ್ಲ. ಬದಲಾಗಿ ವಿವಿಧ ತರಕಾರಿಗಳಿಂದ ಕೂಡಿದ ಪಲ್ಯ ಮತ್ತು ಸಾರುಗಳನ್ನು ಮಿಕ್ಸ್ ಮಾಡಿ ತಿನ್ನುತ್ತೇನೆ. ಇದು ಆರೋಗ್ಯಕ್ಕೆ ಮತ್ತು ರುಚಿಗೆ ಎರಡಕ್ಕೂ ಉತ್ತಮ,” ಎನ್ನುತ್ತಾರೆ. ವಾರಾಂತ್ಯದಲ್ಲಿ ಅವರು ತಮಗೆ ಇಷ್ಟವಾದ ಸುಶಿ, ನೂಡಲ್ಸ್ ಮತ್ತು ಐಸ್ ಕ್ರೀಂಗಳಂತಹ ಸಿಹಿ ಪದಾರ್ಥಗಳನ್ನು ಸವಿಯಲು ಇಷ್ಟಪಡುತ್ತಾರೆ.
ಕಠಿಣ ವರ್ಕೌಟ್ ಮತ್ತು ಕಿಕ್ಬಾಕ್ಸಿಂಗ್: ರಶ್ಮಿಕಾ ಅವರ ವಾಶ್ಬೋರ್ಡ್ ಅಬ್ಸ್ (Abs) ಸುಮ್ಮನೆ ಬಂದಿದ್ದಲ್ಲ. ಅವರು ಪ್ರತಿದಿನ ಜಿಮ್ನಲ್ಲಿ ಕಠಿಣ ತರಬೇತಿ ಪಡೆಯುತ್ತಾರೆ. ಪ್ರತಿ ಸ್ನಾಯುಗಳಿಗೂ ಪ್ರತ್ಯೇಕ ದಿನಗಳನ್ನು ಮೀಸಲಿಟ್ಟು ವ್ಯಾಯಾಮ ಮಾಡುತ್ತಾರೆ. ಇಷ್ಟೇ ಅಲ್ಲದೆ, ಅವರು ‘ಕಿಕ್ಬಾಕ್ಸಿಂಗ್’ ಮಾಡುವುದನ್ನೂ ರೂಢಿಸಿಕೊಂಡಿದ್ದಾರೆ. ಇದು ಕೇವಲ ದೈಹಿಕ ಫಿಟ್ನೆಸ್ಗೆ ಮಾತ್ರವಲ್ಲದೆ, ಮಾನಸಿಕ ಒತ್ತಡ ಕಡಿಮೆ ಮಾಡಲು ಮತ್ತು ಚುರುಕುತನ ಹೆಚ್ಚಿಸಲು ಸಹಾಯ ಮಾಡುತ್ತದೆ ಎನ್ನುವುದು ರಶ್ಮಿಕಾ ಅವರ ಅಭಿಪ್ರಾಯ.
