ಆರೋಗ್ಯವಾಗಿರಲು ಗಂಟೆಗಟ್ಟಲೆ ಜಿಮ್‌ನಲ್ಲಿ ಕಳೆಯಬೇಕು ಅಥವಾ ಕಠಿಣ ಆಹಾರ ನಿಯಮಗಳನ್ನು ಪಾಲಿಸಬೇಕು ಎಂದು ಅನೇಕರು ಭಯಪಡುತ್ತಾರೆ. ಆದರೆ, ಇತ್ತೀಚಿನ ಸಂಶೋಧನೆಗಳು ಇದಕ್ಕೆ ಭಿನ್ನವಾದ ಮತ್ತು ಎಂತವರಿಗೂ ಪ್ರೋತ್ಸಾಹ ನೀಡುವ ಸುದ್ದಿಯನ್ನು ನೀಡಿವೆ. ನಮ್ಮ ದೈನಂದಿನ ಜೀವನದಲ್ಲಿ ನಾವು ಮಾಡಿಕೊಳ್ಳುವ ಅತ್ಯಂತ ಸಣ್ಣ ಬದಲಾವಣೆಗಳು, ಅಂದರೆ ಕೇವಲ 4.5 ನಿಮಿಷಗಳ ಕಾಲ ಹೆಚ್ಚುವರಿಯಾಗಿ ವೇಗವಾಗಿ ನಡೆಯುವುದು ಹೃದಯಾಘಾತದ ಅಪಾಯವನ್ನು ಗಣನೀಯವಾಗಿ ಕಡಿಮೆ ಮಾಡುತ್ತದೆ ಎಂದು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ.
ಆಸ್ಟ್ರೇಲಿಯಾ, ಚಿಲಿ ಮತ್ತು ಬ್ರೆಜಿಲ್ ದೇಶಗಳ ತಜ್ಞರು ಸುಮಾರು 53,000 ಜನರ ಮೇಲೆ 8 ವರ್ಷಗಳ ಕಾಲ ನಡೆಸಿದ ಈ ಅಂತರಾಷ್ಟ್ರೀಯ ಅಧ್ಯಯನವು ಅನೇಕ ಆಸಕ್ತಿದಾಯಕ ವಿಷಯಗಳನ್ನು ಬಹಿರಂಗಪಡಿಸಿದೆ. ಭಾರಿ ಬದಲಾವಣೆಗಳಿಗಿಂತ, ನಾವು ನಿರಂತರವಾಗಿ ಪಾಲಿಸಬಹುದಾದ ಸಣ್ಣ ಬದಲಾವಣೆಗಳೇ ಹೃದಯಕ್ಕೆ ‘ಶ್ರೀರಾಮರಕ್ಷೆ’ ಎಂದು ಯೂರೋಪಿಯನ್ ಜರ್ನಲ್ ಆಫ್ ಪ್ರಿವೆಂಟಿವ್ ಕಾರ್ಡಿಯಾಲಜಿ ಸ್ಪಷ್ಟಪಡಿಸಿದೆ.
ಹೃದಯಾಘಾತದ ಅಪಾಯವನ್ನು 10% ರಷ್ಟು ಕಡಿಮೆ ಮಾಡುವ ‘3 ಸ್ಮಾರ್ಟ್’ ಬದಲಾವಣೆಗಳು:
- ನಿದ್ರೆ: ರಾತ್ರಿ ವೇಳೆ ಕೇವಲ 11 ನಿಮಿಷಗಳ ಕಾಲ ಹೆಚ್ಚುವರಿಯಾಗಿ ನಿದ್ರಿಸುವುದು. (ಒಟ್ಟಾರೆಯಾಗಿ 8 ರಿಂದ 9 ಗಂಟೆಗಳ ನಿದ್ರೆ ಆದರ್ಶಪ್ರಾಯ).
- ನಡಿಗೆ: ದೈನಂದಿನ ಕೆಲಸಗಳ ನಡುವೆ ಕೇವಲ 4.5 ನಿಮಿಷಗಳ ಕಾಲ ವೇಗವಾಗಿ ನಡೆಯುವುದು (Brisk Walking).
- ಆಹಾರ: ಪ್ರತಿದಿನ ಹೆಚ್ಚುವರಿಯಾಗಿ ಒಂದು ಕಾಲು ಕಪ್ ತರಕಾರಿಗಳನ್ನು ಸೇವಿಸುವುದು.
ತಜ್ಞರ ವಿಶ್ಲೇಷಣೆ:
ಸಿಡ್ನಿ ವಿಶ್ವವಿದ್ಯಾಲಯದ ಡಾ. ನಿಕೋಲಸ್ ಕೋಮೆಲ್ ಅವರ ಪ್ರಕಾರ, ಒಂದೇ ಬಾರಿಗೆ ದೊಡ್ಡ ಬದಲಾವಣೆಗಳನ್ನು ಮಾಡಲು ಪ್ರಯತ್ನಿಸಿ ವಿಫಲವಾಗುವುದಕ್ಕಿಂತ, ಇಂತಹ ಸಣ್ಣ ಬದಲಾವಣೆಗಳನ್ನು ರೂಢಿಸಿಕೊಳ್ಳುವುದು ಸುಲಭ ಮತ್ತು ಹೆಚ್ಚು ಕಾಲ ಮುಂದುವರಿಸಬಹುದು. ಇವೆಲ್ಲವೂ ಸೇರಿ ಹೃದಯದ ಮೇಲೆ ಅದ್ಭುತವಾದ ಧನಾತ್ಮಕ ಪರಿಣಾಮ ಬೀರುತ್ತವೆ.
ಯಾವ ವ್ಯಾಯಾಮಗಳು ಉತ್ತಮ? (NHS ಮಾರ್ಗಸೂಚಿಗಳು):
- ಮಧ್ಯಮ ವ್ಯಾಯಾಮ (Moderate): ವೇಗವಾಗಿ ನಡೆಯುವುದು, ಡ್ಯಾನ್ಸ್ ಮಾಡುವುದು, ಸೈಕ್ಲಿಂಗ್, ವಾಟರ್ ಏರೋಬಿಕ್ಸ್.
- ತೀವ್ರ ವ್ಯಾಯಾಮ (Vigorous): ರನ್ನಿಂಗ್, ಸ್ವಿಮ್ಮಿಂಗ್, ಸ್ಕಿಪ್ಪಿಂಗ್ (ಹಗ್ಗದಾಟ), ಏರೋಬಿಕ್ಸ್.
ಕಚೇರಿಯಲ್ಲಿ ಲಿಫ್ಟ್ ಬದಲಿಗೆ ಮೆಟ್ಟಿಲುಗಳನ್ನು ಹತ್ತುವುದು ಅಥವಾ ಬಸ್ ಸ್ಟಾಪ್‌ನಿಂದ ಮನೆಗೆ ವೇಗವಾಗಿ ನಡೆಯುವ ಮೂಲಕ ಆ 4.5 ನಿಮಿಷಗಳ ಗುರಿಯನ್ನು ಸುಲಭವಾಗಿ ತಲುಪಬಹುದು.
ಗಮನಿಸಿ: ಇದು ಕೇವಲ ಮಾಹಿತಿಗಾಗಿ ಮಾತ್ರ. ಹೃದಯ ಸಂಬಂಧಿ ಸಮಸ್ಯೆ ಇರುವವರು ಹೊಸ ವ್ಯಾಯಾಮಗಳನ್ನು ಪ್ರಾರಂಭಿಸುವ ಮೊದಲು ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.
