ರೈಲ್ವೆ ನಿಲ್ದಾಣಗಳು ಕೇವಲ ಪ್ರಯಾಣಿಕರ ಸಂಚಾರದ ತಾಣಗಳಷ್ಟೇ ಅಲ್ಲ, ಹಲವು ಭಾವನಾತ್ಮಕ ವಿದಾಯ ಮತ್ತು ಪುನರ್ಮಿಲನದ ವೇದಿಕೆಗಳೂ ಹೌದು. ಹೆತ್ತವರು ತಮ್ಮ ಮಕ್ಕಳನ್ನು ದೂರದ ಊರುಗಳಿಗೆ ಕಳುಹಿಸಿಕೊಡಲು ನಿಲ್ದಾಣಕ್ಕೆ ಬಂದಾಗ ಅಲ್ಲಿ ಮಡುಗಟ್ಟುವ ಪ್ರೀತಿ-ವಾತ್ಸಲ್ಯಕ್ಕೆ ಬೆಲೆ ಕಟ್ಟಲು ಸಾಧ್ಯವಿಲ್ಲ. ಅಂತಹದ್ದೇ ಒಂದು ಅಪರೂಪದ ಹಾಗೂ ಕಣ್ಣು ತೇವಗೊಳಿಸುವ ಮುದ್ದಾದ ಕ್ಷಣವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದು, ಲಕ್ಷಾಂತರ ಜನರ ಮನ ಮುಟ್ಟಿದೆ.
ಖುಷಿ ಸೋಲಂಕಿ ಎಂಬ ಯುವತಿ ತನ್ನ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿರುವ ವಿಡಿಯೋದಲ್ಲಿ ಈ ಭಾವನಾತ್ಮಕ ಕ್ಷಣ ಸೆರೆಯಾಗಿದೆ. ಖುಷಿ ರೈಲು ಹತ್ತಿ ಹೊರಡಲು ಸಜ್ಜಾಗುತ್ತಿದ್ದಾಗ ಆಕೆಯನ್ನು ಬೀಳ್ಕೊಡಲು ತಂದೆ ಮತ್ತು ತಾಯಿ ಇಬ್ಬರೂ ರೈಲ್ವೆ ನಿಲ್ದಾಣಕ್ಕೆ ಬಂದಿದ್ದರು. ಈ ಸುಂದರ ಕ್ಷಣವನ್ನು ನೆನಪಾಗಿಟ್ಟುಕೊಳ್ಳಲು ಮಗಳು ತನ್ನ ಮೊಬೈಲ್ ಕ್ಯಾಮೆರಾದಲ್ಲಿ ಹೆತ್ತವರನ್ನು ರೆಕಾರ್ಡ್ ಮಾಡಲು ಶುರುಮಾಡಿದರೆ, ಅತ್ತ ಕಡೆ ಪ್ಲಾಟ್‌ಫಾರ್ಮ್ ಮೇಲೆ ನಿಂತಿದ್ದ ಆಕೆಯ ತಂದೆಯೂ ತನ್ನ ಮೊಬೈಲ್ ಹೊರತೆಗೆದು ಮಗಳನ್ನೇ ವಿಡಿಯೋ ಮಾಡುತ್ತಿದ್ದರು. ಇಬ್ಬರೂ ಪರಸ್ಪರ ಮುಗುಳ್ನಗುತ್ತಾ ಒಬ್ಬರನ್ನೊಬ್ಬರು ವಿಡಿಯೋ ಮಾಡಿಕೊಳ್ಳುತ್ತಿದ್ದ ಈ ಸರಳ ಹಾಗೂ ಅಪಾರ ಪ್ರೀತಿಯ ದೃಶ್ಯ ನೋಡುಗರ ಕಣ್ಣಾಲಿಗಳನ್ನು ತೇವಗೊಳಿಸುವಂತಿದೆ.
ಈ ಹೃದಯಸ್ಪರ್ಶಿ ವಿಡಿಯೋವನ್ನು ಹಂಚಿಕೊಂಡಿರುವ ಖುಷಿ, “ನನ್ನ ಪೋಷಕರು ನನ್ನನ್ನು ಈ ರೀತಿ ಬೀಳ್ಕೊಡುವುದನ್ನು ನೋಡಿದರೆ, ನಾನೇ ಜಗತ್ತಿನ ಅತಿ ದೊಡ್ಡ ಶ್ರೀಮಂತೆ ಎನಿಸುತ್ತದೆ” ಎಂದು ಬರೆದುಕೊಂಡಿದ್ದಾರೆ. ಹೆತ್ತವರ ನಿಸ್ವಾರ್ಥ ಪ್ರೀತಿ ಹಾಗೂ ಕಾಳಜಿಯ ಮುಂದೆ ಪ್ರಪಂಚದ ಯಾವುದೇ ಆಸ್ತಿ-ಐಶ್ವರ್ಯಗಳೂ ಸಾಟಿಯಿಲ್ಲ ಎಂಬುದನ್ನು ಅವರ ಸಾಲುಗಳು ಧ್ವನಿಸಿವೆ.
ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಈ ವಿಡಿಯೋಗೆ ನೆಟ್ಟಿಗರಿಂದ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ. “ಇಂದು ನಾನು ನೋಡಿದ ಅತ್ಯಂತ ಸುಂದರವಾದ ವಿಡಿಯೋ ಇದು”, “ನೀವು ನಿಜವಾಗಿಯೂ ಜೀವನದಲ್ಲಿ ದೊಡ್ಡ ಸಂಪತ್ತನ್ನು ಗೆದ್ದಿದ್ದೀರಿ” ಹಾಗೂ “ಪೋಷಕರ ಈ ಪ್ರೀತಿಗೆ ಯಾವುದೂ ಸಾಟಿಯಿಲ್ಲ” ಎಂದು ಸಾವಿರಾರು ಬಳಕೆದಾರರು ಕಾಮೆಂಟ್ ಮಾಡುವ ಮೂಲಕ ಅಪ್ಪ-ಮಗಳ ಈ ಬಾಂಧವ್ಯವನ್ನು ಕೊಂಡಾಡಿದ್ದಾರೆ.
