ನಮಗೆಲ್ಲಾ ಬಿಳಿ ಬೆಳ್ಳುಳ್ಳಿ ಗೊತ್ತು, ಅದರ ಘಾಟು ಗೊತ್ತು. ಆದರೆ ನೀವು ಎಂದಾದರೂ ‘ಕಪ್ಪು ಬೆಳ್ಳುಳ್ಳಿ’ (Black Garlic) ನೋಡಿದ್ದೀರಾ? ನೋಡುವುದಕ್ಕೆ ಇದ್ದಿಲಿನಂತೆ ಕಪ್ಪಗಿದ್ದರೂ, ಇದರ ಒಳಗಿರುವ ಆರೋಗ್ಯದ ಗುಣಗಳು ಮಾತ್ರ ಬಂಗಾರದಷ್ಟೇ ಅಮೂಲ್ಯ.ಬೆಳ್ಳುಳ್ಳಿಯ ವಾಸನೆ ಕಂಡರೆ ದೂರ ಓಡುವವರಿಗಾಗಿಯೇ ಪ್ರಕೃತಿ ನೀಡಿದ ವಿಶೇಷ ಉಡುಗೊರೆ ಈ ಕಪ್ಪು ಬೆಳ್ಳುಳ್ಳಿ.ದಿನಕ್ಕೆ 1 ಅಥವಾ 2 ಎಸಳುಗಳನ್ನು ಹಾಗೆಯೇ ಅಗಿದು ತಿನ್ನಬಹುದು.ಸಲಾಡ್ಗಳು, ಬ್ರೆಡ್ ಸ್ಪ್ರೆಡ್ ಅಥವಾ ಚಿಕನ್ ಟಿಕ್ಕಾದಂತಹ ಭಕ್ಷ್ಯಗಳಿಗೆ ಇದನ್ನು ಸೇರಿಸಿ ರುಚಿ ಹೆಚ್ಚಿಸಬಹುದು
ಏನಿದು ಕಪ್ಪು ಬೆಳ್ಳುಳ್ಳಿ?
ಸಾಮಾನ್ಯ ಬಿಳಿ ಬೆಳ್ಳುಳ್ಳಿಯನ್ನು ನಿರ್ದಿಷ್ಟ ತಾಪಮಾನ ಮತ್ತು ತೇವಾಂಶದಲ್ಲಿ ಸತತವಾಗಿ ಕೆಲವು ವಾರಗಳ ಕಾಲ ಇಟ್ಟಾಗ ಅದು ಕಪ್ಪಾಗುತ್ತದೆ. ಈ ಪ್ರಕ್ರಿಯೆಯನ್ನು ‘ಫರ್ಮೆಂಟೇಶನ್’ (Fermentation) ಎನ್ನಬಹುದು. ಇದರಿಂದ ಬೆಳ್ಳುಳ್ಳಿಯ ಖಾರ ಕಡಿಮೆಯಾಗಿ, ಅದು ಜೆಲ್ಲಿಯಂತೆ ಮೃದುವಾಗುತ್ತದೆ ಮತ್ತು ಸ್ವಲ್ಪ ಸಿಹಿ ರುಚಿಯನ್ನು ಪಡೆಯುತ್ತದೆ.ಸಾಮಾನ್ಯ ಬೆಳ್ಳುಳ್ಳಿಗಿಂತ ಇದು ಸ್ವಲ್ಪ ದುಬಾರಿ. ಮಾರುಕಟ್ಟೆಯಲ್ಲಿ 100 ಗ್ರಾಂಗೆ ಸುಮಾರು 250 ರಿಂದ 400 ರೂಪಾಯಿ ಇರುತ್ತದೆ
ಬಿಳಿ vs ಕಪ್ಪು ಬೆಳ್ಳುಳ್ಳಿ: ವ್ಯತ್ಯಾಸವೇನು?
ಜೀರ್ಣಕ್ರಿಯೆ: ಬಿಳಿ ಬೆಳ್ಳುಳ್ಳಿ ತಿಂದರೆ ಗ್ಯಾಸ್ ಅಥವಾ ಅಸಿಡಿಟಿ ಆಗಬಹುದು. ಆದರೆ ಕಪ್ಪು ಬೆಳ್ಳುಳ್ಳಿ ಹೊಟ್ಟೆಗೆ ತುಂಬಾ ಮೃದು. ಗ್ಯಾಸ್ಟ್ರಿಕ್ (GERD) ಸಮಸ್ಯೆ ಇರುವವರಿಗೆ ಇದು ವರದಾನ.
ವಾಸನೆ: ಬಿಳಿ ಬೆಳ್ಳುಳ್ಳಿ ತಿಂದರೆ ಬಾಯಲ್ಲಿ ವಾಸನೆ ಬರುತ್ತದೆ, ಆದರೆ ಕಪ್ಪು ಬೆಳ್ಳುಳ್ಳಿ ತಿಂದರೆ ಅಂತಹ ಯಾವುದೇ ವಾಸನೆ ಬರುವುದಿಲ್ಲ.
ಆಂಟಿಆಕ್ಸಿಡೆಂಟ್: ಬಿಳಿ ಬೆಳ್ಳುಳ್ಳಿಯಲ್ಲಿ ‘ಅಲಿಸಿನ್’ ಹೆಚ್ಚಿದ್ದರೆ, ಕಪ್ಪು ಬೆಳ್ಳುಳ್ಳಿಯಲ್ಲಿ ಅದು ಸುಲಭವಾಗಿ ಜೀರ್ಣವಾಗುವ S-allyl cysteine (SAC) ಆಗಿ ಬದಲಾಗುತ್ತದೆ. ಇದು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಹೆಚ್ಚು ಸಹಕಾರಿ.
ಕಪ್ಪು ಬೆಳ್ಳುಳ್ಳಿಯ ‘ಪವರ್ಫುಲ್’ ಪ್ರಯೋಜನಗಳು
*ಕಪ್ಪು ಬೆಳ್ಳುಳ್ಳಿಯಲ್ಲಿರುವ ವಿಶೇಷ ಸಂಯುಕ್ತಗಳು ದೇಹದ ನೈಸರ್ಗಿಕ ರಕ್ಷಣಾ ವ್ಯವಸ್ಥೆಯನ್ನು ಬಲಪಡಿಸುತ್ತವೆ. ಇದು ವೈರಾಣು ಮತ್ತು ಬ್ಯಾಕ್ಟೀರಿಯಾ ಸೋಂಕುಗಳ ವಿರುದ್ಧ ಹೋರಾಡುವ ಶಕ್ತಿಯನ್ನು ನೀಡುತ್ತದೆ.
*ಹೃದಯದ ರಕ್ತನಾಳಗಳಲ್ಲಿ ‘ಕೆಟ್ಟ ಕೊಲೆಸ್ಟ್ರಾಲ್’ (LDL) ಸಂಗ್ರಹವಾಗುವುದನ್ನು ಇದು ತಡೆಯುತ್ತದೆ. ರಕ್ತ ಪರಿಚಲನೆಯನ್ನು ಸುಧಾರಿಸುವ ಮೂಲಕ ಹೃದಯಾಘಾತದಂತಹ ಅಪಾಯಗಳನ್ನು ಕಡಿಮೆ ಮಾಡಲು ಇದು ಸಹಕಾರಿ.
*ಇದರಲ್ಲಿರುವ ಆಂಟಿಆಕ್ಸಿಡೆಂಟ್ ಅಂಶಗಳು ‘ಫ್ರೀ ರಾಡಿಕಲ್’ಗಳಿಂದ ಚರ್ಮಕ್ಕೆ ಆಗುವ ಹಾನಿಯನ್ನು ತಡೆಯುತ್ತವೆ. ಇದು ಸುಕ್ಕುಗಳನ್ನು ಕಡಿಮೆ ಮಾಡಿ, ಮೈಬಣ್ಣ ಕಾಂತಿಯುತವಾಗುವಂತೆ ಮಾಡುತ್ತದೆ.
*ದೇಹದ ಒಳಗಿನ ಉರಿಯೂತವನ್ನು (Inflammation) ಕಡಿಮೆ ಮಾಡುವ ಗುಣ ಇದಕ್ಕಿದೆ. ಕೀಲು ನೋವು ಅಥವಾ ಸ್ನಾಯುಗಳ ಉರಿಯೂತದಿಂದ ಬಳಲುವವರಿಗೆ ಇದು ಪರಿಹಾರ ನೀಡಬಲ್ಲದು.
*ಸಂಶೋಧನೆಗಳ ಪ್ರಕಾರ, ಇದರಲ್ಲಿರುವ ‘ಎಸ್-ಅಲೈಲ್ ಸಿಸ್ಟೀನ್’ (SAC) ಎಂಬ ಅಂಶವು ಕ್ಯಾನ್ಸರ್ ಕೋಶಗಳ ಬೆಳವಣಿಗೆಯನ್ನು ತಡೆಯುವ ಸಾಮರ್ಥ್ಯ ಹೊಂದಿದೆ. ಇದು ಕ್ಯಾನ್ಸರ್ ಅಪಾಯವನ್ನು ಕಡಿಮೆ ಮಾಡುವಲ್ಲಿ ಸಂಭಾವ್ಯ ಪಾತ್ರ ವಹಿಸುತ್ತದೆ.
*ವಾಯು ಮಾಲಿನ್ಯದ ಮೂಲಕ ದೇಹ ಸೇರುವ ವಿಷಕಾರಿ ಅಂಶಗಳನ್ನು (Toxins) ಹೊರಹಾಕಲು ಇದು ನೆರವಾಗುತ್ತದೆ. ಆ ಮೂಲಕ ನಿಮ್ಮ ಯಕೃತ್ತನ್ನು (Liver) ಹಾನಿಯಿಂದ ರಕ್ಷಿಸುತ್ತದೆ.
