ಈಜಲು ಹೋದಾಗಲೇ ದುರಂತ: ಕೆರೆಯಲ್ಲಿ ಮುಳುಗಿ ಇಬ್ಬರು ಬಾಲಕರು ಸಾವು

ಬೆಂಗಳೂರು: ಈಜಲು ಹೋಗಿದ್ದ ಇಬ್ಬರು ಬಾಲಕರು ಕೆರೆಯಲ್ಲಿ ಮುಳುಗಿ ಮೃತಪಟ್ಟ ಘಟನೆ ಯಲಹಂಕ ಹೆಸರುಘಟ್ಟ ಹೋಬಳಿಯ ಬ್ಯಾತ ಸೀರೇಸಂದ್ರ ಗ್ರಾಮದಲ್ಲಿ ಭಾನುವಾರ ನಡೆದಿದೆ.

ಪುಟ್ಟರಾಜು ಮತ್ತು ಮಂಜುಳಾ ಅವರ ಪುತ್ರ ಮನೋಜ್(9), ಮುನಿರಾಜು ಮತ್ತು ವೆಂಕಟಮ್ಮ ಅವರ ಪುತ್ರ ಮೋಹನ್(11) ಮೃತಪಟ್ಟ ಬಾಲಕರು. ಮನೋಜ್ ಹೆಸರುಘಟ್ಟದ ಜ್ಯೋತಿ ವಿದ್ಯಾಲಯದಲ್ಲಿ ಮೂರನೇ ತರಗತಿ ಓದುತ್ತಿದ್ದ. ಮೋಹನ್ ಬ್ಯಾತ ಸರ್ಕಾರಿ ಶಾಲೆಯಲ್ಲಿ ಐದನೇ ತರಗತಿ ಓದುತ್ತಿದ್ದ. ಭಾನುವಾರ ರಜೆ ಇದ್ದ ಕಾರಣ ಮೋಹನ್ ಮತ್ತು ಮನೋಜ್ ಸ್ನೇಹಿತರೊಂದಿಗೆ ಗ್ರಾಮದ ಪಕ್ಕದಲ್ಲಿರುವ ಕೆರೆಯಲ್ಲಿ ಈಜಲು ಹೋಗಿದ್ದಾರೆ. ಈ ವೇಳೆ ಅವರು ಹತ್ತರಿಂದ ಹದಿನೈದು ಅಡಿ ಆಳದ ಗುಂಡಿಯ ಕಡೆಗೆ ಹೋಗಿದ್ದು ನೀರಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ ಎನ್ನಲಾಗಿದೆ.