ಕ್ಷಣಮಾತ್ರದಲ್ಲಿ ತೂಕ ಇಳಿಸಿಕೊಂಡು ಸ್ಲಿಮ್ ಆಗಿ ಕಾಣಬೇಕು ಎಂಬುದು ಇಂದಿನ ಕಾಲದ ಅನೇಕರ ಕನಸು. ಆದರೆ, ಈ ಸೌಂದರ್ಯದ ಕನಸು ನನಸಾಗುವ ಭರದಲ್ಲಿ ನಾವು ನಮ್ಮ ಜೀವವನ್ನೇ ಪಣಕ್ಕಿಡುತ್ತಿದ್ದೇವಾ? ಹೀಗೊಂದು ಅನುಮಾನ ಮೂಡಲು ಕಾರಣ ಚೀನಾದ 26 ವರ್ಷದ ಶಿಯೋಯು (Xiaoyu) ಎಂಬಾಕೆಯ ಕಥೆ. ತನ್ನ ಆಪ್ತ ಗೆಳತಿಯ ಮದುವೆಯಲ್ಲಿ ಬ್ರೈಡ್ಸ್ಮೇಡ್ (Bridesmaid) ಆಗಿ ಮಿಂಚಬೇಕು ಎಂಬ ಹಂಬಲದಿಂದ ಆಕೆ ನಡೆಸಿದ ಸಾಹಸ ಆಕೆಯನ್ನು ಮಾರಣಾಂತಿಕ ಕಾಯಿಲೆಯ ಹೊಸ್ತಿಲಿಗೆ ತಂದು ನಿಲ್ಲಿಸಿದೆ.
ಏನಿದು ಆಘಾತಕಾರಿ ಡೆವಿಲ್ ವೇಟ್ ಲಾಸ್ ಪ್ಲಾನ್?
ಸೋಷಿಯಲ್ ಮೀಡಿಯಾದಲ್ಲಿ ಸಿಗುವ ಅರೆಬರೆ ಮಾಹಿತಿಗಳನ್ನು ನಂಬಿ 65 ಕೆಜಿ ತೂಕವಿದ್ದ ಶಿಯೋಯು ತಾನೇ ರೂಪಿಸಿಕೊಂಡ ಅಪಾಯಕಾರಿ ಹಾದಿಯೇ ಈ ಡೆವಿಲ್ ವೇಟ್ ಲಾಸ್ ಪ್ಲಾನ್. ಮದುವೆ ವೇಳೆಗೆ ಸ್ಲಿಮ್ ಆಗಲೇಬೇಕೆಂದು ಪಣತೊಟ್ಟ ಆಕೆ ಅನುಸರಿಸಿದ ಆ ಜೀವವಿರೋಧಿ ಮಾರ್ಗ ಹೀಗಿತ್ತು
ಜೀವವಿರೋಧಿ ಆಹಾರ ಪದ್ಧತಿ: ಅನ್ನ, ರೊಟ್ಟಿ ಸೇರಿದಂತೆ ಶರೀರಕ್ಕೆ ಶಕ್ತಿ ನೀಡುವ ಕಾರ್ಬೋಹೈಡ್ರೇಟ್ಗಳನ್ನು ಆಕೆ ಸಂಪೂರ್ಣವಾಗಿ ತ್ಯಜಿಸಿದ್ದಳು. ಕೇವಲ ಅಲ್ಪ ಪ್ರಮಾಣದ ಹಸಿ ತರಕಾರಿ ಮತ್ತು ಚಿಕನ್ ಬ್ರೆಸ್ಟ್ ಹೊರತುಪಡಿಸಿ ಬೇರೇನನ್ನೂ ಸೇವಿಸುತ್ತಿರಲಿಲ್ಲ.
ಮಿತಿಮೀರಿದ ವರ್ಕೌಟ್: ಶರೀರಕ್ಕೆ ಅಗತ್ಯವಿರುವ ಕನಿಷ್ಠ ಆಹಾರವೂ ಇಲ್ಲದ ಸಮಯದಲ್ಲಿ ಆಕೆ ಪ್ರತಿದಿನ ಬರೊಬ್ಬರಿ 10 ಕಿಲೋಮೀಟರ್ಗಿಂತ ಹೆಚ್ಚು ಓಡುತ್ತಿದ್ದಳು. ಇದರೊಂದಿಗೆ ಅತ್ಯಂತ ಕಠಿಣವಾದ ‘ಹೈ-ಇಂಟೆನ್ಸಿಟಿ’ ವ್ಯಾಯಾಮಗಳನ್ನು ಮಾಡುತ್ತಾ ತನ್ನ ದೇಹವನ್ನು ದಂಡಿಸುತ್ತಿದ್ದಳು
ಈ ಕಠಿಣ ಹಾದಿಯಿಂದ ಆಕೆಗೆ ತಕ್ಷಣದ ಫಲಿತಾಂಶವೇನೋ ಸಿಕ್ಕಿತು. ಕೇವಲ ಎರಡು ತಿಂಗಳಲ್ಲಿ ಆಕೆಯ ತೂಕ 50 ಕೆಜಿಗೆ ಇಳಿಯಿತು. ಗೆಳತಿಯ ಮದುವೆಯಲ್ಲಿ ಸ್ಲಿಮ್ ಆಗಿ ಮಿಂಚಿದ್ದಕ್ಕೆ ಆಕೆ ಸಂಭ್ರಮಿಸಿದಳು. ಆದರೆ, ದೇಹಕ್ಕೆ ಹಾನಿ ಮಾಡುವ ಮೂಲಕ ಪಡೆದ ಈ ಯಶಸ್ಸಿನ ಸಂಭ್ರಮ ಹೆಚ್ಚು ಕಾಲ ಉಳಿಯಲಿಲ್ಲ. ಬೆನ್ನಲ್ಲೇ ಆಕೆಯ ದೇಹವು ಅಪಾಯಕಾರಿ ಲಕ್ಷಣಗಳನ್ನು ತೋರ್ಪಡಿಸಲು ಶುರುಮಾಡಿತು.
ಆಕೆಯ ತೂಕ 65 ಕೆಜಿಯಿಂದ 50 ಕೆಜಿಗೆ ಇಳಿಯಿತು ನಿಜ. ಆದರೆ, ಇದರ ಬೆನ್ನಲ್ಲೇ ಆಕೆಯ ದೇಹದಲ್ಲಿ ಈ ಕೆಳಗಿನ ಲಕ್ಷಣಗಳು ಕಾಣಿಸಿಕೊಂಡವು:
ನಿರಂತರ ಆಯಾಸ ಮತ್ತು ನಿಶ್ಯಕ್ತಿ.
ಅತಿಯಾದ ಬಾಯಾರಿಕೆ ಮತ್ತು ಹಸಿವು.
ತಲೆಸುತ್ತು ಮತ್ತು ಪದೇ ಪದೇ ಹೃದಯ ಬಡಿತ ಹೆಚ್ಚಾಗುವುದು.
ವೈದ್ಯರ ಎಚ್ಚರಿಕೆ
ಶಿಯೋಯು ಅವರ ಆರೋಗ್ಯ ಸ್ಥಿತಿಯನ್ನು ಕಂಡು ಹ್ಯಾಂಗ್ಝೌ ಆಸ್ಪತ್ರೆಯ ಎಂಡೋಕ್ರೈನಾಲಜಿ ವಿಭಾಗದ ಮುಖ್ಯ ವೈದ್ಯರಾದ ಡಾ. ಚೆಂಗ್ ಬೋನಿಂಗ್ ಆಘಾತ ವ್ಯಕ್ತಪಡಿಸಿದ್ದಾರೆ. ಆಕೆಗೆ ನಡೆಸಿದ ವೈದ್ಯಕೀಯ ತಪಾಸಣೆಯಲ್ಲಿ ಅತ್ಯಂತ ಅಪಾಯಕಾರಿ ಸತ್ಯಗಳು ಬಯಲಾಗಿವೆ:
ಇನ್ಸುಲಿನ್ ಅಸ್ತವ್ಯಸ್ತ: ಕಾರ್ಬೋಹೈಡ್ರೇಟ್ಗಳನ್ನು ಸಂಪೂರ್ಣವಾಗಿ ತ್ಯಜಿಸಿ, ಅದರ ಜೊತೆಗೆ ಅತಿಯಾದ ವ್ಯಾಯಾಮ ಮಾಡಿದ್ದರಿಂದ ಆಕೆಯ ದೇಹದಲ್ಲಿ ಇನ್ಸುಲಿನ್ ಉತ್ಪಾದನೆಯ ಸಮತೋಲನ ಸಂಪೂರ್ಣವಾಗಿ ತಪ್ಪಿಹೋಗಿದೆ.
ಮೆಟಾಬಾಲಿಸಂಗೆ ಹಾನಿ: ಈ ಕಠಿಣ ಹಾದಿಯು ಆಕೆಯ ಚಯಾಪಚಯ ಕ್ರಿಯೆಯನ್ನು (Metabolism) ಎಷ್ಟು ಹದಗೆಡಿಸಿದೆ ಎಂದರೆ, ದೇಹವು ಕೊಬ್ಬಿನ ಬದಲು ಸ್ನಾಯುಗಳನ್ನು (Muscle loss) ಕರಗಿಸಲು ಆರಂಭಿಸಿದೆ. ಇದು ದೇಹದಲ್ಲಿನ ನೀರಿನ ಅಂಶವನ್ನು ಅಪಾಯಕಾರಿ ಮಟ್ಟಕ್ಕೆ ಇಳಿಸಿದೆ.
ಮಧುಮೇಹದ ಹೊಸ್ತಿಲು: ಆಕೆಯ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಪರೀಕ್ಷಿಸಿದಾಗ, ಅದು ಸಾಮಾನ್ಯಕ್ಕಿಂತ ಅಧಿಕವಾಗಿರುವುದು ಕಂಡುಬಂದಿದೆ. ವೈದ್ಯಕೀಯ ಭಾಷೆಯಲ್ಲಿ ಹೇಳುವುದಾದರೆ ಆಕೆ ಈಗ ‘ಪ್ರಿ-ಡಯಾಬಿಟಿಸ್’ (Pre-diabetes) ಹಂತದಲ್ಲಿದ್ದಾಳೆ. ಅಂದರೆ ಸರಿಯಾದ ಚಿಕಿತ್ಸೆ ಸಿಗದಿದ್ದರೆ ಆಕೆ ಶಾಶ್ವತವಾಗಿ ಮಧುಮೇಹಕ್ಕೆ ತುತ್ತಾಗುವ ಸಾಧ್ಯತೆ ದಟ್ಟವಾಗಿದೆ.
ತನ್ನ ತಪ್ಪಿನ ಅರಿವಾದ ಮೇಲೆ ಶಿಯೋಯು ತನ್ನ ಜೀವನಶೈಲಿಯನ್ನು ಬದಲಿಸಿಕೊಂಡಳು. ಕಟ್ಟುನಿಟ್ಟಿನ ಡಯಟ್ ಬಿಟ್ಟು ಸಮತೋಲಿತ ಆಹಾರ ಸೇವಿಸಲು ಆರಂಭಿಸಿದಳು. ಕಠಿಣ ವ್ಯಾಯಾಮದ ಬದಲು ಸಾಧಾರಣ ಏರೋಬಿಕ್ ವ್ಯಾಯಾಮಗಳಿಗೆ ಶರಣಾದಳು. ಮೂರು ತಿಂಗಳ ನಂತರ ಆಕೆಯ ತೂಕ 52.5 ಕೆಜಿಯಲ್ಲಿ ಸ್ಥಿರವಾಯಿತು ಮತ್ತು ಆರೋಗ್ಯವೂ ಸುಧಾರಿಸಿತು.ತೂಕ ಇಳಿಸುವುದು ಒಂದು ಮ್ಯಾರಥಾನ್ ಇದ್ದಂತೆ, ಸ್ಪ್ರಿಂಟ್ ಅಲ್ಲ. ಅಡ್ಡದಾರಿಯಲ್ಲಿ ಹೋದರೆ ಅಂಗಾಂಗಗಳ ಹಾನಿ, ಹಾರ್ಮೋನ್ ಏರುಪೇರು ಮತ್ತು ಅಪೌಷ್ಟಿಕತೆ ಗ್ಯಾರಂಟಿ. ಯಾವುದೇ ಡಯಟ್ ಮಾಡುವ ಮುನ್ನ ತಜ್ಞರ ಸಲಹೆ ಪಡೆಯಿರಿ
