ಪಶ್ಚಿಮ ಏಷ್ಯಾದಲ್ಲಿ ನಡೆಯುತ್ತಿರುವ ಸಂಘರ್ಷದ ಕಾರಣದಿಂದಾಗಿ ಭಾರತದಲ್ಲಿ ಸಿಲುಕಿಕೊಂಡಿರುವ ವಿದೇಶಿ ಪ್ರಜೆಗಳಿಗೆ ವೀಸಾ ಅವಧಿ ವಿಸ್ತರಣೆ ಮತ್ತು ವೀಸಾ ಅವಧಿ ಮೀರಿದರೂ ವಿಧಿಸುವ ದಂಡದಿಂದ (Overstay penalty) ವಿನಾಯಿತಿಯನ್ನು ಭಾರತ ಘೋಷಿಸಿದೆ.
ದುಬೈನಲ್ಲಿರುವ ಭಾರತೀಯ ಕಾನ್ಸುಲೇಟ್ ಈ ಬಗ್ಗೆ ಅಧಿಸೂಚನೆ ಹೊರಡಿಸಿದ್ದು, ಶೀಘ್ರದಲ್ಲೇ ಅವಧಿ ಮುಗಿಯಲಿರುವ ಅಥವಾ ಈಗಾಗಲೇ ಮುಗಿದಿರುವ ಎಲ್ಲಾ ವೀಸಾ ಮತ್ತು ಇ-ವೀಸಾಗಳನ್ನು ಪ್ರಾದೇಶಿಕ ವಿದೇಶಿಯರ ನೋಂದಣಿ ಕಚೇರಿಗಳ (FRROs) ಮೂಲಕ ಒಂದು ತಿಂಗಳವರೆಗೆ ಉಚಿತವಾಗಿ (Gratis basis) ವಿಸ್ತರಿಸಲಾಗುವುದು ಎಂದು ತಿಳಿಸಿದೆ.
- ದಂಡ ವಿನಾಯಿತಿ: ಫೆಬ್ರವರಿ 28ರ ನಂತರದ ಸಂಘರ್ಷದಿಂದಾಗಿ ಭಾರತದಲ್ಲೇ ಉಳಿದುಕೊಂಡಿರುವ ವಿದೇಶಿಯರಿಗೆ ವೀಸಾ ಅವಧಿ ಮೀರಿದ್ದಕ್ಕಾಗಿ ಯಾವುದೇ ದಂಡ ವಿಧಿಸುವುದಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
- ಉಚಿತ ಎಕ್ಸಿಟ್ ಪರ್ಮಿಟ್: ವಿಮಾನಯಾನ ವ್ಯತ್ಯಯದಿಂದಾಗಿ ತೊಂದರೆಗೀಡಾದ ವಿದೇಶಿಯರು, ಮಾರ್ಗಗಳು ಪುನಃ ಆರಂಭವಾದ ತಕ್ಷಣ ಭಾರತದಿಂದ ಹೊರಹೋಗಲು ಅನುವಾಗುವಂತೆ ‘ಎಕ್ಸಿಟ್ ಪರ್ಮಿಟ್’ಗಳನ್ನು ಉಚಿತವಾಗಿ ನೀಡಲಾಗುವುದು.
- ಕಾನೂನು ಉಲ್ಲಂಘನೆಯಲ್ಲ: ಒಂದು ವೇಳೆ ವಿದೇಶಿ ಪ್ರಜೆಯು ಎಕ್ಸಿಟ್ ಪರ್ಮಿಟ್ ಅಥವಾ ವೀಸಾ ವಿಸ್ತರಣೆಗೆ ಅರ್ಜಿ ಸಲ್ಲಿಸಲು ಸಾಧ್ಯವಾಗದಿದ್ದರೆ, ಅದನ್ನು ವಲಸೆ ಕಾನೂನಿನ ಉಲ್ಲಂಘನೆ ಎಂದು ಪರಿಗಣಿಸಲಾಗುವುದಿಲ್ಲ.
- ತಾತ್ಕಾಲಿಕ ಲ್ಯಾಂಡಿಂಗ್ ಪರ್ಮಿಟ್ (TLP): ವಿಮಾನಗಳ ಮಾರ್ಗ ಬದಲಾವಣೆಯಿಂದಾಗಿ ಅನಿವಾರ್ಯವಾಗಿ ಭಾರತಕ್ಕೆ ಬರುವ ವಿದೇಶಿ ಪ್ರಜೆಗಳಿಗೆ ತಾತ್ಕಾಲಿಕ ಲ್ಯಾಂಡಿಂಗ್ ಪರ್ಮಿಟ್ ಅನ್ನು ಉಚಿತವಾಗಿ ನೀಡಲಾಗುವುದು.
ಇಸ್ರೇಲ್ ಮತ್ತು ಅಮೆರಿಕವು ಇರಾನ್ ಮೇಲೆ ಡ್ರೋನ್ ಮತ್ತು ಕ್ಷಿಪಣಿ ದಾಳಿ ನಡೆಸುತ್ತಿರುವುದರಿಂದ ಪಶ್ಚಿಮ ಏಷ್ಯಾದಲ್ಲಿ ಉದ್ವಿಗ್ನತೆ ಮುಂದುವರಿದಿದೆ. ಇದಕ್ಕೆ ಪ್ರತಿಯಾಗಿ ಇರಾನ್ ಕೂಡ ಕೊಲ್ಲಿ ಪ್ರದೇಶದಲ್ಲಿರುವ ಅಮೆರಿಕದ ಆಯಕಟ್ಟಿನ ನೆಲೆಗಳನ್ನು ಮತ್ತು ನೇರವಾಗಿ ಇಸ್ರೇಲ್ ಅನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಿದೆ. ದೋಹಾದಲ್ಲಿರುವ ಭಾರತೀಯ ರಾಯಭಾರ ಕಚೇರಿಯ ಮಾಹಿತಿಯಂತೆ, ಸುಮಾರು 500 ಭಾರತೀಯರು ಕತಾರ್ ಏರ್‌ವೇಸ್ ವಿಮಾನಗಳ ಮೂಲಕ ಕತಾರ್‌ನಿಂದ ಭಾರತಕ್ಕೆ ಮತ್ತು ಇತರ ಜಾಗತಿಕ ತಾಣಗಳಿಗೆ ಪ್ರಯಾಣಿಸಿದ್ದಾರೆ.
