ಪ್ಯಾರಿಸ್ : ಜಾಗತಿಕ ರಾಜತಾಂತ್ರಿಕ ಅಖಾಡದಲ್ಲಿ ಭಾರತದ ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರ ಇಮೇಜ್ ಮತ್ತೊಮ್ಮೆ ಜಗತ್ತೇ ತಿರುಗಿ ನೋಡುವಂತೆ ಮಾಡಿದೆ. ಫ್ರಾನ್ಸ್ನ ಎವಿಯನ್-ಲೆ-ಬೈನ್ಸ್ನಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ ಜಿ7 (G7) ಶೃಂಗಸಭೆಯ ವೇದಿಕೆಯಲ್ಲಿ ಪ್ರಧಾನಿ ಮೋದಿ ಹಾಗೂ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (Donald Trump) ಅವರ ನಡುವೆ 16 ತಿಂಗಳ ಬಳಿಕ ಅತ್ಯಂತ ಮಹತ್ವದ ದ್ವಿಪಕ್ಷೀಯ ಮಾತುಕತೆ ನಡೆದಿದೆ. ಈ ಭೇಟಿಯ ಬೆನ್ನಲ್ಲೇ ಮಾಧ್ಯಮಗಳ ಎದುರು ಪ್ರಧಾನಿ ಮೋದಿ ವ್ಯಕ್ತಿತ್ವ ಮತ್ತು ಅವರ ಚಾಣಾಕ್ಷ ನಡೆಯನ್ನು ಟ್ರಂಪ್ ಹೊಗಳಿರುವ ಶೈಲಿ ಈಗ ಇಂಟರ್ನೆಟ್ನಲ್ಲಿ ವೈರಲ್ ಆಗುತ್ತಿದೆ
“ಮೋದಿ ನೋಡಲು ದೇವದೂತನಂತೆ, ಆದ್ರೆ ವ್ಯಾಪಾರದಲ್ಲಿ ಟಫ್”
ದ್ವಿಪಕ್ಷೀಯ ಮಾತುಕತೆ ಮುಗಿದ ನಂತರ ಪ್ರಧಾನಿ ಮೋದಿ ಎದುರೇ ಜಂಟಿ ಮಾಧ್ಯಮ ಗೋಷ್ಠಿಯಲ್ಲಿ ಮಾತನಾಡಿದ ಡೊನಾಲ್ಡ್ ಟ್ರಂಪ್, ಮೋದಿಯವರ ವರ್ಕಿಂಗ್ ಸ್ಟೈಲ್ ಬಗ್ಗೆ ತಮ್ಮದೇ ದಾಟಿಯಲ್ಲಿ ತಮಾಷೆ ಮಾಡುತ್ತಾ ಭರ್ಜರಿ ಶ್ಲಾಘನೆ ವ್ಯಕ್ತಪಡಿಸಿದರು:
ಆಕರ್ಷಕ ವ್ಯಕ್ತಿತ್ವ: “ಪ್ರಧಾನಿ ಮೋದಿ ನೋಡಲು ಅತ್ಯಂತ ಸುಂದರ ಹಾಗೂ ಆಕರ್ಷಕ ವ್ಯಕ್ತಿ. ಅವರ ಲುಕ್ ಎಷ್ಟು ಚೆನ್ನಾಗಿದೆ ಎಂದರೆ ಅವರು ನನಗೆ ಒಬ್ರು ಏಂಜಲ್ (ದೇವದೂತ) ತರ ಕಾಣಿಸುತ್ತಾರೆ. ಹೊರಗಿನಿಂದ ನೋಡಲು ತುಂಬಾ ಶಾಂತ ಮತ್ತು ಸಂಯಮಶೀಲರಾಗಿ ಕೂಲ್ ಆಗಿ ಇರುತ್ತಾರೆ” ಎಂದು ಟ್ರಂಪ್ ಬಣ್ಣಿಸಿದರು.
ನೆಗೋಷಿಯೇಷನ್ನಲ್ಲಿ ಕಿಲ್ಲರ್: ಇಷ್ಟೇ ಹೇಳಿ ನಿಲ್ಲಿಸದ ಟ್ರಂಪ್, “ಆದರೆ ದ್ವಿಪಕ್ಷೀಯ ಮಾತುಕತೆ, ವ್ಯಾಪಾರ-ವ್ಯವಹಾರ ಮತ್ತು ಟ್ರೇಡ್ ಡೀಲ್ ವಿಚಾರಕ್ಕೆ ಬಂದರೆ ಮೋದಿ ಅತ್ಯಂತ ಕಠಿಣ ಮತ್ತು ಕಠೋರ ವ್ಯಕ್ತಿ. ಅವರು ಅತ್ಯಂತ ಚಾಣಾಕ್ಷ ಸಂಧಾನಕಾರ (Tough Negotiator). ದೇಶದ ಹಿತಾಸಕ್ತಿಯ ನಿರ್ಧಾರ ತೆಗೆದುಕೊಳ್ಳುವಾಗ ಅವರು ಜಗ್ಗುವುದಿಲ್ಲ, ಮಣಿಯುವುದಿಲ್ಲ; ಆ ವಿಚಾರದಲ್ಲಿ ಅವರು ಪಕ್ಕಾ ಕಿಲ್ಲರ್ (Total Killer) ಎಂದು ಮುಕ್ತವಾಗಿ ಒಪ್ಪಿಕೊಂಡಿದ್ದಾರೆ.
ವಿಶ್ವದ ಹಲವು ರಾಷ್ಟ್ರಗಳ ನಾಯಕರ ಜೊತೆ ಡೀಲ್ ಮಾಡಿದ್ದೇನೆ, ಆದರೆ ಮೋದಿಯಷ್ಟು ಟಫ್ ಯಾರೂ ಇಲ್ಲ ಎಂದು ಹೇಳಿದ ಟ್ರಂಪ್, ಭಾರತದೊಂದಿಗಿನ ಸ್ನೇಹವನ್ನು ಮತ್ತೊಮ್ಮೆ ಜಗತ್ತಿಗೆ ಸಾರಿದ್ದಾರೆ. “ನಾನು ಅಧ್ಯಕ್ಷನಾಗಿರುವವರೆಗೆ ಭಾರತಕ್ಕೆ ಶ್ವೇತಭವನದಲ್ಲಿ (White House) ಒಬ್ಬ ಅತ್ಯುತ್ತಮ ಸ್ನೇಹಿತನಿದ್ದಾನೆ. ಜಿ7ನಲ್ಲಿರುವ ಪ್ರತಿಯೊಬ್ಬರೂ ಭಾರತವನ್ನು ಪ್ರೀತಿಸುತ್ತಾರೆ ಮತ್ತು ಮೋದಿಯವರ ಬಗ್ಗೆ ಅಪಾರ ಗೌರವ ಹೊಂದಿದ್ದಾರೆ. ಭಾರತದ ಮೇಲೆ ಯಾವುದೇ ದಾಳಿ ನಡೆದರೂ ಅಮೆರಿಕ ಬೆಂಬಲವಾಗಿ ನಿಲ್ಲುತ್ತದೆ” ಎಂದು ದೊಡ್ಡ ಭರವಸೆ ನೀಡಿದ್ದಾರೆ.
ಹಾರ್ಮುಜ್ ಜಲಸಂಧಿ ವಿವಾದ ಹಾಗೂ ಭಾರತೀಯ ನಾವಿಕರ ಸುರಕ್ಷತೆಗೆ ಮೋದಿ ಖಡಕ್ ಸಂದೇಶ
ಈ ದ್ವಿಪಕ್ಷೀಯ ಮಾತುಕತೆಯಲ್ಲಿ ಕೇವಲ ಹೊಗಳಿಕೆ ಮಾತ್ರವಲ್ಲದೆ, ಇತ್ತೀಚಿನ ಅಮೆರಿಕ-ಇರಾನ್ ಸಂಘರ್ಷದ ಹಿನ್ನೆಲೆಯಲ್ಲಿ ಜಾಗತಿಕ ಸಮುದ್ರ ಮಾರ್ಗಗಳಲ್ಲಿ ಸಿಲುಕಿರುವ ಸಾವಿರಾರು ಭಾರತೀಯ ನಾವಿಕರ ಸುರಕ್ಷತೆಯ ಬಗ್ಗೆ ಪ್ರಧಾನಿ ಮೋದಿ ಅತ್ಯಂತ ಕಠಿಣ ನಿಲುವನ್ನು ಟ್ರಂಪ್ ಎದುರು ಮಂಡಿಸಿದರು.
ವಿವಿಧ ಸಮುದ್ರ ಮಾರ್ಗಗಳಲ್ಲಿ ಸಾವಿರಾರು ಭಾರತೀಯ ನಾವಿಕರು ಕೆಲಸ ಮಾಡುತ್ತಿದ್ದಾರೆ. ಅವರ ಜೀವಗಳನ್ನು ಯಾರೂ ಕೇವಲವಾಗಿ ನೋಡಬಾರದು. ನಾವಿಕರ ಮೇಲಿನ ದಾಳಿಯನ್ನು ಭಾರತ ತೀವ್ರವಾಗಿ ಖಂಡಿಸುತ್ತದೆ ಮತ್ತು ಅವರ ರಕ್ಷಣೆ ನಮಗೆ ಪ್ರಮುಖ ಆದ್ಯತೆ” ಎಂದು ಮೋದಿ ಖಡಕ್ ಆಗಿ ಹೇಳಿದರು. ಇದಕ್ಕೆ ಸ್ಪಂದಿಸಿದ ಟ್ರಂಪ್, “ಹಾರ್ಮುಜ್ ಜಲಸಂಧಿ (Strait of Hormuz) ಶೀಘ್ರದಲ್ಲೇ ಶಾಂತವಾಗಲಿದೆ, ನಾವಿಕರ ಸುರಕ್ಷತೆಗೆ ಅಮೆರಿಕ ಬದ್ಧವಾಗಿದೆ” ಎಂದು ಭರವಸೆ ನೀಡಿದರು.
