UPI ಬಂದ ಬಳಿಕ ದೇಶದಲ್ಲಿ ಡಿಜಿಟಲ್ ಪಾವತಿಗಳು ದಾಖಲೆ ಮಟ್ಟದಲ್ಲಿ ನಡೆಯುತ್ತಿವೆ. ಹಿಂದೆ ಆನ್ಲೈನ್ ವಹಿವಾಟುಗಳಿಗೆ ಇಂಟರ್ನೆಟ್ ಬ್ಯಾಂಕಿಂಗ್ ಮತ್ತು ಮೊಬೈಲ್ ಬ್ಯಾಂಕಿಂಗ್ ಬಳಸಲಾಗುತ್ತಿತ್ತು. ಆದರೆ UPI ಬಂದ ನಂತರ ಸಣ್ಣ ಅಂಗಡಿಯಿಂದ ಹಿಡಿದು ದೊಡ್ಡ ಮಳಿಗೆಗಳವರೆಗೆ ಎಲ್ಲೆಡೆ QR ಸ್ಕ್ಯಾನರ್ಗಳು ಕಾಣಸಿಗುತ್ತಿವೆ. ಇದರಿಂದ ಕೆಲವೇ ಸೆಕೆಂಡುಗಳಲ್ಲಿ ಸುಲಭವಾಗಿ ಹಣ ವರ್ಗಾವಣೆ ಮಾಡಬಹುದಾಗಿದೆ.
ಇಂದಿನ ದಿನಗಳಲ್ಲಿ ಬಹುತೇಕ ಪ್ರತಿಯೊಬ್ಬರ ಕೈಯಲ್ಲೂ ಮೊಬೈಲ್ ಇದೆ. ಹೆಚ್ಚಿನವರು ಸ್ಮಾರ್ಟ್ಫೋನ್ ಬಳಸುತ್ತಿದ್ದಾರೆ. ಇದರಿಂದ ಬ್ಯಾಂಕಿಂಗ್ ವಹಿವಾಟುಗಳೂ ಕ್ಷಣಾರ್ಧದಲ್ಲಿ ಪೂರ್ಣಗೊಳ್ಳುತ್ತವೆ. ಯಾರಿಗಾದರೂ ಹಣ ಕಳುಹಿಸಬೇಕಾದರೂ ಅಥವಾ ಹಣ ಪಡೆಯಬೇಕಾದರೂ ಪ್ರಕ್ರಿಯೆ ಸುಲಭವಾಗಿದೆ. ಮೊಬೈಲ್ ನಂಬರ್, UPI ID ಅಥವಾ ಬ್ಯಾಂಕ್ ವಿವರಗಳ ಮೂಲಕ ಕೆಲವೇ ಸೆಕೆಂಡುಗಳಲ್ಲಿ ಹಣ ವರ್ಗಾವಣೆ ಮಾಡಬಹುದು.
ಡಿಜಿಟಲ್ ಪಾವತಿಗಳ ಜೊತೆಗೆ ಹಣ ವರ್ಗಾವಣೆ ಮಾಡಲು UPI, NEFT, RTGS, IMPS ಸೇರಿದಂತೆ ಹಲವು ವಿಧಾನಗಳು ಪ್ರಸ್ತುತ ಲಭ್ಯವಿವೆ. ಇವೆಲ್ಲವೂ RBI ನಿಯಮಗಳ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತವೆ. RBI ಕಾಲಕಾಲಕ್ಕೆ ಇವುಗಳನ್ನು ಮೇಲ್ವಿಚಾರಣೆ ಮಾಡುತ್ತಿದ್ದು, ಅಗತ್ಯಕ್ಕೆ ಅನುಗುಣವಾಗಿ ನಿಯಮಗಳಲ್ಲಿ ಬದಲಾವಣೆ ಹಾಗೂ ಹೊಸ ಮಾರ್ಗಸೂಚಿಗಳನ್ನು ಜಾರಿಗೆ ತರುತ್ತದೆ.
ಆದರೆ ಡಿಜಿಟಲ್ ಪಾವತಿ ಮಾಡುವಾಗ ಕೆಲವೊಮ್ಮೆ ನಾವು ಮಾಡುವ ಸಣ್ಣ ತಪ್ಪುಗಳಿಂದ ಹಣ ಕಳೆದುಕೊಳ್ಳುವ ಅಪಾಯವಿದೆ. ಕೆಲ ಸಂದರ್ಭಗಳಲ್ಲಿ ತಪ್ಪಾಗಿ ವರ್ಗಾವಣೆಯಾದ ಹಣ ಮರಳಿ ಸಿಗದೇ ಇರಬಹುದು. ಹೀಗಾಗಿ ಡಿಜಿಟಲ್ ಪಾವತಿಗಳ ಕುರಿತು RBI ಬ್ಯಾಂಕ್ ಖಾತೆದಾರರಿಗೆ ಪ್ರಮುಖ ಸೂಚನೆ ನೀಡಿದೆ. ಪ್ರತಿ ಬಾರಿ ಡಿಜಿಟಲ್ ಪಾವತಿ ಮಾಡುವ ಮೊದಲು ಈ ಎರಡು ವಿಷಯಗಳನ್ನು ಕಡ್ಡಾಯವಾಗಿ ಪರಿಶೀಲಿಸಬೇಕು.
1. ಹಣ ಯಾರಿಗೆ ಕಳುಹಿಸುತ್ತಿದ್ದೀರಿ ಎಂಬುದನ್ನು ಪರಿಶೀಲಿಸಿ
ನೀವು ಹಣ ಕಳುಹಿಸಲು ಉದ್ದೇಶಿಸಿರುವ ವ್ಯಕ್ತಿಯ ಹೆಸರನ್ನು ಒಂದಕ್ಕಿಂತ ಹೆಚ್ಚು ಬಾರಿ ಪರಿಶೀಲಿಸಿ. ಅವರ ಮೊಬೈಲ್ ನಂಬರ್ ಅಥವಾ UPI IDಯನ್ನೂ ಖಚಿತಪಡಿಸಿಕೊಳ್ಳಿ.
ಕೆಲವೊಮ್ಮೆ ಆತುರದಲ್ಲಿ ಅಥವಾ ತಪ್ಪಾಗಿ ಒಬ್ಬರಿಗೆ ಹಣ ಕಳುಹಿಸಲು ಹೋಗಿ ಮತ್ತೊಬ್ಬರಿಗೆ ವರ್ಗಾವಣೆಯಾಗುವ ಸಾಧ್ಯತೆಯಿದೆ. ತಪ್ಪು ವ್ಯಕ್ತಿಯ ಖಾತೆಗೆ ಹಣ ಹೋದರೆ ಅದನ್ನು ಮರಳಿ ಪಡೆಯುವುದು ಕಷ್ಟವಾಗಬಹುದು. ಇದರಿಂದ ಆರ್ಥಿಕ ನಷ್ಟ ಉಂಟಾಗುವ ಸಾಧ್ಯತೆಯಿದೆ.
2. ಹಣದ ಮೊತ್ತವನ್ನು ಸರಿಯಾಗಿ ಪರಿಶೀಲಿಸಿ
ಹಣ ಕಳುಹಿಸುವ ಮೊದಲು ನೀವು ನಮೂದಿಸಿರುವ ಮೊತ್ತವನ್ನೂ ಕಡ್ಡಾಯವಾಗಿ ಪರಿಶೀಲಿಸಿ. ಕೆಲವೊಮ್ಮೆ ತಪ್ಪಾಗಿ ಹೆಚ್ಚುವರಿ ಮೊತ್ತವನ್ನು ನಮೂದಿಸಿದರೆ ಭಾರೀ ನಷ್ಟ ಉಂಟಾಗಬಹುದು.
ಹೀಗಾಗಿ ಪಾವತಿ ಮಾಡುವ ಮುನ್ನ ಸ್ವೀಕರಿಸುವವರ ಹೆಸರು, ಮೊಬೈಲ್ ನಂಬರ್/UPI ID ಹಾಗೂ ಕಳುಹಿಸುವ ಮೊತ್ತವನ್ನು ಮತ್ತೊಮ್ಮೆ ಪರಿಶೀಲಿಸುವುದು ಅತ್ಯಂತ ಮುಖ್ಯ.
ಡಿಜಿಟಲ್ ಪಾವತಿಗಳನ್ನು ಮುಂದುವರಿಸಿ, ಆದರೆ ಸ್ವಲ್ಪ ಎಚ್ಚರಿಕೆಯಿಂದ ವಹಿವಾಟು ನಡೆಸಿ ಎಂದು RBI ಸಲಹೆ ನೀಡಿದೆ.
