ಪತ್ನಿಯ ಸೀಮಂತ ಕಾರ್ಯಕ್ರಮ ಮುಗಿದು ಇಡೀ ಕುಟುಂಬದಲ್ಲಿ ಸಂತಸ ಮನೆಮಾಡಿದ್ದ ವೇಳೆಯಲ್ಲೇ ಆಘಾತಕಾರಿ ಘಟನೆಯೊಂದು ಸಂಭವಿಸಿದೆ. ಪಶ್ಚಿಮ ಬಂಗಾಳದ ನದಿಯಾ ಜಿಲ್ಲೆಯ ಶಾಂತಿಪುರದ ನೃಸಿಂಹಪುರ ದೋಣಿ ಘಾಟ್ನಲ್ಲಿ ಯೂಟ್ಯೂಬರ್ ಒಬ್ಬರು ಗಂಗಾನದಿಗೆ ಹಾರಿ ನಾಪತ್ತೆಯಾಗಿದ್ದಾರೆ.
ನಾಪತ್ತೆಯಾದ ವ್ಯಕ್ತಿಯನ್ನು ಸಾಗರ್ ಬಿಸ್ವಾಸ್ ಎಂದು ಗುರುತಿಸಲಾಗಿದೆ. ಸಾಗರ್ ತಮ್ಮ ಭಾವಸಜ್ಜ ಅಜಯ್ ಹಲ್ದಾರ್ ಜೊತೆ ರಾತ್ರಿ ಬೈಕ್ನಲ್ಲಿ ಸಂಚರಿಸುತ್ತಾ, ಮದ್ಯ ಸೇವಿಸಿ ನೃಸಿಂಹಪುರ ಘಾಟ್ಗೆ ಚಹಾ ಕುಡಿಯಲು ಬಂದಿದ್ದರು. ಈ ವೇಳೆ ಅವರಿಗೆ ಬಂದ ಸಾಲು ಸಾಲು ಕರೆಗಳು ಅವರನ್ನು ತೀವ್ರ ಮಾನಸಿಕ ಒತ್ತಡಕ್ಕೆ ತಳ್ಳಿದ್ದವು ಎನ್ನಲಾಗಿದೆ. ಬಿಸ್ವಾಸ್ ಸುಮಾರು ಒಂದು ಗಂಟೆಗೂ ಹೆಚ್ಚು ಕಾಲ ಯಾರೊಂದಿಗೋ ಫೋನ್ನಲ್ಲಿ ತೀವ್ರ ಜಗಳವಾಡಿದ್ದರು.
ಘಾಟ್ಗೆ ತಲುಪಿದ ತಕ್ಷಣ ಸಾಗರ್ ದಿಢೀರನೆ ಬೈಕ್ನಿಂದ ಇಳಿದು ನದಿ ದಂಡೆಯಲ್ಲಿದ್ದ ನೌಕೆಯಿಂದ ಗಂಗಾನದಿಗೆ ಹಾರಿದ್ದಾರೆ. ಇದನ್ನು ಕಂಡು ಗಾಬರಿಗೊಂಡ ಅಜಯ್ ಕೂಡಲೇ ನದಿಗೆ ಧುಮುಕಿ, ಸಾಗರ್ ಶರ್ಟ್ ಹಿಡಿದು ರಕ್ಷಿಸಲು ಯತ್ನಿಸಿದ್ದಾರೆ. ಆದರೆ ಸಾಗರ್ ಅವರ ಕೈಯಿಂದ ಬಲವಂತವಾಗಿ ಬಿಡಿಸಿಕೊಂಡು ನೀರಿನ ಆಳಕ್ಕೆ ಜಾರಿದ್ದಾರೆ.
ಸ್ಥಳೀಯರು ಮತ್ತು ಪೊಲೀಸರು ಸಾಗರ್ ಪತ್ತೆಗಾಗಿ ಗಂಗಾನದಿಯಲ್ಲಿ ಶೋಧ ಕಾರ್ಯ ಮುಂದುವರಿಸಿದ್ದಾರೆ. ಸಂತಸದ ವಾತಾವರಣದಲ್ಲಿದ್ದ ಕುಟುಂಬದಲ್ಲಿ ಈಗ ಕಣ್ಣೀರಿನ ಮಳೆ ಸುರಿಯುತ್ತಿದ್ದು, ಘಟನೆಗೆ ಸಂಬಂಧಿಸಿದಂತೆ ಹೆಚ್ಚಿನ ತನಿಖೆ ನಡೆಯುತ್ತಿದೆ.
