ಮೊಬೈಲ್ ಬಳಕೆದಾರರಿಗೆ ಗುಡ್ ನ್ಯೂಸ್: ನೆಟ್ ವರ್ಕ್ ಕವರೇಜ್ ನಕ್ಷೆ ಪ್ರಕಟಿಸಲು TRAI ಆದೇಶ

ನವದೆಹಲಿ: ದೇಶದ 1.2 ಬಿಲಿಯನ್ ಮೊಬೈಲ್ ಬಳಕೆದಾರರಿಗೆ ಗಮನಾರ್ಹ ಅನುಕೂಲವಾ ನೀಡುವ ಮೂಲಕ TRAI ಹೊಸ ವರ್ಷವನ್ನು ಪ್ರಾರಂಭಿಸಿದೆ.

ಟೆಲಿಕಾಂ ನಿಯಂತ್ರಕ ಏರ್ಟೆಲ್, ಜಿಯೋ, ವೊಡಾಫೋನ್ ಐಡಿಯಾ ಮತ್ತು BSNL ನಂತಹ ಟೆಲಿಕಾಂ ಕಂಪನಿಗಳು ತಮ್ಮ ವೆಬ್‌ ಸೈಟ್‌ಗಳಲ್ಲಿ ನೆಟ್‌ ವರ್ಕ್ ಕವರೇಜ್ ನಕ್ಷೆಗಳನ್ನು ಪ್ರಕಟಿಸುವಂತೆ ನಿರ್ದೇಶಿಸಿದೆ. ಈ ನಿರ್ದೇಶನದ ಪರಿಣಾಮವಾಗಿ ಈ ಕಂಪನಿಗಳು ಈಗ ತಮ್ಮ 2G, 3G, 4G ಮತ್ತು 5G ಕವರೇಜ್ ಅನ್ನು ವಿವರಿಸುವ ಭೌಗೋಳಿಕ ನಕ್ಷೆಗಳನ್ನು ಪ್ರದರ್ಶಿಸಬೇಕಾಗುತ್ತದೆ, ಇದು ಬಳಕೆದಾರರು ತಮ್ಮ ಪ್ರದೇಶದಲ್ಲಿ ಲಭ್ಯವಿರುವ ಕವರೇಜ್ ಆಧಾರದ ಮೇಲೆ ತಮ್ಮ ಟೆಲಿಕಾಂ ಆಪರೇಟರ್ ಅನ್ನು ಆಯ್ಕೆ ಮಾಡಲು ಅನುವು ಮಾಡಿಕೊಡುತ್ತದೆ.

ಈ TRAI ಆದೇಶದಿಂದ ಆಪರೇಟರ್‌ಗಳನ್ನು ಬದಲಾಯಿಸಲು ಅಥವಾ ಹೊಸ ಸಿಮ್ ಕಾರ್ಡ್ ಪಡೆಯಲು ಬಯಸುವ ಬಳಕೆದಾರರಿಗೆ ಹೆಚ್ಚು ಸಹಾಯವಾಗುತ್ತದೆ. ಪ್ರಸ್ತುತ ಬೆರಳೆಣಿಕೆಯಷ್ಟು ಕಂಪನಿಗಳು ಮಾತ್ರ ತಮ್ಮ ನೆಟ್‌ವರ್ಕ್ ಕವರೇಜ್ ನಕ್ಷೆಗಳನ್ನು ಆನ್‌ಲೈನ್‌ನಲ್ಲಿ ಹಂಚಿಕೊಳ್ಳುತ್ತವೆ. ಹೀಗಾಗಿ ಬಳಕೆದಾರರಿಗೆ ಹೊಸ ಸಿಮ್ ಪರಿಗಣಿಸುವಾಗ ಅಥವಾ ಪೂರೈಕೆದಾರರ ಬದಲಾಯಿಸುವಾಗ, ಯಾವ ಆಪರೇಟರ್ ತಮ್ಮ ಪ್ರದೇಶದಲ್ಲಿ ಉತ್ತಮ ನೆಟ್‌ವರ್ಕ್ ಸೇವೆಯನ್ನು ನೀಡುತ್ತದೆ ಎಂಬುದರ ಕುರಿತು ಮಾಹಿತಿಯ ಕೊರತೆಯಿದೆ.

ಟ್ರಾಯ್ ನ ಈ ಆದೇಶವು ಸೇವೆಯ ಗುಣಮಟ್ಟವನ್ನು(QoS) ಸುಧಾರಿಸುವತ್ತ ಒಂದು ಪ್ರಮುಖ ಹೆಜ್ಜೆಯಾಗಿದೆ. ನೆಟ್‌ವರ್ಕ್ ಕವರೇಜ್ ನಕ್ಷೆಗಳ ಮಾಹಿತಿಯೊಂದಿಗೆ ಬಳಕೆದಾರರು ಪ್ರತಿ ಟೆಲಿಕಾಂ ಆಪರೇಟರ್‌ನ ಅಸ್ತಿತ್ವದಲ್ಲಿರುವ ಸೇವಾ ಮಟ್ಟವನ್ನು ನಿರ್ಣಯಿಸುವ ಸಾಮರ್ಥ್ಯವನ್ನು ಹೊಂದಿರುತ್ತಾರೆ.

2G, 3G, 4G, ಮತ್ತು 5G ನೆಟ್‌ವರ್ಕ್ ಕವರೇಜ್‌ಗಾಗಿ ವಿವರವಾದ ಸೇವಾ ವಾರು ನಕ್ಷೆಗಳನ್ನು ತಮ್ಮ ವೆಬ್‌ ಸೈಟ್‌ಗಳಲ್ಲಿ ಒದಗಿಸುವಂತೆ TRAI ಟೆಲಿಕಾಂ ಆಪರೇಟರ್‌ಗಳಿಗೆ ಸೂಚನೆ ನೀಡಿದೆ. ನಿರ್ದಿಷ್ಟ ಪ್ರದೇಶಗಳಲ್ಲಿ ವೈರ್‌ಲೆಸ್ ಧ್ವನಿ ಮತ್ತು ಬ್ರಾಡ್‌ಬ್ಯಾಂಡ್ ಸೇವೆಗಳ ಲಭ್ಯತೆಯ ಬಗ್ಗೆ ಬಳಕೆದಾರರಿಗೆ ಮಾಹಿತಿಯೂ ಸಿಗುತ್ತದೆ. ಹೆಚ್ಚುವರಿಯಾಗಿ, ಟೆಲಿಕಾಂ ಕಂಪನಿಗಳು ತಮ್ಮ ಮೊಬೈಲ್ ಅಪ್ಲಿಕೇಶನ್‌ಗಳ ಮೂಲಕ ಈ ಕವರೇಜ್ ನಕ್ಷೆಗಳನ್ನು ಒದಗಿಸುವಂತೆ ತಿಳಿಸಲಾಗಿದೆ. ಟೆಲಿಕಾಂ ಕಂಪನಿಗಳು ಈ ನಿರ್ದೇಶನವನ್ನು ಅನುಸರಿಸಲು ಏಪ್ರಿಲ್ 1, 2025 ರವರೆಗೆ ಸಮಯವಿದೆ.