ಬೆಂಗಳೂರು: ಕೆಜಿಎಫ್ ಸರಣಿಯ ಮೂಲಕ ಜಾಗತಿಕ ಮಟ್ಟದಲ್ಲಿ ಸೌಂಡ್ ಮಾಡಿದ್ದ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ, ಬಹುನಿರೀಕ್ಷಿತ ಟಾಕ್ಸಿಕ್ ಸಿನಿಮಾದ ಅದ್ದೂರಿ ಟ್ರೇಲರ್ ಲಾಂಚ್ ಕಾರ್ಯಕ್ರಮ ಇಂದು ಕಪಾಲಿ ಎಎಂಬಿ ಸಿನಿಮಾಸ್‌ನಲ್ಲಿ ಖಾಸಗಿಯಾಗಿ ನಡೆಯುತ್ತಿದೆ. ಈ ಈವೆಂಟ್‌ ಬೆನ್ನಲ್ಲೇ ಇದೀಗ ಅಭಿಮಾನಿಗಳು ಹಾಗೂ ಸ್ಯಾಂಡಲ್‌ವುಡ್ ಅಂಗಳದಲ್ಲಿ ವಿಶಿಷ್ಟ ಲೆಕ್ಕಾಚಾರವೊಂದು ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಅದೇನೆಂದರೆ, ಯಶ್ ಅವರ ಯಶಸ್ಸು ಹಾಗೂ ಈ ಸಿನಿಮಾದ ಪ್ರತಿಯೊಂದು ಅಪ್‌ಡೇಟ್‌ಗಳ ಹಿಂದೆ ನಿಗೂಢ 8 ಮತ್ತು 6ರ ಸಂಖ್ಯೆಯ ಬಲವಾದ ನಂಟಿದೆ
ಟ್ರೇಲರ್ ಲಾಂಚ್‌ನಲ್ಲೂ ಎಂಟರ ಜಾಲ:
ಇಂದು ಆಗಸ್ಟ್ 8 (08-08-2026). ಅಂದರೆ ದಿನಾಂಕ 8, ತಿಂಗಳು ಕೂಡ 8 ಮತ್ತು ಪ್ರಸ್ತುತ ವರ್ಷ 2026 ರ ಕೊನೆಯ ಸಂಖ್ಯೆ 26 (2+6=8). ಹೀಗೆ ಮೂರೂ ಕೋನಗಳಿಂದಲೂ ಲೆಕ್ಕ ಹಾಕಿದರೆ ಸಿಗುವುದು ‘8’. ನಿರ್ಮಾಣ ಸಂಸ್ಥೆಯಾದ ಕೆವಿಎನ್ ಪ್ರೊಡಕ್ಷನ್ಸ್ (KVN Productions) ಟ್ರೇಲರ್ ಡಿಜಿಟಲ್ ರಿಲೀಸ್ ಆಗುವ ಸಮಯವನ್ನು ಬಹಿರಂಗಪಡಿಸಿಲ್ಲವಾದರೂ, ಯೂಟ್ಯೂಬ್‌ಗೆ ಬರುವ ಸಮಯದಲ್ಲೂ ‘8’ರ ಮ್ಯಾಜಿಕ್ ಇರಲಿದೆ ಎನ್ನಲಾಗುತ್ತಿದೆ. ಉದಾಹರಣೆಗೆ ಸಂಜೆ 5:03 (5+3=8) ಅಥವಾ 6:02 (6+2=8) ರಂತಹ ಸಮಯಕ್ಕೇ ಟ್ರೇಲರ್ ಅನಾವರಣಗೊಳ್ಳುವ ಸಾಧ್ಯತೆ ದಟ್ಟವಾಗಿದೆ.
ಸಂಖ್ಯಾಶಾಸ್ತ್ರದಲ್ಲಿ 8 ಮತ್ತು 6ರ ಮಹತ್ವ:
ಸಂಖ್ಯೆ 8 (ಶನಿ ದೇವನ ಕೃಪೆ): ಸಂಖ್ಯಾಶಾಸ್ತ್ರದಲ್ಲಿ 8ನೇ ಸಂಖ್ಯೆಯು ಶನಿ ಗ್ರಹವನ್ನು ಪ್ರತಿನಿಧಿಸುತ್ತದೆ. ಶನಿ ದೇವನು ಕಠಿಣ ಪರಿಶ್ರಮಿಗಳಿಗೆ ಒಲಿಯುತ್ತಾನೆ ಎಂಬ ನಂಬಿಕೆ ಇದೆ. ಅಪಾರ ಧೈರ್ಯ ಹಾಗೂ ಶ್ರಮದ ಸಂಕೇತವಾಗಿರುವ ಈ ಸಂಖ್ಯೆ, ಸ್ವಯಂಕೃತವಾಗಿ ಬೆಳೆದು ಗ್ಲೋಬಲ್ ಸ್ಟಾರ್ ಆದ ಯಶ್ ಅವರ ಜೀವನಕ್ಕೆ ಸಂಪೂರ್ಣವಾಗಿ ಹೊಂದಿಕೊಳ್ಳುತ್ತದೆ.
ಸಂಖ್ಯೆ 6 (ಶುಕ್ರ ಗ್ರಹದ ಪ್ರಭಾವ): ಸಂಖ್ಯೆ 6 ಶುಕ್ರ ಗ್ರಹವನ್ನು ಸೂಚಿಸುತ್ತದೆ. ಇದು ಸೌಂದರ್ಯ, ಸಂಪತ್ತು, ಐಷಾರಾಮಿ ಜೀವನ ಹಾಗೂ ಯಶಸ್ಸನ್ನು ಪ್ರತಿನಿಧಿಸುತ್ತದೆ. ಯಶ್ ಅವರ ಸಿನಿಮಾಗಳ ಭವ್ಯತೆಯ ಹಿಂದೆ ಈ ಸಂಖ್ಯೆಯ ಪ್ರಭಾವವಿದೆ ಎನ್ನಲಾಗುತ್ತದೆ.
ಯಶ್ ಜರ್ನಿಯಲ್ಲಿ ಸಂಖ್ಯೆ 8ರ ಪವಾಡ:
ಯಶ್ ಅವರ ವೈಯಕ್ತಿಕ ಹಾಗೂ ವೃತ್ತಿಜೀವನದ ದೊಡ್ಡ ಮೈಲಿಗಲ್ಲುಗಳಲ್ಲಿ ‘8’ ಸಂಖ್ಯೆಯ ಪ್ರಭಾವ ಸ್ಪಷ್ಟವಾಗಿದೆ:
ಹುಟ್ಟಿದ ದಿನಾಂಕ: ಯಶ್ ಜನ್ಮದಿನ ಜನವರಿ 8, 1986. ಅವರ ಜನ್ಮ ದಿನಾಂಕವೇ ‘8’ ಹಾಗೂ ಲೈಫ್ ಪಾತ್ ಸಂಖ್ಯೆ ‘6’.
ಕೆಜಿಎಫ್: ಚಾಪ್ಟರ್ 1 ಬಿಡುಗಡೆ: 21-12-2018 ರಂದು ತೆರೆಕಂಡಿತ್ತು. ಈ ದಿನಾಂಕದ ಅಂಕಿಗಳನ್ನು ಕೂಡಿಸಿದರೆ (2+1+1+2+2+0+1+8) ಮೊತ್ತ 8 ಬರುತ್ತದೆ.
ಕೆಜಿಎಫ್: ಚಾಪ್ಟರ್ 2 ಇತಿಹಾಸ: ಈ ಚಿತ್ರ ಬಿಡುಗಡೆಯಾಗಿದ್ದು 14-04-2022 ರಂದು. (1+4+0+4+2+0+2+2) ಇದನ್ನು ಕೂಡಿಸಿದರೂ ಉತ್ತರ 8 ಬರುತ್ತದೆ.
ಟಾಕ್ಸಿಕ್ ಸಿನಿಮಾದಲ್ಲೂ ಮುಂದುವರಿದ ಕನೆಕ್ಷನ್:
ಟಾಕ್ಸಿಕ್ ಸಿನಿಮಾದ ಪ್ರತಿಯೊಂದು ಅಧಿಕೃತ ಮಾಹಿತಿಯನ್ನು 8 ಸಂಖ್ಯೆಯನ್ನೇ ಆಧಾರವಾಗಿಟ್ಟುಕೊಂಡು ಹೊರಬಿಡಲಾಗಿದೆ:
ಟೈಟಲ್ ಅನೌನ್ಸ್‌ಮೆಂಟ್: ಡಿಸೆಂಬರ್ 8, 2023
ಬರ್ತ್‌ಡೇ ಪೀಕ್ & ಪೋಸ್ಟರ್: ಜನವರಿ 8, 2025 ಹಾಗೂ ಜನವರಿ 8, 2026
ಎರಡನೇ ಟೀಸರ್ ರಿಲೀಸ್: ಇತ್ತೀಚೆಗೆ ಬೆಳಿಗ್ಗೆ 11:33 ಕ್ಕೆ (1+1+3+3 = 8) ಬಿಡುಗಡೆಯಾಗಿ ಸೋಷಿಯಲ್ ಮೀಡಿಯಾದಲ್ಲಿ ಧೂಳೆಬ್ಬಿಸಿತ್ತು. ಮೊದಲ ಟೀಸರ್‌ನ ಅವಧಿಯೂ 2 ನಿಮಿಷ 51 ಸೆಕೆಂಡ್ (2+5+1 = 8) ಆಗಿತ್ತು.
ವಿಶ್ವದಾದ್ಯಂತ ಬಿಡುಗಡೆ ದಿನಾಂಕ:
‘ಟಾಕ್ಸಿಕ್’ ಸಿನಿಮಾ ಆಗಸ್ಟ್ 26, 2026 (26-8-2026) ರಂದು ಬಿಡುಗಡೆಯಾಗುತ್ತಿದೆ. ದಿನಾಂಕ 26 (2+6) = 8, ತಿಂಗಳು 8 ಹಾಗೂ ಇಡೀ ದಿನಾಂಕವನ್ನು ಕೂಡಿದರೆ ಬರುವ ಅಂತಿಮ ಮೊತ್ತವೂ 8!
ಕೆಜಿಎಫ್ ಸರಣಿಗೆ ಸಾಥ್ ನೀಡಿದ ‘8’ರ ಸೆಂಟಿಮೆಂಟ್ ಹಾಗೂ ಶನಿ ದೇವನ ಕೃಪೆ ‘ಟಾಕ್ಸಿಕ್’ ಚಿತ್ರಕ್ಕೂ ಸಿಗಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
