ಸೂರ್ಯನ ತಾಪ ದಿನದಿಂದ ದಿನಕ್ಕೆ ಏರುತ್ತಿದೆ. ಈ ಕಡು ಬೇಸಿಗೆಯಲ್ಲಿ ನಮ್ಮ ದೇಹವನ್ನು ತಂಪಾಗಿರಿಸಲು ಮೊಸರು ಅತ್ಯುತ್ತಮ ಆಹಾರ. ಮೊಸರಿನಲ್ಲಿ ನೈಸರ್ಗಿಕ ತಂಪು ಗುಣವಿದ್ದು, ಇದು ದೇಹದ ಉಷ್ಣತೆಯನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ. ಮೊಸರನ್ನು ನೇರವಾಗಿ ಸೇವಿಸುವುದಕ್ಕಿಂತ ಹಣ್ಣು ಮತ್ತು ತರಕಾರಿಗಳೊಂದಿಗೆ ಬೆರೆಸಿ ‘ರೈತಾ’ ರೂಪದಲ್ಲಿ ಸೇವಿಸಿದರೆ ಅದು ಊಟದ ರುಚಿಯನ್ನು ಹೆಚ್ಚಿಸುವುದಲ್ಲದೆ ಆರೋಗ್ಯಕ್ಕೂ ಹಿತಕಾರಿ. ಈ ಬೇಸಿಗೆಯಲ್ಲಿ ನೀವು ಸುಲಭವಾಗಿ ಮಾಡಬಹುದಾದ 5 ಬಗೆಯ ರೈತಾ ರೆಸಿಪಿಗಳು ಇಲ್ಲಿವೆ.
1. ಸೌತೆಕಾಯಿ ರೈತಾ (Cucumber Raita) ಸೌತೆಕಾಯಿಯಲ್ಲಿ ನೀರಿನಂಶ ಹೆಚ್ಚಿರುವುದರಿಂದ ಇದು ದೇಹವನ್ನು ಹೈಡ್ರೇಟ್ ಆಗಿರಿಸಲು ಸಹಕಾರಿ. ತುರಿದ ಸೌತೆಕಾಯಿಯನ್ನು ಮೊಸರಿನೊಂದಿಗೆ ಬೆರೆಸಿ, ಅದಕ್ಕೆ ಹುರಿದ ಜೀರಿಗೆ ಪುಡಿ, ಕಪ್ಪು ಉಪ್ಪು ಮತ್ತು ಚಾಟ್ ಮಸಾಲಾ ಸೇರಿಸಿದರೆ ರಿಫ್ರೆಶ್ ನೀಡುವ ಸೌತೆಕಾಯಿ ರೈತಾ ಸಿದ್ಧ.
2. ಈರುಳ್ಳಿ ಮತ್ತು ಟೊಮೆಟೊ ರೈತಾ (Tomato and Onion Raita) ಹಸಿ ಈರುಳ್ಳಿಯಲ್ಲಿ ಆಂಟಿ-ಆಕ್ಸಿಡೆಂಟ್‌ಗಳಿದ್ದು, ಇದು ಬಿಸಿಲಿನ ಹೊಡೆತದಿಂದ ದೇಹವನ್ನು ರಕ್ಷಿಸುತ್ತದೆ. ಸಣ್ಣದಾಗಿ ಹೆಚ್ಚಿದ ಈರುಳ್ಳಿ, ಟೊಮೆಟೊ, ಹಸಿಮೆಣಸಿನಕಾಯಿಯನ್ನು ಮೊಸರಿಗೆ ಸೇರಿಸಿ. ನಂತರ ಜೀರಿಗೆ ಪುಡಿ, ಕಪ್ಪು ಉಪ್ಪು ಮತ್ತು ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ರುಚಿಕರವಾದ ರೈತಾ ಸವಿಯಲು ಸಿದ್ಧ.
3. ಸೋರೆಕಾಯಿ ರೈತಾ (Lauki Raita) ಸೋರೆಕಾಯಿಯಲ್ಲಿ ನಾರಿನಂಶ ಹೆಚ್ಚಿದ್ದು ಜೀರ್ಣಕ್ರಿಯೆಗೆ ತುಂಬಾ ಒಳ್ಳೆಯದು. ಸೋರೆಕಾಯಿಯನ್ನು ತುರಿದು ಮೊದಲು ಬೇಯಿಸಿಕೊಳ್ಳಿ. ನಂತರ ಮೃದುವಾಗಿ ಕದಡಿದ ಮೊಸರಿಗೆ ಬೇಯಿಸಿದ ಸೋರೆಕಾಯಿ, ಕಾಳುಮೆಣಸಿನ ಪುಡಿ ಮತ್ತು ಚಾಟ್ ಮಸಾಲಾ ಸೇರಿಸಿ. ಇದಕ್ಕೆ ತುಪ್ಪದಲ್ಲಿ ಜೀರಿಗೆಯ ಒಗ್ಗರಣೆ ನೀಡಿದರೆ ಇದರ ರುಚಿ ಅದ್ಭುತವಾಗಿರುತ್ತದೆ.
4. ಅನಾನಸ್ ರೈತಾ (Pineapple Raita) ಹಣ್ಣಿನ ರೈತಾ ಇಷ್ಟಪಡುವವರಿಗೆ ಇದು ಹೇಳಿ ಮಾಡಿಸಿದಂತಿದೆ. ಅನಾನಸ್ ಚೂರುಗಳನ್ನು ಸ್ವಲ್ಪ ಗ್ರಿಲ್ ಮಾಡಿ ಸಣ್ಣದಾಗಿ ಹೆಚ್ಚಿ ಮೊಸರಿಗೆ ಸೇರಿಸಿ. ಇದಕ್ಕೆ ಚಾಟ್ ಮಸಾಲಾ, ಜೀರಿಗೆ ಪುಡಿ ಮತ್ತು ದಾಳಿಂಬೆ ಕಾಳುಗಳನ್ನು ಸೇರಿಸಿದರೆ ಸಿಹಿ ಮತ್ತು ಹುಳಿಯ ಮಿಶ್ರಣದ ವಿಭಿನ್ನ ರೈತಾ ಸಿದ್ಧವಾಗುತ್ತದೆ.
5. ಪುದೀನಾ ರೈತಾ (Mint Raita) ಪುದೀನಾ ತನ್ನ ರಿಫ್ರೆಶ್ ಗುಣಕ್ಕೆ ಹೆಸರುವಾಸಿ. ಮೊಸರಿಗೆ ಪುದೀನಾ ಎಲೆಗಳು, ದಾಳಿಂಬೆ ಕಾಳುಗಳು, ಸ್ವಲ್ಪ ಸಕ್ಕರೆ, ಉಪ್ಪು ಮತ್ತು ಕಾಳುಮೆಣಸಿನ ಪುಡಿ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಇದು ಹೊಟ್ಟೆಗೆ ತಂಪು ನೀಡುವುದಲ್ಲದೆ ಬಾಯಿಗೂ ಹಿತ ನೀಡುತ್ತದೆ.
ಈ ಬೇಸಿಗೆಯಲ್ಲಿ ಈ ಸರಳ ರೈತಾ ರೆಸಿಪಿಗಳನ್ನು ಮನೆಯಲ್ಲಿ ಪ್ರಯತ್ನಿಸಿ ಮತ್ತು ನಿಮ್ಮ ದೇಹವನ್ನು ನೈಸರ್ಗಿಕವಾಗಿ ತಂಪಾಗಿರಿಸಿಕೊಳ್ಳಿ.
