ಟಾಟಾ ಪಂಚ್ ಇವಿ ಫೇಸ್‌ಲಿಫ್ಟ್ ಬಿಡುಗಡೆ: ಬಜೆಟ್ ಬೆಲೆಯಲ್ಲಿ ಎಲೆಕ್ಟ್ರಿಕ್ ಎಸ್‌ಯುವಿ ಖರೀದಿಸುವ ಮುನ್ನ ಇದನ್ನೊಮ್ಮೆ ಓದಿ

ಟಾಟಾ ಪಂಚ್ ಇವಿ (Tata Punch EV) ಫೇಸ್‌ಲಿಫ್ಟ್ ಆವೃತ್ತಿಯು ಇದೀಗ ಮಾರುಕಟ್ಟೆಗೆ ಲಗ್ಗೆ ಇಟ್ಟಿದೆ. 9.69 ಲಕ್ಷ ರೂ. ನಿಂದ 12.59 ಲಕ್ಷ ರೂ. (ಎಕ್ಸ್ ಶೋರೂಂ) ಬೆಲೆಯಲ್ಲಿ ಲಭ್ಯವಿರುವ ಈ ಎಲೆಕ್ಟ್ರಿಕ್ ಎಸ್‌ಯುವಿಯನ್ನು ಖರೀದಿಸಲು ಇರುವ 3 ಪ್ರಮುಖ ಕಾರಣಗಳು ಮತ್ತು ಇದನ್ನು ಖರೀದಿಸದಿರಲು ಇರುವ 2 ಕಾರಣಗಳು ಇಲ್ಲಿವೆ.

ಟಾಟಾ ಪಂಚ್ ಇವಿ ಫೇಸ್‌ಲಿಫ್ಟ್: ನೀವು ಖರೀದಿಸಲು 3 ಬಲವಾದ ಕಾರಣಗಳು

1. ಸುಲಭ ಮತ್ತು ಆರಾಮದಾಯಕ ಚಾಲನೆ: ಹೊಸ ಪಂಚ್ ಇವಿಯಲ್ಲಿ 30kWh ಮತ್ತು 40kWh ಬ್ಯಾಟರಿ ಆಯ್ಕೆಗಳಿವೆ. ಇದು ಕ್ರಮವಾಗಿ 88hp ಮತ್ತು 129hp ಶಕ್ತಿಯನ್ನು ಉತ್ಪಾದಿಸುತ್ತದೆ. ನಗರ ಪ್ರದೇಶದ ಟ್ರಾಫಿಕ್‌ನಲ್ಲಿ ಈ ಕಾರನ್ನು ಚಲಾಯಿಸುವುದು ತುಂಬಾ ಸುಲಭ. ಇದರಲ್ಲಿ ಎಕೋ (Eco), ಸಿಟಿ (City) ಮತ್ತು ಸ್ಪೋರ್ಟ್ (Sport) ಎಂಬ ಮೂರು ಡ್ರೈವ್ ಮೋಡ್‌ಗಳಿದ್ದು, ಇವು ನಿಮ್ಮ ಚಾಲನಾ ಅಗತ್ಯಕ್ಕೆ ತಕ್ಕಂತೆ ಉತ್ತಮವಾಗಿ ಕೆಲಸ ಮಾಡುತ್ತವೆ. ಇವಿ ಆಗಿರುವುದರಿಂದ ಇಂಜಿನ್ ಶಬ್ದ ಇಲ್ಲದೆ ಕ್ಯಾಬಿನ್ ಶಾಂತವಾಗಿರುತ್ತದೆ.

2. ಅತ್ಯಾಧುನಿಕ ಫೀಚರ್‌ಗಳ ಮಹಾಪೂರ: ಈ ಬೆಲೆಗೆ ಪಂಚ್ ಇವಿಯಲ್ಲಿ ಪ್ರೀಮಿಯಂ ಫೀಚರ್‌ಗಳನ್ನು ನೀಡಲಾಗಿದೆ. 10.25-ಇಂಚಿನ ಹರ್ಮನ್ ಇನ್ಫೋಟೈನ್‌ಮೆಂಟ್ ಟಚ್‌ಸ್ಕ್ರೀನ್, ವೈರ್‌ಲೆಸ್ ಆಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್‌ಪ್ಲೇ, 360-ಡಿಗ್ರಿ ಕ್ಯಾಮೆರಾ ಮತ್ತು ಆಟೋ-ಹೋಲ್ಡ್ ವೈಶಿಷ್ಟ್ಯವಿರುವ ಎಲೆಕ್ಟ್ರಾನಿಕ್ ಪಾರ್ಕಿಂಗ್ ಬ್ರೇಕ್ ಇಲ್ಲಿದೆ. ಸುರಕ್ಷತೆಯ ವಿಷಯದಲ್ಲಿ ಎಲ್ಲಾ ವೇರಿಯೆಂಟ್‌ಗಳಲ್ಲಿ 6 ಏರ್‌ಬ್ಯಾಗ್‌ಗಳು, ESP ಮತ್ತು ABS ಸ್ಟ್ಯಾಂಡರ್ಡ್ ಆಗಿ ನೀಡಲಾಗಿದೆ.

3. ಉತ್ತಮ ಸಸ್ಪೆನ್ಷನ್ ಮತ್ತು ಹ್ಯಾಂಡ್ಲಿಂಗ್: ಭಾರತದ ರಸ್ತೆಗಳಿಗೆ ಈ ಕಾರಿನ ಸಸ್ಪೆನ್ಷನ್ ಅತ್ಯುತ್ತಮವಾಗಿದೆ. ಗುಂಡಿಗಳಿಂದ ಕೂಡಿದ ರಸ್ತೆಗಳಲ್ಲಿ ಪ್ರಯಾಣಿಕರಿಗೆ ಅತಿಯಾದ ಜರ್ಕ್ (Jolts) ಆಗದಂತೆ ಇದು ತಡೆಯುತ್ತದೆ. ಹೈವೇಗಳಲ್ಲಿ ಹೆಚ್ಚಿನ ವೇಗದಲ್ಲಿ ಚಲಿಸುವಾಗಲೂ ಬ್ಯಾಟರಿಯ ತೂಕದಿಂದಾಗಿ ಕಾರು ಸ್ಥಿರವಾಗಿ (Stable) ಇರುತ್ತದೆ. ಪ್ಯಾಡಲ್ ಶಿಫ್ಟರ್ ಮೂಲಕ ಕಂಟ್ರೋಲ್ ಮಾಡಬಹುದಾದ 4 ಹಂತದ ‘ರೀಜೆನೆರೇಟಿವ್ ಬ್ರೇಕಿಂಗ್’ ಸೌಲಭ್ಯವಿದ್ದು, ಇದು ಚಾಲನೆಯನ್ನು ಮತ್ತಷ್ಟು ಸುಲಭಗೊಳಿಸುತ್ತದೆ.

ನೀವು ಈ ಕಾರನ್ನು ಯಾಕೆ ಬಿಡಬಹುದು? (2 ಕಾರಣಗಳು)

1. ಹಿಂಬದಿಯ ಸೀಟು ಮೂವರಿಗೆ ಕಿರಿದು: ಕಾರಿನ ಒಳಭಾಗ ಅಷ್ಟೇನೂ ಅಗಲವಾಗಿಲ್ಲದ ಕಾರಣ, ಹಿಂಬದಿಯ ಸೀಟಿನಲ್ಲಿ ಮೂವರು ವಯಸ್ಕರು ಕುಳಿತುಕೊಳ್ಳುವುದು ಕಷ್ಟಕರ ಮತ್ತು ಕಿಕ್ಕಿರಿದ ಅನುಭವ ನೀಡುತ್ತದೆ. ಅಲ್ಲದೆ, ಹಿಂಬದಿಯ ಎಸಿ ವೆಂಟ್‌ಗಳ ಕೊರತೆಯಿದೆ. ಹಿಂಬದಿಯ ಸೀಟ್ ಬೆಲ್ಟ್ ಸೆನ್ಸಾರ್‌ಗಳಲ್ಲಿ ಇರುವ ತಾಂತ್ರಿಕ ಕಿರಿಕಿರಿ (ಯಾರೂ ಕುಳಿತುಕೊಳ್ಳದಿದ್ದರೂ ವಾರ್ನಿಂಗ್ ಚೈಮ್ ಬರುವುದು) ಪ್ರಯಾಣಿಕರಿಗೆ ಅಸಮಾಧಾನ ತರಬಹುದು.

2. ಸ್ಪೇರ್ ಟೈರ್ ಲಭ್ಯವಿಲ್ಲ: ಈ ಕಾರಿನಲ್ಲಿ ಕಂಪನಿಯು ಸ್ಪೇರ್ ವೀಲ್ (Spare Wheel) ನೀಡಿಲ್ಲ. ಬದಲಿಗೆ ಪಂಕ್ಚರ್ ರಿಪೇರಿ ಕಿಟ್ ನೀಡಲಾಗಿದೆ. ನಗರ ಪ್ರದೇಶಗಳಲ್ಲಿ ಇದು ಪರವಾಗಿಲ್ಲದಿದ್ದರೂ, ದೂರದ ಪ್ರಯಾಣದ ಸಂದರ್ಭದಲ್ಲಿ ಟೈರ್ ಸೈಡ್‌ವಾಲ್ ಹಾನಿಯಾದರೆ ಅಥವಾ ದೊಡ್ಡ ಪಂಕ್ಚರ್ ಆದಲ್ಲಿ ಈ ಕಿಟ್ ನೆರವಾಗುವುದಿಲ್ಲ. ಇದು ಗ್ರಾಹಕರಲ್ಲಿ ಆತಂಕ ಮೂಡಿಸಬಹುದು.