ದಿ ರಾಕಿ ಹಾರರ್ ಪಿಕ್ಚರ್ ಶೋ’, ‘ಕ್ಲೂ’ ಹಾಗೂ ‘ಆನಿ’ ಸೇರಿದಂತೆ ಹಲವು ಜನಪ್ರಿಯ ಸಿನಿಮಾಗಳಲ್ಲಿನ ಸ್ಮರಣೀಯ ಪಾತ್ರಗಳ ಮೂಲಕ ಖ್ಯಾತಿ ಪಡೆದ ನಟ ಟಿಮ್ ಕರ್ರಿ ತಮ್ಮ 80ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ಲಾಸ್ ಏಂಜಲೀಸ್ನಲ್ಲಿ ಅವರು ಕೊನೆಯುಸಿರೆಳೆದಿದ್ದು, ಅವರ ಬಹುಕಾಲದ ಮ್ಯಾನೇಜರ್ ಹಾಗೂ ಸ್ನೇಹಿತೆ ಮಾರ್ಷಿಯಾ ಹರ್ಟ್ವಿಟ್ಜ್ ಬುಧವಾರ ಈ ಸುದ್ದಿಯನ್ನು ತಿಳಿಸಿದ್ದಾರೆ. ಅವರ ಸಾವಿಗೆ ನಿಖರ ಕಾರಣ ತಕ್ಷಣಕ್ಕೆ ತಿಳಿದುಬಂದಿಲ್ಲ. 2012ರಲ್ಲಿ ಟಿಮ್ ಕರ್ರಿಗೆ ತೀವ್ರ ಪಾರ್ಶ್ವವಾಯು (ಸ್ಟ್ರೋಕ್) ಉಂಟಾಗಿತ್ತು.
ದಶಕಗಳ ಕಾಲ ಚಿತ್ರರಂಗ, ಕಿರುತೆರೆ ಹಾಗೂ ರಂಗಭೂಮಿಯಲ್ಲಿ ಸಕ್ರಿಯರಾಗಿದ್ದ ಟಿಮ್ ಕರ್ರಿ ತಮ್ಮ ವಿಶಿಷ್ಟ ಅಭಿನಯದ ಮೂಲಕ ವಿಶ್ವದಾದ್ಯಂತ ಅಭಿಮಾನಿಗಳನ್ನು ಸಂಪಾದಿಸಿದ್ದರು.
ಅವರ ನಿಧನದ ಸುದ್ದಿ ಹೊರಬಂದ ಬೆನ್ನಲ್ಲೇ, ಅವರೊಂದಿಗೆ ಕೆಲಸ ಮಾಡಿದ್ದ ಹಾಗೂ ಅವರ ಅಭಿನಯವನ್ನು ಮೆಚ್ಚಿದ್ದ ಹಲವು ನಟರು ಮತ್ತು ಚಿತ್ರರಂಗದ ಗಣ್ಯರು ಸಾಮಾಜಿಕ ಜಾಲತಾಣಗಳ ಮೂಲಕ ಭಾವುಕವಾಗಿ ಸ್ಮರಿಸಿದ್ದಾರೆ.
‘ಆನಿ’ ಸಹನಟಿಯಿಂದ ಭಾವುಕ ನಮನ
1982ರ ‘ಆನಿ’ ಚಿತ್ರದಲ್ಲಿ ಟಿಮ್ ಕರ್ರಿ ಅವರೊಂದಿಗೆ ನಟಿಸಿದ್ದ ಕ್ಯಾರೊಲ್ ಬರ್ನೆಟ್, ಇಬ್ಬರು ಒಟ್ಟಿಗೆ ಕೆಲಸ ಮಾಡಿದ್ದ ಸಂದರ್ಭವನ್ನು ನೆನಪಿಸಿಕೊಂಡಿದ್ದಾರೆ. ಚಿತ್ರದಲ್ಲಿನ ತಮ್ಮ ಹಾಗೂ ಟಿಮ್ ಕರ್ರಿ ಅವರ ದೃಶ್ಯದ ವಿಡಿಯೋವನ್ನು ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡ ಅವರು, ಟಿಮ್ ಕರ್ರಿ ಅತ್ಯಂತ ಆತ್ಮೀಯ ಸ್ನೇಹಿತರಾಗಿದ್ದರು ಎಂದು ಸ್ಮರಿಸಿದ್ದಾರೆ.
‘ದಿ ರಾಕಿ ಹಾರರ್ ಪಿಕ್ಚರ್ ಶೋ’ ನಟನಿಗೆ ಗೌರವ
ಬ್ರಾಡ್ವೇಯಲ್ಲಿ ಡಾ. ಫ್ರಾಂಕ್-ಎನ್-ಫರ್ಟರ್ ಪಾತ್ರ ನಿರ್ವಹಿಸಿದ್ದ ಲ್ಯೂಕ್ ಇವಾನ್ಸ್ ಕೂಡ ಟಿಮ್ ಕರ್ರಿಗೆ ಗೌರವ ಸಲ್ಲಿಸಿದ್ದಾರೆ. ಈ ಪಾತ್ರವನ್ನು ಮೊದಲು ರಂಗಭೂಮಿ ಹಾಗೂ 1975ರ ‘ದಿ ರಾಕಿ ಹಾರರ್ ಪಿಕ್ಚರ್ ಶೋ’ ಚಿತ್ರದಲ್ಲಿ ಟಿಮ್ ಕರ್ರಿ ನಿರ್ವಹಿಸಿದ್ದರು.
“ಟಿಮ್ ಕರ್ರಿ ಒಬ್ಬರೇ. ಅವರಂತಹ ಮತ್ತೊಬ್ಬರು ಇರಲಾರರು” ಎಂದು ಇವಾನ್ಸ್ ಭಾವುಕರಾಗಿ ಬರೆದುಕೊಂಡಿದ್ದಾರೆ. ಟಿಮ್ ಅವರ ಪ್ರತಿಭೆ, ಪ್ರಭಾವ, ವಿಶಿಷ್ಟ ಧ್ವನಿ ಮತ್ತು ಅವರು ನಿರ್ವಹಿಸಿದ ಪಾತ್ರಗಳು ತಮ್ಮನ್ನೂ ಸೇರಿದಂತೆ ಅನೇಕರಿಗೆ ಸ್ಫೂರ್ತಿಯಾಗಿದ್ದವು ಎಂದು ಹೇಳಿದ್ದಾರೆ.
ಸುಸಾನ್ ಸರಂಡನ್ರಿಂದ ಭಾವುಕ ವಿದಾಯ
ಟಿಮ್ ಕರ್ರಿ ಅವರೊಂದಿಗೆ ‘ದಿ ರಾಕಿ ಹಾರರ್ ಪಿಕ್ಚರ್ ಶೋ’ನಲ್ಲಿ ನಟಿಸಿದ್ದ ಸುಸಾನ್ ಸರಂಡನ್ ಕೂಡ ಹಳೆಯ ಫೋಟೋವೊಂದನ್ನು ಹಂಚಿಕೊಂಡು ಅವರಿಗೆ ನಮನ ಸಲ್ಲಿಸಿದ್ದಾರೆ.
ಟಿಮ್ ಕರ್ರಿ ತುಂಬಾ ಹಾಸ್ಯಪ್ರಜ್ಞೆಯುಳ್ಳ, ಆಕರ್ಷಕ ಹಾಗೂ ವಿಶಿಷ್ಟ ವ್ಯಕ್ತಿಯಾಗಿದ್ದರು. ಆದರೆ ಅವರಲ್ಲಿ ತಮಗೆ ಅತ್ಯಂತ ಇಷ್ಟವಾಗಿದ್ದು ಅವರ ಹೃದಯವಂತಿಕೆ ಎಂದು ಸರಂಡನ್ ಹೇಳಿದ್ದಾರೆ. ಗಾಲಿಕುರ್ಚಿಗೆ ಸೀಮಿತರಾದ ಬಳಿಕವೂ ಅವರು ತಮ್ಮ ಅಭಿಮಾನಿಗಳೊಂದಿಗೆ ಪ್ರೀತಿಯಿಂದ ಹಾಗೂ ಉದಾರವಾಗಿ ನಡೆದುಕೊಳ್ಳುತ್ತಿದ್ದರು ಎಂದು ಸ್ಮರಿಸಿದ್ದಾರೆ.
“ಅನೇಕರಿಗೆ ಇಷ್ಟೊಂದು ಅರ್ಥಪೂರ್ಣ ವ್ಯಕ್ತಿಯಾಗಿದ್ದಕ್ಕಾಗಿ ಧನ್ಯವಾದಗಳು ಟಿಮ್. ನಿಮ್ಮನ್ನು ಪ್ರೀತಿಸುತ್ತೇನೆ” ಎಂದು ಸುಸಾನ್ ಸರಂಡನ್ ಭಾವುಕ ವಿದಾಯ ಹೇಳಿದ್ದಾರೆ.
