ಪೂರ್ವ-ಮಂಜೂರಾದ ಸಾಲ ನೀಡುವ ಸೌಲಭ್ಯವನ್ನು ಯುಪಿಐನಲ್ಲಿ ಒಳಗೊಳ್ಳುವಂತೆ ಕಾರ್ಯಯೋಜನೆಗಳನ್ನು ತರಲು ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಪ್ರಸ್ತಾವನೆ ಇಟ್ಟಿದೆ.
ಸದ್ಯ ದೇಶದ ಮುಂಚೂಣಿ ಆನ್ಲೈನ್ ಪಾವತಿ ಪ್ಲಾಟ್‌ಫಾರಂ ಆಗಿರುವ ಯುಪಿಐ ಅನೇಕ ಸೌಲಭ್ಯಗಳನ್ನು ಕೊಡಮಾಡುತ್ತಿದೆ. ಭಾರತದ ಡಿಜಿಟಲ್ ಪಾವತಿಗಳ 75%ನಷ್ಟನ್ನು ಯುಪಿಐ ನಿರ್ವಹಿಸುತ್ತಿದೆ.
“ಠೇವಣಿ ಖಾತೆಗಳೊಂದಿಗೆ ಬ್ಯಾಂಕುಗಳಿಂದ ಪೂರ್ವ-ಮಂಜೂರಾತಿ ಪಡೆದ ಸಾಲಗಳ ವರ್ಗಾವಣೆ ಮಾಡುವ ಸೌಲಭ್ಯವನ್ನು ಸಹ ಯುಪಿಐನಲ್ಲಿ ತರಲು ಉದ್ದೇಶಿಸಲಾಗಿದೆ,” ಎಂದು ಆಅರ್‌ಬಿಐ ಗವರ್ನರ್‌ ಶಕ್ತಿಕಾಂತಾ ದಾಸ್ ತಿಳಿಸಿದ್ದಾರೆ.
ಸರಳವಾಗಿ ಹೇಳುವುದಾದರೆ, ಯುಪಿಐ ಮೂಲಕ ಬ್ಯಾಂಕುಗಳು ನೀಡಿದ ಸಾಲದಲ್ಲಿ ಪಾವತಿ ಮಾಡುವ ಸವಲತ್ತನ್ನು ತರುವ ಆಲೋಚನೆ ಇದಾಗಿದೆ. ಈ ಮೂಲಕ ಭಾರತೀಯ ಮಾರುಕಟ್ಟೆಯಲ್ಲಿ ವಿಶಿಷ್ಟ ಉತ್ಪನ್ನಗಳನ್ನು ಅಭಿವೃದ್ಧಿಪಡಿಸಲು ಸಾಧ್ಯವಾಗಲಿದೆ.
ಸದ್ಯದ ಮಟ್ಟಿಗೆ ಯುಪಿಐ ವ್ಯವಹಾರಗಳು ಬ್ಯಾಂಕುಗಳಲ್ಲಿರುವ ಠೇವಣಿ ಖಾತೆಗಳೊಂದಿಗೆ, ಕೆಲವೊಮ್ಮೆ ವ್ಯಾಲೆಟ್‌ಗಳಂಥ ಪೂರ್ವ-ಪಾವತಿ ಉಪಕರಣಗಳೊಂದಿಗೆ ನಡೆಯುತ್ತಿವೆ. ರೂಪೇ ಕಾರ್ಡ್‌ಗಳನ್ನು ಯುಪಿಐನೊಂದಿಗೆ ಲಿಂಕ್ ಮಾಡಲು ಇತ್ತೀಚೆಗೆ ಅನುಮತಿ ನೀಡಲಾಗಿತ್ತು.
ಭಾರತೀಯ ರಾಷ್ಟ್ರೀಯ ಪಾವತಿ ಸಂಸ್ಥೆ (ಎನ್‌ಪಿಸಿಐ) ಅಭಿವೃದ್ಧಿಪಡಿಸಿರುವ ಯುಪಿಐನೊಂದಿಗೆ 400 ಬ್ಯಾಂಕುಗಳು ಹಾಗೂ ಬ್ಯಾಂಕಿಂಗ್‌ಯೇತರ ಹಣಕಾಸು ಸಂಸ್ಥೆಗಳು ಬೆಸೆದುಕೊಂಡಿವೆ.
