ಜಾಗತಿಕ ರಾಜಕೀಯ ಘರ್ಷಣೆಗಳು ಕೇವಲ ಇಂಧನ ಅಥವಾ ಆಹಾರದ ಮೇಲೆ ಮಾತ್ರವಲ್ಲದೆ, ಈಗ ಮದ್ಯಪ್ರಿಯರ ‘ಚಿಲ್’ ಮೂಡ್ ಮೇಲೂ ಪರಿಣಾಮ ಬೀರತೊಡಗಿವೆ. ಪಶ್ಚಿಮ ಏಷ್ಯಾದಲ್ಲಿ (ಮಧ್ಯಪ್ರಾಚ್ಯ) ಉಲ್ಬಣಿಸಿರುವ ಯುದ್ಧದ ಹಿನ್ನೆಲೆಯಲ್ಲಿ ಅನಿಲ ಪೂರೈಕೆ ವ್ಯತ್ಯಯಗೊಂಡಿದ್ದು, ಭಾರತದಲ್ಲಿ ಮದ್ಯದ ಬಾಟಲಿಗಳ ತಯಾರಿಕಾ ವೆಚ್ಚ ಗಣನೀಯವಾಗಿ ಏರಿಕೆಯಾಗಿದೆ. ಇದರ ಬೆನ್ನಲ್ಲೇ ಮದ್ಯದ ದರಗಳಲ್ಲಿ ಶೇ. 12 ರಿಂದ 15 ರಷ್ಟು ಹೆಚ್ಚಳವಾಗುವ ಸಾಧ್ಯತೆಯಿದೆ ಎಂದು ಉದ್ಯಮದ ಮೂಲಗಳು ಎಚ್ಚರಿಸಿವೆ.
ಬೆಲೆ ಏರಿಕೆಗೆ ಮುಖ್ಯ ಕಾರಣಗಳೇನು?
1. ಗಾಜಿನ ಬಾಟಲಿಗಳ ತಯಾರಿಕಾ ವೆಚ್ಚ ಹೆಚ್ಚಳ: ಮದ್ಯದ ತಯಾರಿಕೆಗಿಂತ ಅದರ ಪ್ಯಾಕೇಜಿಂಗ್ ವೆಚ್ಚವೇ ಕಂಪನಿಗಳಿಗೆ ಈಗ ಹೊರೆಯಾಗುತ್ತಿದೆ. ಮದ್ಯದ ಬಾಟಲಿಗಳನ್ನು ತಯಾರಿಸಲು ಗಾಜಿನ ಫರ್ನೇಸ್ಗಳನ್ನು (ಕುಲುಮೆ) ನಿರಂತರವಾಗಿ ಉರಿಸಬೇಕಾಗುತ್ತದೆ, ಇದಕ್ಕೆ ನೈಸರ್ಗಿಕ ಅನಿಲ (Gas) ಅತ್ಯಗತ್ಯ. ಭಾರತವು ತನ್ನ ಅನಿಲದ ಅಗತ್ಯಕ್ಕಾಗಿ ಸುಮಾರು 40% ರಷ್ಟು ಕತಾರ್ ದೇಶದ ಮೇಲೆ ಅವಲಂಬಿತವಾಗಿದೆ. ಆದರೆ ಅಮೆರಿಕ, ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧದ ಕಾರಣದಿಂದಾಗಿ ಅನಿಲ ಪೂರೈಕೆಗೆ ಅಡ್ಡಿಯುಂಟಾಗಿದೆ.
2. ಪ್ಯಾಕೇಜಿಂಗ್ ಪಾಲು:
- ಬೀರ್: ಬೀರ್ ತಯಾರಿಕೆಯಲ್ಲಿ ಪ್ಯಾಕೇಜಿಂಗ್ ಪಾಲು ಶೇ. 40 ರಷ್ಟಿದೆ.
- ಸ್ಪಿರಿಟ್ಸ್ (ವಿಸ್ಕಿ, ಬ್ರಾಂಡಿ ಇತ್ಯಾದಿ): ಇದರಲ್ಲಿ ಪ್ಯಾಕೇಜಿಂಗ್ ಪಾಲು ಶೇ. 20 ರಷ್ಟಿದೆ. ಗ್ಯಾಸ್ ಕೊರತೆ ಮತ್ತು ವಾಣಿಜ್ಯ ಸಿಲಿಂಡರ್ ಬೆಲೆ ಏರಿಕೆಯಿಂದಾಗಿ ಗಾಜಿನ ಬಾಟಲಿಗಳ ಬೆಲೆ ಈಗಾಗಲೇ ಶೇ. 15-20 ರಷ್ಟು ಹೆಚ್ಚಾಗಿದೆ ಎಂದು ಇಂಡಿಯನ್ ಮಾಲ್ಟ್ ವಿಸ್ಕಿ ಅಸೋಸಿಯೇಷನ್ ತಿಳಿಸಿದೆ.
3. ಶಿಪ್ಪಿಂಗ್ ಮತ್ತು ಕಚ್ಚಾ ವಸ್ತುಗಳ ಬೆಲೆ: ಸಾರಿಗೆ ವೆಚ್ಚ (Shipping charges) ಹೆಚ್ಚಾಗಿರುವುದರಿಂದ ಮದ್ಯದ ಬೆಲೆಯನ್ನು ಹೆಚ್ಚುವರಿಯಾಗಿ ಶೇ. 10-15 ರಷ್ಟು ಹೆಚ್ಚಿಸಲು ಕಂಪನಿಗಳು ಬೇಡಿಕೆ ಇಟ್ಟಿವೆ. ಇದರ ಜೊತೆಗೆ ಅಲ್ಯೂಮಿನಿಯಂ ಬೆಲೆಯೂ ಶೇ. 15 ರಷ್ಟು ಏರಿಕೆಯಾಗಿರುವುದು ಪರಿಸ್ಥಿತಿಯನ್ನು ಮತ್ತಷ್ಟು ಕಠಿಣಗೊಳಿಸಿದೆ.
ಬೇಸಿಗೆಯಲ್ಲಿ ಪೂರೈಕೆ ಕೊರತೆ ಭೀತಿ:
ಗ್ಯಾಸ್ ಪೂರೈಕೆಯ ತೊಂದರೆ ಹೀಗೆಯೇ ಮುಂದುವರಿದರೆ ಗಾಜಿನ ಕುಲುಮೆಗಳು ಪೂರ್ಣ ಪ್ರಮಾಣದಲ್ಲಿ ಕೆಲಸ ಮಾಡಲು ಸಾಧ್ಯವಾಗುವುದಿಲ್ಲ. ಇದರಿಂದ ಬಾಟಲಿಗಳ ಕೊರತೆ ಉಂಟಾಗಿ, ಬೇಸಿಗೆಯಲ್ಲಿ ಹೆಚ್ಚಾಗುವ ಬೇಡಿಕೆಗೆ ತಕ್ಕಂತೆ ಮದ್ಯ ಪೂರೈಕೆ ಮಾಡಲು ಸಾಧ್ಯವಾಗದಿರಬಹುದು ಎಂದು ಮಾರುಕಟ್ಟೆ ತಜ್ಞರು ಎಚ್ಚರಿಸಿದ್ದಾರೆ. ಒಟ್ಟಾರೆಯಾಗಿ, ಈ ಬೇಸಿಗೆಯಲ್ಲಿ ತಂಪಾಗಿ ‘ಚಿಲ್’ ಆಗೋಣ ಅಂದುಕೊಂಡಿದ್ದ ಮದ್ಯಪ್ರಿಯರ ಜೇಬಿಗೆ ಕತ್ತರಿ ಬೀಳುವುದು ಮಾತ್ರ ಗ್ಯಾರಂಟಿ ಎನ್ನಲಾಗುತ್ತಿದೆ.
