ನವದೆಹಲಿ : ನಟಿ ಕೃತಿಕಾ ಕಮ್ರಾ ಮತ್ತು ಖ್ಯಾತ ಕ್ರಿಕೆಟ್ ನಿರೂಪಕ ಗೌರವ್ ಕಪೂರ್ ಅವರ ವಿವಾಹದ ಸುದ್ದಿಗಳು ಕಳೆದ ಕೆಲವು ದಿನಗಳಿಂದ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿತ್ತು. ಈಗ ಈ ಜೋಡಿಯ ವಿವಾಹದ ದಿನಾಂಕ ಅಧಿಕೃತವಾಗಿ ಹೊರಬಿದ್ದಿದ್ದು, ಮಾರ್ಚ್ 11, 2026 ರಂದು ಈ ಜೋಡಿ ಹಸೆಮಣೆ ಏರಲಿದೆ.
ಕಳೆದ ಕೆಲವು ಸಮಯದಿಂದ ಪ್ರೀತಿಯ ಪಯಣದಲ್ಲಿದ್ದ ಈ ಜೋಡಿ, ಮಾರ್ಚ್ 11ರಂದು ಮುಂಬೈನಲ್ಲಿ ಅತ್ಯಂತ ಆಪ್ತರ ಸಮ್ಮುಖದಲ್ಲಿ ಸರಳವಾಗಿ ಹಸೆಮಣೆ ಏರಲಿದ್ದಾರೆ. ಅದ್ದೂರಿತನಕ್ಕಿಂತ ಹೆಚ್ಚಾಗಿ ಅರ್ಥಪೂರ್ಣ ಆಚರಣೆಗೆ ಒತ್ತು ನೀಡಿರುವ ಈ ಜೋಡಿ, ಮಾರ್ಚ್ 12ರಂದು ಚಿತ್ರರಂಗ ಹಾಗೂ ಕ್ರಿಕೆಟ್ ಜಗತ್ತಿನ ಗಣ್ಯರಿಗಾಗಿ ಮುಂಬೈನಲ್ಲಿ ಅದ್ಧೂರಿ ಔತಣಕೂಟವನ್ನು ಆಯೋಜಿಸಿದೆ.
ಮುಂಬೈನಲ್ಲಿರುವ ಗೌರವ್ ಕಪೂರ್ ಅವರ ನಿವಾಸದಲ್ಲಿ ಅತ್ಯಂತ ಸರಳವಾಗಿ ‘ಸೈನಿಂಗ್ ಸೆರಿಮನಿ’ (Signing Ceremony) ಅಂದರೆ ನೋಂದಣಿ ವಿವಾಹ ನಡೆಯಲಿದೆ. ಕೇವಲ ಕುಟುಂಬದ ಆಪ್ತ ಸದಸ್ಯರ ಸಮ್ಮುಖದಲ್ಲಿ ಈ ಜೋಡಿ ಪರಸ್ಪರ ಪ್ರತಿಜ್ಞೆ ಸ್ವೀಕರಿಸಲಿದ್ದಾರೆ.
ಮಾರ್ಚ್ 12 (ಗ್ರ್ಯಾಂಡ್ ಪಾರ್ಟಿ): ಮದುವೆಯ ಮರುದಿನ ಅಂದರೆ ಮಾರ್ಚ್ 12 ರಂದು ಮುಂಬೈನಲ್ಲಿ ಅದ್ಧೂರಿ ಔತಣಕೂಟ ನಡೆಯಲಿದೆ. ಇದರಲ್ಲಿ ಚಿತ್ರರಂಗದ ಗಣ್ಯರು ಹಾಗೂ ಕ್ರಿಕೆಟ್ ಲೋಕದ ಆಪ್ತ ಸ್ನೇಹಿತರು ಭಾಗವಹಿಸಲಿದ್ದಾರೆ.
ದಂಪತಿಯ ಆಪ್ತ ಮೂಲವೊಂದು ತಿಳಿಸಿರುವಂತೆ, “ಕೃತಿಕಾ ಮತ್ತು ಗೌರವ್ ತಮ್ಮ ಮದುವೆಯು ಅದ್ದೂರಿಯಾಗಿರುವುದಕ್ಕಿಂತ ಹೆಚ್ಚಾಗಿ ವೈಯಕ್ತಿಕವಾಗಿ ಮತ್ತು ನೈಜವಾಗಿರಲಿ ಎಂದು ಬಯಸಿದ್ದರು. ಸಂಪ್ರದಾಯಗಳಿಗೆ ಗೌರವ ನೀಡುತ್ತಲೇ, ತಮ್ಮ ವ್ಯಕ್ತಿತ್ವವನ್ನು ಬಿಂಬಿಸುವಂತೆ ಅಚ್ಚುಕಟ್ಟಾದ ಮತ್ತು ಅರ್ಥಪೂರ್ಣವಾದ ಆಚರಣೆಯನ್ನು ಅವರು ಆಯೋಜಿಸುತ್ತಿದ್ದಾರೆ.
ಪ್ರೀತಿಯ ಪಯಣ
ಕಳೆದ ಡಿಸೆಂಬರ್ನಲ್ಲಿ ಕೃತಿಕಾ ಕಮ್ರಾ ಅವರು ಇನ್ಸ್ಟಾಗ್ರಾಮ್ನಲ್ಲಿ ಶೇರ್ ಮಾಡಿದ್ದ ಫೋಟೋಗಳು ಈ ಜೋಡಿಯ ಸಂಬಂಧವನ್ನು ಅಧಿಕೃತಗೊಳಿಸಿದ್ದವು. ಇಬ್ಬರೂ ಕಾಫಿ ಮಗ್ಗಳೊಂದಿಗೆ ‘ಚಿಯರ್ಸ್’ ಹೇಳುತ್ತಿರುವ ಬೂಮರಾಂಗ್ ವಿಡಿಯೋ ಮತ್ತು ಗೌರವ್ ಅವರ ಕ್ರೀಡಾ ಶೂಗಳ ಫೋಟೋ ಹಂಚಿಕೊಂಡು, “ಇದು ಇಷ್ಟು ಚೀಸಿಯಾಗಿರಬೇಕೆ?” ಎಂದು ತಮಾಷೆಯಾಗಿ ಕ್ಯಾಪ್ಶನ್ ನೀಡಿದ್ದರು.
ಕೃತಿಕಾ ಕಮ್ರಾ ಅವರು ಕಿರುತೆರೆ ಮತ್ತು ಸಿನಿಮಾ ರಂಗದಲ್ಲಿ ಸಕ್ರಿಯರಾಗಿದ್ದರೆ, ಗೌರವ್ ಕಪೂರ್ ತಮ್ಮ ‘ಬ್ರೇಕ್ಫಾಸ್ಟ್ ವಿತ್ ಚಾಂಪಿಯನ್ಸ್’ ಕಾರ್ಯಕ್ರಮದ ಮೂಲಕ ಭಾರತದ ಪ್ರತಿ ಮನೆಗೂ ಪರಿಚಿತರಾಗಿದ್ದಾರೆ.
