ಬದಲಾಗುತ್ತಿರುವ ಇಂದಿನ ವೇಗದ ಜಗತ್ತಿನಲ್ಲಿ ಮಹಿಳೆಯರು ಕೇವಲ ದೈಹಿಕವಾಗಿ ಆರೋಗ್ಯವಾಗಿದ್ದರೆ ಸಾಲದು, ಮಾನಸಿಕವಾಗಿ ಬಲಿಷ್ಠರಾಗುವುದು ಅತ್ಯಗತ್ಯವಾಗಿದೆ. ಈ ಬಾರಿಯ ‘ವಿಶ್ವ ಮಹಿಳಾ ದಿನಾಚರಣೆ’ಯ ಸಂದರ್ಭದಲ್ಲಿ, ಮಹಿಳೆಯರು ತಮ್ಮ ಭಾವನೆಗಳನ್ನು ಹೇಗೆ ಹತೋಟಿಯಲ್ಲಿಟ್ಟುಕೊಳ್ಳಬೇಕು, ಸವಾಲುಗಳನ್ನು ಹೇಗೆ ಎದುರಿಸಬೇಕು ಮತ್ತು ‘ಇಲ್ಲ’ ಎಂದು ಹೇಳುವ ಧೈರ್ಯವನ್ನು ಹೇಗೆ ಬೆಳೆಸಿಕೊಳ್ಳಬೇಕು ಎಂಬ ವಿಷಯಗಳು ಮುನ್ನೆಲೆಗೆ ಬಂದಿವೆ. ಕೇವಲ ಕುಟುಂಬ ಅಥವಾ ವೃತ್ತಿಯ ಜವಾಬ್ದಾರಿಯಲ್ಲದೆ, ಸ್ವಯಂ ಅಸ್ತಿತ್ವ ಮತ್ತು ಮಾನಸಿಕ ಶಾಂತಿಗಾಗಿ ಮಹಿಳೆಯರು ಈ ಐದು ಪ್ರಮುಖ ಜೀವನ ಸೂತ್ರಗಳನ್ನು ಅಳವಡಿಸಿಕೊಳ್ಳುವುದು ಇಂದಿನ ತುರ್ತು ಅಗತ್ಯವಾಗಿದೆ.

ಪ್ರತಿ ವರ್ಷ ಮಾರ್ಚ್ 8 ರಂದು ವಿಶ್ವದಾದ್ಯಂತ ಅಂತರಾಷ್ಟ್ರೀಯ ಮಹಿಳಾ ದಿನಾಚರಣೆಯನ್ನು ಆಚರಿಸಲಾಗುತ್ತದೆ. ಈ ವಿಶೇಷ ಸಂದರ್ಭದಲ್ಲಿ, ಮಹಿಳೆಯರು ತಮ್ಮನ್ನು ತಾವು ಮಾನಸಿಕವಾಗಿ ಹೇಗೆ ಬಲಿಷ್ಠಗೊಳಿಸಿಕೊಳ್ಳಬಹುದು ಎಂಬ ಬಗ್ಗೆ ನಿಮಗೆ ತಿಳಿದಿದೆಯೇ?

ಅನೇಕರಲ್ಲಿ ಮಹಿಳೆಯರು ಅಬಲೆಯರು ಎಂಬ ಭಾವನೆ ಇರುತ್ತದೆ. ಆದರೆ ಮಹಿಳೆಯ ಶಕ್ತಿ ಕೇವಲ ದೈಹಿಕವಾಗಿರಬಾರದು, ಅದು ಮಾನಸಿಕವಾಗಿರಬೇಕು. ಮಾನಸಿಕ ಸ್ಥೈರ್ಯವಿದ್ದರೆ ಎಂತಹ ಸವಾಲುಗಳು ಎದುರಾದರೂ ಎದುರಿಸಿ ನಿಲ್ಲಲು ಸಾಧ್ಯವಾಗುತ್ತದೆ. ಹಾಗಾದರೆ, ಮಹಿಳೆಯರು ಮಾನಸಿಕವಾಗಿ ಸದೃಢರಾಗಲು (Mentally Strong) ಯಾವ ಗುಣಗಳನ್ನು ಬೆಳೆಸಿಕೊಳ್ಳಬೇಕು ಎಂಬುದನ್ನು ನೋಡೋಣ…

1. ಭಾವನೆಗಳಿಗೆ ಗುಲಾಮರಾಗಬೇಡಿ

ಮಾನಸಿಕವಾಗಿ ಸದೃಢರಾಗಬೇಕೆಂದರೆ ಮಹಿಳೆಯರು ತಮ್ಮ ಭಾವನೆಗಳನ್ನು ನಿಯಂತ್ರಣದಲ್ಲಿಟ್ಟುಕೊಳ್ಳಬೇಕು. ಅಂದರೆ ಕೋಪ, ನೋವು ಅಥವಾ ನಿರಾಸೆ ಉಂಟಾದಾಗ ತಕ್ಷಣವೇ ಪ್ರತಿಕ್ರಿಯಿಸದೆ, ಒಂದು ಕ್ಷಣ ತಾಳ್ಮೆಯಿಂದ ಯೋಚಿಸಬೇಕು. ಎಲ್ಲಿ ಶಾಂತವಾಗಿರಬೇಕು ಮತ್ತು ಎಲ್ಲಿ ದೃಢವಾಗಿ ಉತ್ತರಿಸಬೇಕು ಎಂಬ ಅರಿವು ನಿಮಗಿರಲಿ.

2. ಬದಲಾವಣೆಯನ್ನು ಸ್ವಾಗತಿಸಿ

ಹೆಚ್ಚಿನ ಮಹಿಳೆಯರು ಜೀವನದಲ್ಲಿ ಎದುರಾಗುವ ಬದಲಾವಣೆಗಳನ್ನು ಒಪ್ಪಿಕೊಳ್ಳಲು ಹಿಂಜರಿಯುತ್ತಾರೆ. ಆದರೆ ಎಂತಹ ಬದಲಾವಣೆ ಬಂದರೂ ಅದನ್ನು ಸ್ವೀಕರಿಸುವವರು ಮಾನಸಿಕವಾಗಿ ಬಲಿಷ್ಠರಾಗಿರುತ್ತಾರೆ. ಅಂತಹವರು ಹೊಸ ಪರಿಸ್ಥಿತಿಗಳಿಗೆ ಹೆದರುವುದಿಲ್ಲ, ಬದಲಾಗಿ ಅದನ್ನು ಒಂದು ಅವಕಾಶವಾಗಿ ಬಳಸಿಕೊಳ್ಳುತ್ತಾರೆ. ಪ್ರತಿಯೊಂದು ಸವಾಲನ್ನು ಅವರು ಯಶಸ್ಸಿನ ಏಣಿಯನ್ನಾಗಿ ಮಾಡಿಕೊಳ್ಳುತ್ತಾರೆ.

3. ಮುಲಾಜಿಲ್ಲದೆ ‘ಇಲ್ಲ’ (NO) ಎಂದು ಹೇಳಿ

ಎಲ್ಲರನ್ನೂ ಸಂತೋಷಪಡಿಸಲು ಪ್ರಯತ್ನಿಸಿದರೆ ನಮ್ಮ ಮಾನಸಿಕ ಶಾಂತಿ ಕೆಡುತ್ತದೆ ಎಂಬ ಸತ್ಯವನ್ನು ಅರಿತುಕೊಳ್ಳಬೇಕು. ನಿಮ್ಮ ಬೆಳವಣಿಗೆಗೆ ಅಥವಾ ಶಾಂತಿಗೆ ಅಡ್ಡಿಯಾಗುವ ಯಾವುದೇ ವಿಷಯವನ್ನು, ಯಾವುದೇ ಅಪರಾಧ ಪ್ರಜ್ಞೆ (Guilt) ಇಲ್ಲದೆ ನೇರವಾಗಿ ತಿರಸ್ಕರಿಸುವುದನ್ನು ಕಲಿಯಬೇಕು.

ಎಲ್ಲರನ್ನೂ ಸಂತೋಷಪಡಿಸಲು ಪ್ರಯತ್ನಿಸಿದರೆ ನಮ್ಮ ಮಾನಸಿಕ ಶಾಂತಿ ಕೆಡುತ್ತದೆ ಎಂಬ ಸತ್ಯವನ್ನು ಅರಿತುಕೊಳ್ಳಬೇಕು. ನಿಮ್ಮ ಬೆಳವಣಿಗೆಗೆ ಅಥವಾ ಶಾಂತಿಗೆ ಅಡ್ಡಿಯಾಗುವ ಯಾವುದೇ ವಿಷಯವನ್ನು, ಯಾವುದೇ ಅಪರಾಧಿ ಪ್ರಜ್ಞೆ (Guilt) ಇಲ್ಲದೆ ನೇರವಾಗಿ ತಿರಸ್ಕರಿಸುವುದನ್ನು ಕಲಿಯಬೇಕು.

4. ಇತರರ ಯಶಸ್ಸನ್ನು ನೋಡಿ ಅಸೂಯೆ ಪಡಬೇಡಿ

ಮಾನಸಿಕ ಸ್ಥೈರ್ಯವಿರುವ ಮಹಿಳೆಯರಲ್ಲಿ ಅಸೂಯೆ ಅಥವಾ ದ್ವೇಷವಿರುವುದಿಲ್ಲ. ಇತರರು ಯಶಸ್ಸು ಸಾಧಿಸಿದಾಗ ಅವರನ್ನು ಮನಸಾರೆ ಅಭಿನಂದಿಸುತ್ತಾರೆ. ಪಕ್ಕದವರ ಬೆಳವಣಿಗೆ ಅವರಿಗೆ ಸ್ಫೂರ್ತಿ ನೀಡುತ್ತದೆಯೇ ಹೊರತು ಭಯವನ್ನಲ್ಲ.

5. ತಪ್ಪುಗಳಿಂದ ಪಾಠ ಕಲಿಯಿರಿ

ಯಾವುದೇ ಕೆಲಸದಲ್ಲಿ ವಿಫಲವಾದಾಗ ಸಂದರ್ಭಗಳನ್ನು ಅಥವಾ ಇತರರನ್ನು ದೂಷಿಸಬೇಡಿ. ನಿಮ್ಮ ತಪ್ಪುಗಳಿಗೆ ನೀವೇ ಜವಾಬ್ದಾರರಾಗಿರಿ. ಸೋಲನ್ನು ಅಂತ್ಯ ಎಂದು ಭಾವಿಸದೆ, ಅದನ್ನು ಗೆಲುವಿಗೆ ಬೇಕಾದ ಒಂದು ಪಾಠ ಎಂದು ಪರಿಗಣಿಸಿ.

ಈ ಮೇಲಿನ ಗುಣಗಳನ್ನು ಅಳವಡಿಸಿಕೊಂಡರೆ ನೀವು ಕೇವಲ ಮಾನಸಿಕವಾಗಿ ಸಬಲರಾಗುವುದು ಮಾತ್ರವಲ್ಲದೆ, ಜೀವನದಲ್ಲಿ ಉನ್ನತ ಮಟ್ಟಕ್ಕೇರುತ್ತೀರಿ.