ಸಾಮಾನ್ಯವಾಗಿ ಹತ್ತು ವರ್ಷದ ಮಕ್ಕಳು ರಸ್ತೆಯಲ್ಲಿ ಸೈಕಲ್ ತುಳಿಯುವುದನ್ನು ನೋಡಿರುತ್ತೇವೆ. ಆದರೆ ಇಲ್ಲೊಬ್ಬ ಬಾಲಕ ಸೈಕಲ್ ಬಿಟ್ಟು ನೇರವಾಗಿ ಕಾರಿನ ಸ್ಟೀರಿಂಗ್ ಹಿಡಿದು ರಸ್ತೆಗಿಳಿದಿದ್ದಾನೆ. ಈ ದೃಶ್ಯವನ್ನು ಕಂಡವರು ಒಂದು ಕ್ಷಣ ನಂಬಲಾಗದೆ ಕಣ್ಣುಜ್ಜಿಕೊಂಡು ನೋಡುವಂತಾಗಿದೆ. ಸದ್ಯ ಈ ವಿಡಿಯೋ ಇಂಟರ್ನೆಟ್‌ನಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.
ನಡೆದಿದ್ದೇನು? ವೈರಲ್ ವಿಡಿಯೋದಲ್ಲಿರುವಂತೆ, ಪುಟ್ಟ ಬಾಲಕನೊಬ್ಬ ಅಂಗಡಿಗೆ ಬಂದು ತನಗೆ ಬೇಕಾದ ತಿಂಡಿಗಳನ್ನು ಖರೀದಿಸುತ್ತಾನೆ. ಮೇಲ್ನೋಟಕ್ಕೆ ಇದು ಸಾಮಾನ್ಯ ಎನಿಸಿದರೂ, ಆತ ಅಂಗಡಿಯ ಮುಂದೆ ಪಾರ್ಕ್ ಮಾಡಿದ್ದ ಟಾಟಾ ನ್ಯಾನೋ ಕಾರನ್ನು ತಾನೇ ಚಲಾಯಿಸಿಕೊಂಡು ಬಂದಿದ್ದನ್ನು ಕಂಡು ಅಲ್ಲಿದ್ದವರು ದಬ್ಬಾಳಿಕೆಗೆ ಒಳಗಾಗಿದ್ದಾರೆ. ಇದನ್ನು ಗಮನಿಸಿದ ಇಬ್ಬರು ವ್ಯಕ್ತಿಗಳು ಆತನನ್ನು ಮಾತನಾಡಿಸಿ ವಿಡಿಯೋ ರೆಕಾರ್ಡ್ ಮಾಡಿದ್ದಾರೆ.
ಪ್ರಶ್ನೆಗಳಿಗೆ ಕೂಲ್ ಆಗಿ ಉತ್ತರಿಸಿದ ಪುಟಾಣಿ ವಿಡಿಯೋ ಮಾಡುತ್ತಿದ್ದವರು ಬಾಲಕನ ಹೆಸರು ಮತ್ತು ವಯಸ್ಸನ್ನು ಕೇಳಿದಾಗ, ತನಗೆ 10 ವರ್ಷ ಎಂದು ತಿಳಿಸಿದ್ದಾನೆ. ಅಷ್ಟೇ ಅಲ್ಲದೆ, ತಾನು ಒಂದನೇ ತರಗತಿಯಲ್ಲಿ ಓದುತ್ತಿರುವುದಾಗಿ ಹೇಳಿ ಎಲ್ಲರನ್ನೂ ಅಚ್ಚರಿಗೊಳಿಸಿದ್ದಾನೆ. ತಾನು ಖರೀದಿಸಿದ ವಸ್ತುಗಳನ್ನು ಹಿಡಿದು ವೇಗವಾಗಿ ಕಾರಿನ ಬಳಿ ಹೋದ ಬಾಲಕ, ಅತ್ಯಂತ ಆತ್ಮವಿಶ್ವಾಸದಿಂದ ಡ್ರೈವಿಂಗ್ ಸೀಟ್ ಏರಿ ಕಾರನ್ನು ಸ್ಟಾರ್ಟ್ ಮಾಡಿ ಅಲ್ಲಿಂದ ಚಲಾಯಿಸಿಕೊಂಡು ಹೋಗಿದ್ದಾನೆ. ಆತನ ಡ್ರೈವಿಂಗ್ ಸ್ಟೈಲ್ ನೋಡಿ ವಿಡಿಯೋ ಮಾಡುತ್ತಿದ್ದವರೇ ನಗು ಮತ್ತು ಅಚ್ಚರಿಯಿಂದ ಮಾತು ಕಳೆದುಕೊಂಡಿದ್ದಾರೆ.
ಪೋಷಕರ ವಿರುದ್ಧ ನೆಟ್ಟಿಗರ ಕಿಡಿ ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧ ಚರ್ಚೆಗಳು ಶುರುವಾಗಿವೆ. “ಇಷ್ಟು ಸಣ್ಣ ವಯಸ್ಸಿನ ಮಗುವಿಗೆ ಕಾರು ನೀಡಿದ ಪೋಷಕರನ್ನು ಮೊದಲು ಬಂಧಿಸಬೇಕು” ಎಂದು ಹಲವರು ಆಗ್ರಹಿಸಿದ್ದಾರೆ. ಕಾನೂನು ಪ್ರಕಾರ ಇದು ಗಂಭೀರ ಅಪರಾಧವಾಗಿದ್ದು, ಮಗುವಿನ ಪ್ರಾಣಕ್ಕೆ ಅಪಾಯವಿರುವುದಷ್ಟೇ ಅಲ್ಲದೆ ರಸ್ತೆಯಲ್ಲಿ ಹೋಗುವ ಇತರರಿಗೂ ಇದರಿಂದ ತೊಂದರೆಯಾಗಬಹುದು ಎಂದು ಜನರು ಕಳವಳ ವ್ಯಕ್ತಪಡಿಸಿದ್ದಾರೆ.
ಇನ್ನು ಕೆಲವು ನೆಟ್ಟಿಗರು ತಮಾಷೆಯಾಗಿ ಪ್ರತಿಕ್ರಿಯಿಸಿದ್ದು, “ಇದನ್ನು ನೋಡಿ ರತನ್ ಟಾಟಾ ಅವರೇ ಹೆಮ್ಮೆ ಪಡಬಹುದು” ಎಂದು ಕಾಮೆಂಟ್ ಮಾಡಿದ್ದಾರೆ. ಒಟ್ಟಿನಲ್ಲಿ ಈ ಬಾಲಕನ ಸಾಹಸ ಸದ್ಯದ ಮಟ್ಟಿಗೆ ಸಾಮಾಜಿಕ ಜಾಲತಾಣದಲ್ಲಿ ಸಂಚಲನ ಮೂಡಿಸಿದೆ.
