ಇತ್ತೀಚಿನ ದಿನಗಳಲ್ಲಿ ಶ್ವಾಸಕೋಶದ ಆರೋಗ್ಯದ ಬಗ್ಗೆ ಹೆಚ್ಚು ಗಮನ ನೀಡುವುದು ಅಗತ್ಯವಾಗಿದೆ. ವಾಹನಗಳ ಹೊಗೆ, ಧೂಳು, ಕಾರ್ಖಾನೆಗಳಿಂದ ಹೊರಬರುವ ಮಾಲಿನ್ಯ ಮತ್ತು ಇತರ ಕಲುಷಿತ ಗಾಳಿಗೆ ದೀರ್ಘಕಾಲ ಒಡ್ಡಿಕೊಳ್ಳುವುದು ಶ್ವಾಸಕೋಶದ ಮೇಲೆ ಪರಿಣಾಮ ಬೀರಬಹುದು. ಧೂಮಪಾನ, ಬೀಡಿ ಮತ್ತು ತಂಬಾಕು ಸೇವನೆಯೂ ಶ್ವಾಸಕೋಶದ ಆರೋಗ್ಯಕ್ಕೆ ಅಪಾಯವನ್ನು ಹೆಚ್ಚಿಸುವ ಪ್ರಮುಖ ಕಾರಣಗಳಾಗಿವೆ.
ಶ್ವಾಸಕೋಶಕ್ಕೆ ಸಂಬಂಧಿಸಿದ ಸಮಸ್ಯೆ ಆರಂಭವಾದಾಗ ದೇಹವು ಹಲವು ರೀತಿಯ ಸೂಚನೆಗಳನ್ನು ನೀಡಬಹುದು. ಕೆಲವು ಲಕ್ಷಣಗಳು ಬೆಳಗ್ಗೆ ಎದ್ದಾಗ ಹೆಚ್ಚು ಗಮನಕ್ಕೆ ಬರುತ್ತವೆ. ಆದರೆ ಈ ಲಕ್ಷಣಗಳು ಕಾಣಿಸಿಕೊಂಡರೆ ಅದು ಖಂಡಿತವಾಗಿಯೂ ಶ್ವಾಸಕೋಶದ ಗಂಭೀರ ಕಾಯಿಲೆ ಎಂದರ್ಥವಲ್ಲ. ಆಸ್ತಮಾ, ಬ್ರಾಂಕೈಟಿಸ್, ಸೋಂಕು ಸೇರಿದಂತೆ ಹಲವು ಕಾರಣಗಳಿಂದಲೂ ಇವು ಕಾಣಿಸಿಕೊಳ್ಳಬಹುದು.
1. ಬೆಳಗ್ಗೆ ಎದ್ದಾಗ ಉಸಿರಾಟದ ತೊಂದರೆ
ಬೆಳಗ್ಗೆ ಎದ್ದ ತಕ್ಷಣ ಎದೆ ಬಿಗಿದಂತೆ ಅನುಭವವಾಗುವುದು ಅಥವಾ ಉಸಿರಾಡಲು ಕಷ್ಟವಾಗುವುದು ಗಮನಿಸಬೇಕಾದ ಲಕ್ಷಣವಾಗಿದೆ.
ರಾತ್ರಿಯ ವೇಳೆ ಶ್ವಾಸನಾಳದಲ್ಲಿ ಕಫ ಸಂಗ್ರಹವಾಗುವುದು ಅಥವಾ ಉರಿಯೂತ ಉಂಟಾಗುವುದರಿಂದ ಕೆಲವರಿಗೆ ಬೆಳಗ್ಗೆ ಈ ಸಮಸ್ಯೆ ಹೆಚ್ಚಾಗಿ ಕಾಣಿಸಿಕೊಳ್ಳಬಹುದು. ಆಸ್ತಮಾ, ಬ್ರಾಂಕೈಟಿಸ್, COPD ಅಥವಾ ಶ್ವಾಸಕೋಶದ ಸೋಂಕಿನ ಸಂದರ್ಭದಲ್ಲೂ ಉಸಿರಾಟದ ತೊಂದರೆ ಉಂಟಾಗಬಹುದು.ಸಣ್ಣಪುಟ್ಟ ಕೆಲಸ ಮಾಡಿದರೂ ಪದೇಪದೇ ಉಸಿರಾಟ ಕಷ್ಟವಾಗುತ್ತಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.
2. ಉಸಿರಾಡುವಾಗ ಸೀಟಿ ಶಬ್ದ
ಉಸಿರನ್ನು ಒಳಗೆ ತೆಗೆದುಕೊಳ್ಳುವಾಗ ಅಥವಾ ಹೊರಗೆ ಬಿಡುವಾಗ ಸೀಟಿ ಹೊಡೆಯುವ ರೀತಿಯ ಶಬ್ದ ಕೇಳಿಸುವುದನ್ನು ವೀಜಿಂಗ್ ಎಂದು ಕರೆಯಲಾಗುತ್ತದೆ.
ಶ್ವಾಸನಾಳ ಕಿರಿದಾದಾಗ ಗಾಳಿಯ ಸಂಚಾರಕ್ಕೆ ಅಡ್ಡಿಯಾಗಬಹುದು. ಇದರಿಂದ ಈ ರೀತಿಯ ಶಬ್ದ ಉಂಟಾಗುತ್ತದೆ. ಆಸ್ತಮಾ, COPD ಮತ್ತು ಕೆಲವು ಉಸಿರಾಟದ ಸೋಂಕುಗಳಲ್ಲಿ ವೀಜಿಂಗ್ ಕಾಣಿಸಿಕೊಳ್ಳಬಹುದು.ಈ ಶಬ್ದ ಪದೇಪದೇ ಬರುತ್ತಿದ್ದರೆ ನಿರ್ಲಕ್ಷಿಸದೆ ವೈದ್ಯರ ಸಲಹೆ ಪಡೆಯಬೇಕು.
3. ನಿರಂತರ ಕೆಮ್ಮು ಮತ್ತು ಕಫ
ಶೀತ ಅಥವಾ ಸಾಮಾನ್ಯ ಉಸಿರಾಟದ ಸೋಂಕಿನಿಂದ ಉಂಟಾಗುವ ಕೆಮ್ಮು ಸಾಮಾನ್ಯವಾಗಿ ಕೆಲವು ದಿನಗಳಲ್ಲಿ ಅಥವಾ ವಾರಗಳಲ್ಲಿ ಕಡಿಮೆಯಾಗುತ್ತದೆ. ಆದರೆ ಕೆಮ್ಮು ದೀರ್ಘಕಾಲ ಮುಂದುವರಿದರೆ ಕಾರಣ ತಿಳಿದುಕೊಳ್ಳುವುದು ಮುಖ್ಯ.
ನಿರಂತರ ಕೆಮ್ಮಿನ ಜೊತೆಗೆ ಕಫದ ಪ್ರಮಾಣ ಅಥವಾ ಬಣ್ಣದಲ್ಲಿ ಬದಲಾವಣೆ ಕಂಡುಬಂದರೂ ಗಮನ ಕೊಡಬೇಕು. ಹಳದಿ ಅಥವಾ ಹಸಿರು ಕಫವು ಕೆಲವು ಸೋಂಕುಗಳ ಸಂದರ್ಭದಲ್ಲಿ ಕಾಣಿಸಿಕೊಳ್ಳಬಹುದು.
ಕಫದಲ್ಲಿ ರಕ್ತ ಕಾಣಿಸುವುದು ಮಾತ್ರವಲ್ಲದೆ, ರಕ್ತದ ಚುಕ್ಕೆಗಳಿದ್ದರೂ ವೈದ್ಯರನ್ನು ತಕ್ಷಣ ಸಂಪರ್ಕಿಸುವುದು ಅಗತ್ಯ.
4. ಎದೆ, ಬೆನ್ನು ಅಥವಾ ಭುಜದಲ್ಲಿ ನೋವು
ಉಸಿರಾಡುವಾಗ ಅಥವಾ ಕೆಮ್ಮುವಾಗ ಎದೆ ನೋವು ಹೆಚ್ಚಾಗುವುದು ಕೆಲವು ಶ್ವಾಸಕೋಶದ ಸಮಸ್ಯೆಗಳಲ್ಲಿ ಕಾಣಿಸಿಕೊಳ್ಳಬಹುದು.
ಶ್ವಾಸಕೋಶದ ಸುತ್ತಲಿನ ಪೊರೆಯಲ್ಲಿ ಉರಿಯೂತ ಉಂಟಾದಾಗ ಉಸಿರಾಟ ಅಥವಾ ಕೆಮ್ಮಿನ ಸಂದರ್ಭದಲ್ಲಿ ನೋವು ಹೆಚ್ಚಾಗಬಹುದು. ಕೆಲವು ಸಂದರ್ಭಗಳಲ್ಲಿ ಬೆನ್ನು ಅಥವಾ ಭುಜದ ಭಾಗದಲ್ಲೂ ನೋವು ಕಾಣಿಸಿಕೊಳ್ಳಬಹುದು.
ಆದರೆ ಎದೆ ಅಥವಾ ಬೆನ್ನು ನೋವಿಗೆ ಶ್ವಾಸಕೋಶದ ಕಾಯಿಲೆಯೇ ಕಾರಣ ಎಂದು ಹೇಳಲಾಗುವುದಿಲ್ಲ. ನೋವು ತೀವ್ರವಾಗಿದ್ದರೆ ಅಥವಾ ನಿರಂತರವಾಗಿದ್ದರೆ ವೈದ್ಯಕೀಯ ಪರೀಕ್ಷೆ ಮಾಡಿಸಿಕೊಳ್ಳಬೇಕು.
5. ಧ್ವನಿಯಲ್ಲಿ ಬದಲಾವಣೆ
ಗಂಟಲು ಸಮಸ್ಯೆ ಅಥವಾ ಶೀತದಿಂದ ಕೆಲವೊಮ್ಮೆ ಧ್ವನಿ ಗಡಸಾಗಬಹುದು. ಆದರೆ ಧ್ವನಿ ಒರಟಾಗಿರುವುದು ಅಥವಾ ಬದಲಾಗಿರುವುದು ದೀರ್ಘಕಾಲ ಮುಂದುವರಿದರೆ ಅದನ್ನು ನಿರ್ಲಕ್ಷಿಸಬಾರದು.
ನಿರಂತರ ಕೆಮ್ಮು ಗಂಟಲಿನ ಧ್ವನಿ ತಂತುಗಳಿಗೆ ಕಿರಿಕಿರಿ ಉಂಟುಮಾಡಬಹುದು. ಇತರ ಕೆಲವು ಆರೋಗ್ಯ ಸಮಸ್ಯೆಗಳೂ ಧ್ವನಿಯಲ್ಲಿ ಬದಲಾವಣೆಗೆ ಕಾರಣವಾಗಬಹುದು. ಹೀಗಾಗಿ ಸಮಸ್ಯೆ ಮುಂದುವರಿದರೆ ವೈದ್ಯರನ್ನು ಭೇಟಿ ಮಾಡುವುದು ಸೂಕ್ತ.
ಹಠಾತ್ ತೂಕ ಇಳಿಕೆ, ಹಸಿವು ಕಡಿಮೆಯಾದರೂ ಗಮನಿಸಿ
ಯಾವುದೇ ಕಾರಣವಿಲ್ಲದೆ ತೂಕ ಕಡಿಮೆಯಾಗುವುದು, ಹಸಿವು ಕಡಿಮೆಯಾಗುವುದು, ನಿರಂತರ ದೌರ್ಬಲ್ಯ ಅಥವಾ ದೇಹದಲ್ಲಿ ಬದಲಾವಣೆಗಳು ಕಂಡುಬಂದರೆ ವೈದ್ಯರ ಸಲಹೆ ಪಡೆಯಬೇಕು.
ಇಂತಹ ಲಕ್ಷಣಗಳು ಹಲವು ಕಾಯಿಲೆಗಳಲ್ಲಿ ಕಾಣಿಸಿಕೊಳ್ಳಬಹುದು. ಆದ್ದರಿಂದ ಲಕ್ಷಣಗಳನ್ನು ನೋಡಿ ಸ್ವತಃ ಯಾವುದೇ ಕಾಯಿಲೆಯ ನಿರ್ಧಾರಕ್ಕೆ ಬರುವುದು ಸರಿಯಲ್ಲ.
ಶ್ವಾಸಕೋಶವನ್ನು ಆರೋಗ್ಯವಾಗಿಡಲು ಏನು ಮಾಡಬೇಕು?
ಶ್ವಾಸಕೋಶದ ಆರೋಗ್ಯ ಕಾಪಾಡಿಕೊಳ್ಳಲು ಕೆಲವು ಸರಳ ಕ್ರಮಗಳನ್ನು ಪಾಲಿಸಬಹುದು.
ಧೂಮಪಾನ ಮಾಡುತ್ತಿದ್ದರೆ ಅದನ್ನು ನಿಲ್ಲಿಸಲು ಪ್ರಯತ್ನಿಸಿ.
ಇತರರು ಸೇದುವ ಸಿಗರೇಟ್ ಅಥವಾ ಬೀಡಿಯ ಹೊಗೆಯಿಂದಲೂ ದೂರವಿರಿ.
ಧೂಳು ಮತ್ತು ಹೊಗೆ ಹೆಚ್ಚಿರುವ ಪ್ರದೇಶಗಳಲ್ಲಿ ಅಗತ್ಯ ಮುನ್ನೆಚ್ಚರಿಕೆ ತೆಗೆದುಕೊಳ್ಳಿ.
ವಾಯುಮಾಲಿನ್ಯ ಹೆಚ್ಚಿರುವ ಸಮಯದಲ್ಲಿ ಹೊರಗೆ ಹೋಗುವುದನ್ನು ಸಾಧ್ಯವಾದಷ್ಟು ಕಡಿಮೆ ಮಾಡಿ.
ನಿಯಮಿತವಾಗಿ ವಾಕಿಂಗ್, ಸೈಕ್ಲಿಂಗ್ ಅಥವಾ ವೈದ್ಯರ ಸಲಹೆಯಂತೆ ವ್ಯಾಯಾಮ ಮಾಡಿ.
ಪೌಷ್ಟಿಕ ಆಹಾರ, ಹಣ್ಣುಗಳು ಮತ್ತು ತರಕಾರಿಗಳನ್ನು ಆಹಾರದಲ್ಲಿ ಸೇರಿಸಿಕೊಳ್ಳಿ.
ಕೆಲಸದ ಸ್ಥಳದಲ್ಲಿ ಧೂಳು ಅಥವಾ ರಾಸಾಯನಿಕಗಳಿಗೆ ಹೆಚ್ಚು ಒಡ್ಡಿಕೊಳ್ಳುತ್ತಿದ್ದರೆ ಸೂಕ್ತ ಸುರಕ್ಷತಾ ಕ್ರಮಗಳನ್ನು ಅನುಸರಿಸಿ.
ಯಾವಾಗ ವೈದ್ಯರನ್ನು ಭೇಟಿ ಮಾಡಬೇಕು?
ಕೆಮ್ಮು ದೀರ್ಘಕಾಲ ಮುಂದುವರಿದರೆ, ಉಸಿರಾಟದ ತೊಂದರೆ ಹೆಚ್ಚಾದರೆ, ಎದೆ ನೋವು ಕಾಣಿಸಿಕೊಂಡರೆ ಅಥವಾ ಕಫದಲ್ಲಿ ರಕ್ತ ಕಂಡುಬಂದರೆ ವೈದ್ಯರನ್ನು ಸಂಪರ್ಕಿಸುವುದು ಮುಖ್ಯ.
ವಿಶೇಷವಾಗಿ ಉಸಿರಾಟ ತೀವ್ರವಾಗಿ ಕಷ್ಟವಾಗುವುದು, ಎದೆಗೆ ತೀವ್ರ ನೋವು, ತುಟಿಗಳು ಅಥವಾ ಮುಖ ನೀಲಿ ಬಣ್ಣಕ್ಕೆ ತಿರುಗುವುದು ಅಥವಾ ರಕ್ತ ಹೆಚ್ಚು ಪ್ರಮಾಣದಲ್ಲಿ ಕೆಮ್ಮುವುದು ಕಂಡುಬಂದರೆ ತಕ್ಷಣ ವೈದ್ಯಕೀಯ ನೆರವು ಪಡೆಯಬೇಕು.
ಶ್ವಾಸಕೋಶಕ್ಕೆ ಸಂಬಂಧಿಸಿದ ಸಮಸ್ಯೆಗಳನ್ನು ಆರಂಭದಲ್ಲೇ ಗುರುತಿಸಿ ಸೂಕ್ತ ಚಿಕಿತ್ಸೆ ಪಡೆಯುವುದು ಮುಖ್ಯ. ಯಾವುದೇ ಒಂದು ಲಕ್ಷಣ ಕಂಡುಬಂದ ಮಾತ್ರಕ್ಕೆ ಕ್ಯಾನ್ಸರ್ ಎಂದು ಭಯಪಡುವ ಅಗತ್ಯವಿಲ್ಲ. ಆದರೆ ನಿರಂತರವಾಗಿ ಕಾಣಿಸಿಕೊಳ್ಳುವ ಅಥವಾ ಹೆಚ್ಚಾಗುತ್ತಿರುವ ಲಕ್ಷಣಗಳನ್ನು ನಿರ್ಲಕ್ಷಿಸದೇ ವೈದ್ಯರಿಂದ ಪರೀಕ್ಷೆ ಮಾಡಿಸಿಕೊಳ್ಳುವುದು ಉತ್ತಮ.
