ಯಾದಗಿರಿ: ಭಾರತ ಸಂವಿಧಾನದ ನಿಯಮಗಳನ್ನು ಅನುಸರಿಸಿ ನಡೆಯುತ್ತಿರುವ ದೇಶವಾದರೂ ಇನ್ನೂ ಸಹ ದಲಿತರ ಮೇಲೆ ಶೋಷಣೆಗಳು ನಿರಂತರವಾಗಿ ನಡೆಯುತ್ತಲೇ ಇವೆ. ವಾರಕ್ಕೊಂದಾದರೂ ಅಸ್ಪೃಶ್ಯತೆ ಕುರಿತಾದ ಸುದ್ದಿಗಳು ಕೇಳಿಬರುತ್ತಲೇ ಇರುತ್ತವೆ.
ಇದೀಗ ಕರ್ನಾಟಕದ ಯಾದಗಿರಿ ಜಿಲ್ಲೆಯಲ್ಲೂ ಇದೇ ರೀತಿಯ ಸುದ್ದಿಯೊಂದು ಕೇಳಿಬಂದಿದ್ದು, ಮೃತಪಟ್ಟವರ ಅಂತ್ಯಕ್ರಿಯೆಗೆ ಗುಂಡಿ ಅಗೆಯಲು ನಿರಾಕರಿಸಿದ ದಲಿತರ ಮೇಲೆ ಸವರ್ಣೀಯರು ದಬ್ಬಾಳಿಕೆ ನಡೆಸಲು ಮುಂದಾದ ಘಟನೆ ನಡೆದಿದೆ.
ಸುರಪುರ ತಾಲೂಕಿನ ಶಖಾಪುರ ಗ್ರಾಮದಲ್ಲಿ ಕಳೆದ ವಾರ ವ್ಯಕ್ತಿಯೊಬ್ಬರು ಮೃತಪಟ್ಟಿದ್ದು, ಇವರ ಅಂತ್ಯಕ್ರಿಯೆಗಾಗಿ ಗುಂಡಿ ಅಗೆಯಲು ದಲಿತ ವ್ಯಕ್ತಿಗೆ ಹೇಳಲಾಗಿದೆ. ಈ ಹಿಂದಿನಿಂದಲೂ ಸಾಂಪ್ರದಾಯಕವಾಗಿ ಗುಂಡಿ ಅಗೆಯುವ ಕೆಲಸವನ್ನು ದಲಿತರು ಮಾಡುತ್ತಾ ಬಂದಿದ್ದರಿಂದ ಗುಂಡಿ ಅಗೆಯಲು ಹೇಳಲಾಗಿದ್ದು, ಇದನ್ನು ದಲಿತ ಸಮುದಾಯ ತಿರಸ್ಕರಿಸಿದ ಕಾರಣ ಹಲ್ಲೆ ನಡೆಸಲಾಗಿದೆ ಎಂದು ಆರೋಪ ಕೇಳಿಬಂದಿದೆ.
ಅಲ್ಲದೇ ಗ್ರಾಮದಲ್ಲಿ ಯಾರೇ ಮೃತಪಟ್ಟರೂ ನೀವು ಗುಂಡಿ ಅಗೆಯಬೇಕು ಇಲ್ಲದಿದ್ದರೆ ಗ್ರಾಮದಿಂದ ಬಹಿಷ್ಕಾರ ಹಾಕುವುದಾಗಿ ಬೆದರಿಕೆ ಹಾಕಲಾಗಿದೆ. ಇನ್ನು ಜಮೀನಿಗೆ ಹಾದು ಹೋಗುವ ರಸ್ತೆಗೂ ನಿರ್ಬಂಧ ಹೇರಲಾಗಿದ್ದು, ಕುಡಿಯುವ ನೀರಿಗೂ ತಡೆ ಒಡ್ಡಲಾಗಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ.
ಈ ಕುರಿತು ವಾರ್ತಾಭಾರತಿ ವರದಿ ಮಾಡಿದ್ದು, ನೆಟ್ಟಿಗರು ನಾವೆಲ್ಲರೂ ಒಂದೇ ಎಂದು ಬೊಬ್ಬೆ ಹೊಡೆಯುತ್ತಿದ್ದ ಪಡೆ ಎಲ್ಲಿ, ಜಾತಿ ಪದ್ಧತಿ ಇನ್ನೂ ಜೀವಂತವಾಗಿದೆ, ದಲಿತರ ಮೇಲೆ ದಬ್ಬಾಳಿಕೆ ಈಗಲೂ ಜಾರಿಯಲ್ಲಿದೆ ಎಂದು ಕಿಡಿಕಾರಿದ್ದಾರೆ.
