ರಷ್ಯಾದ ರೋಸ್ಟೊವ್-ಆನ್-ಡಾನ್ ನಗರದಲ್ಲಿ ನಡೆಯುತ್ತಿದ್ದ ಸರ್ಕಸ್ ಪ್ರದರ್ಶನದ ವೇಳೆ ಭೀಕರ ಅವಘಡವೊಂದು ಸಂಭವಿಸಿದೆ. ಪ್ರದರ್ಶನದ ಮಧ್ಯೆ ಏಕಾಏಕಿ ಹುಲಿಯೊಂದು ಪ್ರೇಕ್ಷಕರು ಕುಳಿತಿದ್ದ ಜಾಗಕ್ಕೆ ನುಗ್ಗಿದ್ದು, ಅಲ್ಲಿ ನೆರೆದಿದ್ದ ಜನರನ್ನು ಆತಂಕಕ್ಕೆ ತಳ್ಳಿದೆ. ಸುದೈವವಶಾತ್ ಈ ಘಟನೆಯಲ್ಲಿ ಯಾರಿಗೂ ಗಾಯಗಳಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಘಟನೆಯ ವಿವರ: ಸರ್ಕಸ್ ರಿಂಗ್ನಲ್ಲಿ ಇಬ್ಬರು ತರಬೇತುದಾರರ ಸಮ್ಮುಖದಲ್ಲಿ ಮೂರು ಹುಲಿಗಳು ಸಾಹಸ ಪ್ರದರ್ಶನ ನೀಡುತ್ತಿದ್ದವು. ಈ ವೇಳೆ ಪ್ರಾಣಿಗಳು ಮತ್ತು ಪ್ರೇಕ್ಷಕರ ನಡುವೆ ಸುರಕ್ಷತೆಗಾಗಿ ನಿರ್ಮಿಸಲಾಗಿದ್ದ ತಡೆಗೋಡೆ ಅಥವಾ ಬ್ಯಾರಿಯರ್ ಇದ್ದಕ್ಕಿದ್ದಂತೆ ಕುಸಿದು ಬಿದ್ದಿದೆ. ಇದರ ಬೆನ್ನಲ್ಲೇ ಒಂದು ಹುಲಿ ನೇರವಾಗಿ ಪ್ರೇಕ್ಷಕರ ಗ್ಯಾಲರಿಗೆ ಜಿಗಿದಿದೆ. ಈ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿವೆ.
ಹುಲಿ ಆಸನಗಳ ಸಾಲಿನಲ್ಲಿ ಅಡ್ಡಾಡುತ್ತಿದ್ದಂತೆ ಅಲ್ಲಿದ್ದ ಪ್ರೇಕ್ಷಕರು ಭಯಭೀತರಾಗಿ ಓಡಲು ಯತ್ನಿಸಿದ್ದಾರೆ. ಸಣ್ಣ ಮಕ್ಕಳೂ ಸೇರಿದಂತೆ ಕುಟುಂಬ ಸಮೇತ ಬಂದಿದ್ದ ಜನರು ಜೀವ ಭಯದಿಂದ ಕಿರುಚುತ್ತಿರುವುದು ವಿಡಿಯೋದಲ್ಲಿ ಕಂಡುಬಂದಿದೆ. ಕೂಡಲೇ ಎಚ್ಚೆತ್ತ ಸರ್ಕಸ್ ಸಿಬ್ಬಂದಿ, ಮೈಕ್ ಮೂಲಕ ಪ್ರೇಕ್ಷಕರು ಶಾಂತವಾಗಿ ಇರುವಂತೆ ಮನವಿ ಮಾಡಿದ್ದಾರೆ. ಒಂದು ವೇಳೆ ಗಾಬರಿಗೊಂಡು ಕಿರುಚಿದರೆ ಹುಲಿ ಮತ್ತಷ್ಟು ಪ್ರಚೋದನೆಗೊಂಡು ದಾಳಿ ಮಾಡುವ ಸಾಧ್ಯತೆ ಇರುತ್ತದೆ ಎಂದು ಅವರು ಎಚ್ಚರಿಸಿದ್ದಾರೆ.
ನಿಯಂತ್ರಣಕ್ಕೆ ಬಂದ ಪರಿಸ್ಥಿತಿ: ತರಬೇತುದಾರರು ತಕ್ಷಣವೇ ಕಾರ್ಯಪ್ರವೃತ್ತರಾಗಿ ಹುಲಿಯನ್ನು ಹಿಂಬಾಲಿಸಿ, ಅದನ್ನು ಸುರಕ್ಷಿತವಾಗಿ ಸಾರಿಗೆ ಪಂಜರದೊಳಗೆ ಕಳುಹಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಘಟನೆಯ ನಂತರ ರಷ್ಯಾ ಸರ್ಕಾರವು ಸರ್ಕಸ್ ಆಯೋಜಕರ ವಿರುದ್ಧ ಸುರಕ್ಷತಾ ಕ್ರಮಗಳ ಉಲ್ಲಂಘನೆಗಾಗಿ ತನಿಖೆಗೆ ಆದೇಶಿಸಿದೆ.
ಪ್ರಾಣಿ ಪ್ರಿಯರ ಆಕ್ರೋಶ: ಈ ವಿಡಿಯೋ ಅಂತರಾಷ್ಟ್ರೀಯ ಮಟ್ಟದಲ್ಲಿ ವೈರಲ್ ಆಗಿದ್ದು, ಪ್ರಾಣಿ ಪ್ರಿಯರು ತೀವ್ರ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಕಾಡುಪ್ರಾಣಿಗಳನ್ನು ಮನರಂಜನೆಗಾಗಿ ಪಂಜರದಲ್ಲಿ ಇಡುವುದು ಮತ್ತು ಅವುಗಳನ್ನು ಇಂತಹ ಅಪಾಯಕಾರಿ ಕೆಲಸಗಳಿಗೆ ಬಳಸುವುದು ಪ್ರಾಣಿ ಹಿಂಸೆಯಾಗಿದೆ ಎಂದು ನೆಟ್ಟಿಗರು ಕಮೆಂಟ್ ಮಾಡುತ್ತಿದ್ದಾರೆ. ಇಂತಹ ಪ್ರದರ್ಶನಗಳನ್ನು ತಕ್ಷಣವೇ ನಿಷೇಧಿಸಬೇಕೆಂಬ ಒತ್ತಾಯವೂ ಕೇಳಿಬಂದಿದೆ.
