ಬೇಸಿಗೆಯ ಧಗಧಗಿಸುವ ಬಿಸಿಲು ಹೆಚ್ಚಾದಾಗ ದೇಹವನ್ನು ತಂಪಾಗಿಟ್ಟುಕೊಳ್ಳಲು ನಮ್ಮ ಸಾಂಪ್ರದಾಯಿಕ ಪಾನೀಯಗಳು ಸದಾ ನೆರವಿಗೆ ಬರುತ್ತವೆ. ಅಂತಹ ಪೌಷ್ಟಿಕ ಹಾಗೂ ಆರೋಗ್ಯಕರ ಪಾನೀಯಗಳಲ್ಲಿ ‘ಗೋಂದ್ ಕಟೀರಾ’ (ಸೇವಿಸಬಹುದಾದ ಒಂದು ಬಗೆಯ ನೈಸರ್ಗಿಕ ಗೊಂದು) ಹಾಲು ಪ್ರಮುಖವಾದದ್ದು. ನೈಸರ್ಗಿಕವಾಗಿ ದೇಹವನ್ನು ತಂಪಾಗಿಸುವ ಗುಣ ಹೊಂದಿರುವ ಗೋಂದ್ ಕಟೀರಾವನ್ನು ಭಾರತೀಯ ಮನೆಗಳಲ್ಲಿ ತಲೆಮಾರುಗಳಿಂದ ಬಳಸಲಾಗುತ್ತಿದೆ. ಇದನ್ನು ತಣ್ಣನೆಯ ಹಾಲು, ಒಣಹಣ್ಣುಗಳು ಮತ್ತು ಸೀಡ್ಸ್ ಜೊತೆ ಬೆರೆಸಿ ಕುಡಿಯುವುದರಿಂದ ಬೇಸಿಗೆಯ ಸುಸ್ತನ್ನು ದೂರ ಮಾಡಿ ದಿನವಿಡೀ ದೇಹದಲ್ಲಿ ಎನರ್ಜಿ ಇರುವಂತೆ ನೋಡಿಕೊಳ್ಳಬಹುದು.
ಬೇಸಿಗೆಯಲ್ಲಿ ಗೋಂದ್ ಕಟೀರಾ ಹಾಲಿನಿಂದಾಗುವ ಲಾಭಗಳು:
- ದೇಹಕ್ಕೆ ತಂಪು: ಗೋಂದ್ ಕಟೀರಾ ನೈಸರ್ಗಿಕ ಕೂಲಿಂಗ್ ಎಫೆಕ್ಟ್ ಹೊಂದಿದ್ದು, ಅತಿಯಾದ ಬಿಸಿಲಿನಿಂದ ಉಂಟಾಗುವ ದೇಹದ ಉಷ್ಣತೆಯನ್ನು ತಕ್ಷಣವೇ ಕಡಿಮೆ ಮಾಡುತ್ತದೆ.
- ನಿರ್ಜಲೀಕರಣಕ್ಕೆ ಬ್ರೇಕ್: ಬೇಸಿಗೆಯಲ್ಲಿ ಅತಿಯಾದ ಬೆವರಿನಿಂದಾಗಿ ದೇಹದಲ್ಲಿ ನೀರಿನಂಶ ಕಡಿಮೆಯಾಗಿ ಸುಸ್ತು ಮೂಡುತ್ತದೆ. ಈ ಪಾನೀಯವು ದೇಹದಲ್ಲಿ ಹೈಡ್ರೇಶನ್ ಮಟ್ಟವನ್ನು ಕಾಯ್ದುಕೊಳ್ಳಲು ನೆರವಾಗುತ್ತದೆ.
- ಮಹಿಳೆಯರ ಆರೋಗ್ಯಕ್ಕೆ ಉತ್ತಮ: ಇದು ಮಹಿಳೆಯರಲ್ಲಿ ಶಕ್ತಿಯನ್ನು ಹೆಚ್ಚಿಸಲು ಮತ್ತು ಬೇಸಿಗೆಯ ಆಯಾಸವನ್ನು ಕಡಿಮೆ ಮಾಡಲು ತುಂಬಾ ಪ್ರಯೋಜನಕಾರಿ ಎಂದು ಪರಿಗಣಿಸಲಾಗಿದೆ.
- ನೈಸರ್ಗಿಕ ಶಕ್ತಿ ವರ್ಧಕ: ಹಾಲು, ಒಣಹಣ್ಣುಗಳು ಮತ್ತು ಚಿಯಾ ಸೀಡ್ಸ್ಗಳ ಮಿಶ್ರಣವು ದೇಹಕ್ಕೆ ಅಗತ್ಯವಿರುವ ಪೋಷಕಾಂಶಗಳನ್ನು ನೀಡಿ ದಿನವಿಡೀ ಆಕ್ಟಿವ್ ಆಗಿರುವಂತೆ ಮಾಡುತ್ತದೆ.
- ಜೀರ್ಣಕ್ರಿಯೆಗೆ ಸಹಕಾರಿ: ಗೋಂದ್ ಕಟೀರಾ ಮತ್ತು ಚಿಯಾ ಸೀಡ್ಸ್ ದೇಹದ ಜೀರ್ಣಶಕ್ತಿಯನ್ನು ಉತ್ತಮಗೊಳಿಸಿ, ಹೊಟ್ಟೆಯುರಿ ಅಥವಾ ಗ್ಯಾಸ್ ಸಮಸ್ಯೆಯನ್ನು ನಿವಾರಿಸುತ್ತದೆ.
ಬೇಕಾಗುವ ಪದಾರ್ಥಗಳು:
- ನೆನೆಸಿದ ಗೋಂದ್ ಕಟೀರಾ – ಎರಡು ಚಮಚ
- ತಣ್ಣನೆಯ ಹಾಲು – ಎರಡು ಗ್ಲಾಸ್
- ಕತ್ತರಿಸಿದ ಬಾದಾಮಿ – ಎಂಟರಿಂದ ಹತ್ತು
- ಚಿಯಾ ಸೀಡ್ಸ್ – ಒಂದು ಚಮಚ
- ಏಲಕ್ಕಿ ಪುಡಿ – ಅರ್ಧ ಚಮಚ
- ಸಕ್ಕರೆ – ಎರಡು ಚಮಚ
- ಐಸ್ ಕ್ಯೂಬ್ಸ್ – ಅಗತ್ಯವಿರುವಷ್ಟು
- ಪಿಸ್ತಾ ಮತ್ತು ರೋಸ್ ಸಿರಪ್ (ಬೇಕಿದ್ದಲ್ಲಿ) – ಒಂದು ಚಮಚ
ಮಾಡುವ ವಿಧಾನ:
ಮೊದಲಿಗೆ ಗೋಂದ್ ಕಟೀರಾವನ್ನು ಇಡೀ ರಾತ್ರಿ ಅಥವಾ ಏಳರಿಂದ ಎಂಟು ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ. ನೆನೆದ ನಂತರ ಅದು ಮೃದುವಾಗಿ, ಜೆಲ್ಲಿಯಂತೆ ಕಾಣುತ್ತದೆ. ಮತ್ತೊಂದೆಡೆ, ಚಿಯಾ ಸೀಡ್ಸ್ ಅನ್ನು ಹದಿನೈದು ನಿಮಿಷಗಳ ಕಾಲ ನೀರಿನಲ್ಲಿ ನೆನೆಸಿಟ್ಟುಕೊಳ್ಳಿ.
ಈಗ ಒಂದು ಪಾತ್ರೆ ಅಥವಾ ಬ್ಲೆಂಡರ್ಗೆ ತಣ್ಣನೆಯ ಹಾಲು, ಸಕ್ಕರೆ ಮತ್ತು ಏಲಕ್ಕಿ ಪುಡಿಯನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಸಕ್ಕರೆ ಕರಗಿದ ನಂತರ ಅದಕ್ಕೆ ನೆನೆಸಿಟ್ಟ ಗೋಂದ್ ಕಟೀರಾ, ಚಿಯಾ ಸೀಡ್ಸ್, ಕತ್ತರಿಸಿದ ಬಾದಾಮಿ ಮತ್ತು ಐಸ್ ಕ್ಯೂಬ್ಸ್ ಹಾಕಿ ಹಗುರವಾಗಿ ಕೈಯಾಡಿಸಿ. ಇದನ್ನು ಗ್ಲಾಸ್ಗೆ ಸುರಿದು, ಮೇಲಿಂದ ಪಿಸ್ತಾ ಚೂರುಗಳನ್ನು ಉದುರಿಸಿ ಸರ್ವ್ ಮಾಡಿ. ಇದಕ್ಕೆ ರೋಸ್ ಸಿರಪ್ ಬಳಸುವುದರಿಂದ ಪಾನೀಯದ ಬಣ್ಣ ಮತ್ತು ರುಚಿ ಮತ್ತಷ್ಟು ಹೆಚ್ಚುತ್ತದೆ.
