ಇಂದಿನ ಡಿಜಿಟಲ್ ಕಾಲದಲ್ಲಿ ಪ್ರತಿಯೊಂದಕ್ಕೂ ಸೋಶಿಯಲ್ ಮೀಡಿಯಾ ಅವಲಂಬಿತರಾಗುವುದು ಸಾಮಾನ್ಯವಾಗಿದೆ. ಅದರಲ್ಲೂ ಆರೋಗ್ಯ ಮತ್ತು ಫಿಟ್ನೆಸ್ಗೆ ಸಂಬಂಧಿಸಿದಂತೆ ಇಂಟರ್ನೆಟ್ನಲ್ಲಿ ಹರಿದಾಡುವ ಸಲಹೆಗಳಿಗೆ ಮಿತಿಯೇ ಇಲ್ಲ. ಆದರೆ, ಇಂತಹ ಮಾಹಿತಿಗಳನ್ನು ಕಣ್ಣು ಮುಚ್ಚಿ ನಂಬುವುದು ಎಷ್ಟು ಅಪಾಯಕಾರಿ ಎಂಬ ಬಗ್ಗೆ ಅಮೆರಿಕದ ತಜ್ಞರು ಮಹತ್ವದ ಎಚ್ಚರಿಕೆ ನೀಡಿದ್ದಾರೆ.
ಸಂಶೋಧನೆ ಹೇಳುವುದೇನು? ಪ್ಯೂ ರಿಸರ್ಚ್ ಸೆಂಟರ್ ನಡೆಸಿದ ಸಮೀಕ್ಷೆಯ ಪ್ರಕಾರ, ಅಮೆರಿಕದ 10 ವಯಸ್ಕರಲ್ಲಿ ನಾಲ್ವರು ತಮ್ಮ ಆರೋಗ್ಯದ ಮಾಹಿತಿಗಾಗಿ ಸೋಶಿಯಲ್ ಮೀಡಿಯಾ ಅಥವಾ ಪಾಡ್ಕಾಸ್ಟ್ಗಳನ್ನು ಅವಲಂಬಿಸಿದ್ದಾರೆ. ಇದರಲ್ಲಿ 50 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರ ಸಂಖ್ಯೆಯೇ ಅಧಿಕವಾಗಿದೆ. ಸಂಶೋಧಕರು ಸುಮಾರು 6,828 ಪ್ರಭಾವಿ ಆರೋಗ್ಯ ಪ್ರೇರಕರ (Influencers) ಪ್ರೊಫೈಲ್ಗಳನ್ನು ಪರಿಶೀಲಿಸಿದಾಗ ಅಚ್ಚರಿಯ ವಿಷಯ ಬೆಳಕಿಗೆ ಬಂದಿದೆ. ಈ ಪೈಕಿ ಕೇವಲ ಶೇ. 40 ರಷ್ಟು ಮಂದಿ ಮಾತ್ರ ವೃತ್ತಿಪರ ಆರೋಗ್ಯ ತಜ್ಞರಾಗಿದ್ದಾರೆ. ಉಳಿದವರು ಕೇವಲ ತರಬೇತುದಾರರು ಅಥವಾ ತಮ್ಮ ಜೀವನದ ಅನುಭವವನ್ನೇ ಅರ್ಹತೆ ಎಂದು ನಂಬಿದವರಾಗಿದ್ದಾರೆ.
ತಜ್ಞರ ಸಲಹೆ ಏನು? ಲಕ್ಷಾಂತರ ಫಾಲೋವರ್ಸ್ ಹೊಂದಿರುವ ಪ್ರಸಿದ್ಧ ಫಿಟ್ನೆಸ್ ತಜ್ಞೆ ಕೋರ್ಟ್ನಿ ಬಾಬಿಲ್ಯಾ ಅವರ ಪ್ರಕಾರ, ಸೋಶಿಯಲ್ ಮೀಡಿಯಾದಲ್ಲಿ ಜನರು ವೈಯಕ್ತಿಕ ಅನುಭವಗಳನ್ನು ಹಂಚಿಕೊಳ್ಳುವವರಿಗೆ ಬೇಗ ಆಕರ್ಷಿತರಾಗುತ್ತಾರೆ. ಆದರೆ, ಒಬ್ಬ ವ್ಯಕ್ತಿ ತನ್ನ ವೈಯಕ್ತಿಕ ಅನುಭವದಿಂದ ಮಾತನಾಡುತ್ತಿದ್ದಾರೆಯೇ ಅಥವಾ ವೈದ್ಯಕೀಯ ವೃತ್ತಿಪರ ಜ್ಞಾನದಿಂದ ಮಾತನಾಡುತ್ತಿದ್ದಾರೆಯೇ ಎಂಬುದನ್ನು ಗುರುತಿಸುವುದು ಬಹಳ ಮುಖ್ಯ.
ಅಂತೆಯೇ ಥೆರಪಿಸ್ಟ್ ನೆಡ್ರಾ ಗ್ಲೋವರ್ ತವಾಬ್ ಅವರು ಹೇಳುವಂತೆ, ಮಾಹಿತಿ ಪಡೆಯುವುದು ತಪ್ಪಲ್ಲ. ಆದರೆ ಅದನ್ನು ಅಂತಿಮ ಸತ್ಯ ಎಂದು ನಂಬುವ ಮೊದಲು ವೈದ್ಯರೊಂದಿಗೆ ಚರ್ಚಿಸುವುದು ಅನಿವಾರ್ಯ. “ಕೇವಲ ಮಾಹಿತಿ ಸೇವಿಸುತ್ತಾ ಹೋದರೆ ಸಾಲದು, ಅದರಲ್ಲೂ ಮಾನಸಿಕ ಆರೋಗ್ಯದ ವಿಚಾರದಲ್ಲಿ ವೃತ್ತಿಪರರ ಸಲಹೆ ಪಡೆಯದೆ ಯಾವುದೇ ನಿರ್ಧಾರ ತೆಗೆದುಕೊಳ್ಳುವುದು ದೀರ್ಘಕಾಲದ ದೃಷ್ಟಿಯಿಂದ ಒಳ್ಳೆಯದಲ್ಲ” ಎನ್ನುತ್ತಾರೆ ಅವರು.
ಸಲಹೆಗಳನ್ನು ಗುರುತಿಸುವುದು ಹೇಗೆ? ಯಾವುದೇ ವಿಡಿಯೋ ಅಥವಾ ಪೋಸ್ಟ್ನಲ್ಲಿ “ಇದು ಒಂದೇ ಪರಿಹಾರ” ಅಥವಾ “ಇದನ್ನು ಮಾಡಿದರೆ ಸಾಕು ಎಲ್ಲವೂ ವಾಸಿಯಾಗುತ್ತದೆ” ಎಂಬಂತಹ ಅತಿರಂಜಿತ ಮಾತುಗಳಿದ್ದರೆ ಅಂತಹವುಗಳಿಂದ ದೂರವಿರಿ. ಇವು ಕೇವಲ ವೀಕ್ಷಣೆ (Views) ಹೆಚ್ಚಿಸಿಕೊಳ್ಳಲು ಮಾಡುವ ತಂತ್ರಗಳಾಗಿರುತ್ತವೆ. ಬದಲಾಗಿ, “ಇದು ಕೇವಲ ಮಾಹಿತಿ ಮಾತ್ರ, ಹೆಚ್ಚಿನ ಮಾಹಿತಿಗಾಗಿ ವೈದ್ಯರನ್ನು ಸಂಪರ್ಕಿಸಿ” ಎಂಬ ಎಚ್ಚರಿಕೆ ನೀಡುವ ಹಾಗೂ ನಿಸ್ಸಂಕೋಚವಾಗಿ ತಮ್ಮ ಮಿತಿಗಳನ್ನು ಹೇಳಿಕೊಳ್ಳುವ ಮಾಹಿತಿಗಳು ಹೆಚ್ಚು ವಿಶ್ವಾಸಾರ್ಹವಾಗಿರುತ್ತವೆ.
