ಗುಜರಾತ್ನ ಸೂರತ್ನಲ್ಲಿ ಪೊಲೀಸ್ ಪೇದೆಯೊಬ್ಬರು ಪ್ರಾಣದ ಹಂಗು ತೊರೆದು ನಡೆಸಿದ ಸಾಹಸಿಕ ರಕ್ಷಣಾ ಕಾರ್ಯಾಚರಣೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿದೆ. ವಸತಿ ಸಮುಚ್ಚಯವೊಂದರ ಏಳನೇ ಮಹಡಿಯ ಬೀಗ ಹಾಕಿದ ಅಪಾರ್ಟ್ಮೆಂಟ್ನೊಳಗೆ ಆತ್ಮಹತ್ಯೆಗೆ ಯತ್ನಿಸುತ್ತಿದ್ದ ವ್ಯಕ್ತಿಯನ್ನು ಸಕಾಲದಲ್ಲಿ ರಕ್ಷಿಸುವ ಮೂಲಕ ಸೂರತ್ ಪೊಲೀಸ್ ಸಿಬ್ಬಂದಿ ಮಾನವೀಯತೆ ಮೆರೆದಿದ್ದಾರೆ.
ಲಸ್ಕಾನಾ ಪ್ರದೇಶದಲ್ಲಿ ಜೂನ್ 8 ರಂದು ಈ ರೋಮಾಂಚಕಾರಿ ಘಟನೆ ನಡೆದಿದೆ. ವ್ಯಕ್ತಿಯೊಬ್ಬರು ಮನೆಯೊಳಗೆ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸುತ್ತಿದ್ದಾರೆ ಎಂದು ಅವರ ಪತ್ನಿ ಪೊಲೀಸ್ ನಿಯಂತ್ರಣ ಕೊಠಡಿಗೆ ತುರ್ತು ಕರೆ ಮಾಡಿ ಮಾಹಿತಿ ನೀಡಿದ್ದರು. ಪರಿಸ್ಥಿತಿಯ ಗಂಭೀರತೆಯನ್ನು ಅರಿತ ಸೂರತ್ ನಗರ ಪೊಲೀಸರು ತಕ್ಷಣವೇ ಲಸ್ಕಾನಾ ಪೊಲೀಸ್ ಠಾಣೆಯ ತುರ್ತು ಸ್ಪಂದನಾ ತಂಡವನ್ನು ಸ್ಥಳಕ್ಕೆ ರವಾನಿಸಿದರು. ಇವರ ಜೊತೆಗೆ ಅಗ್ನಿಶಾಮಕ ದಳ ಮತ್ತು ಆಂಬ್ಯುಲೆನ್ಸ್ ಸಿಬ್ಬಂದಿ ಕೂಡ ಸ್ಥಳಕ್ಕೆ ಧಾವಿಸಿದರು.
ಕಿಟಕಿ ಗ್ರಿಲ್ ಮೂಲಕ ಒಳ ನುಗ್ಗಿದ ಕಾನ್ಸ್ಟೆಬಲ್
ಪೊಲೀಸರು ಸ್ಥಳಕ್ಕೆ ತಲುಪಿದಾಗ ಅಪಾರ್ಟ್ಮೆಂಟ್ನ ಮುಖ್ಯ ಬಾಗಿಲು ಒಳಗಿನಿಂದ ಲಾಕ್ ಆಗಿತ್ತು. ಪ್ರತಿಯೊಂದು ಕ್ಷಣವೂ ಅತ್ಯಂತ ಅಮೂಲ್ಯವಾಗಿದ್ದರಿಂದ, ಬಾಗಿಲು ಮುರಿಯಲು ಕಾಯದೆ ಪರ್ಯಾಯ ಮಾರ್ಗವನ್ನು ಹುಡುಕಲು ಪೊಲೀಸರು ಮುಂದಾದರು. ಈ ವೇಳೆ ಪೊಲೀಸ್ ಕಾನ್ಸ್ಟೆಬಲ್ ಶೈಲೇಶ್ ಚುಡಾಸಮಾ ಮತ್ತು ಚಾಲಕ ಕೃಪಾಲ್ಸಿಂಗ್ ಗೋಹಿಲ್ ಅವರು ಪಕ್ಕದ ಮನೆಯ ನಿವಾಸಿಗಳ ಸಹಾಯದಿಂದ ಕಿಟಕಿಯ ಮೂಲಕ ಒಳಗೆ ಹೋಗಲು ಯೋಜನೆಯೊಂದನ್ನು ರೂಪಿಸಿದರು.
ಏಳನೇ ಮಹಡಿಯ ಎತ್ತರದಲ್ಲಿದ್ದರೂ ಕಿಂಚಿತ್ತೂ ಹೆದರದೆ ಕಾನ್ಸ್ಟೆಬಲ್ ಶೈಲೇಶ್ ಅವರು ಕಟ್ಟಡದ ಹೊರಗಿನ ಸೇಫ್ಟಿ ಗ್ರಿಲ್ ಮೂಲಕ ಅತ್ಯಂತ ಜಾಗರೂಕತೆಯಿಂದ ತೆವಳುತ್ತಾ ಸಾಗಿ, ಕಿಟಕಿಯ ಮೂಲಕ ಅಪಾರ್ಟ್ಮೆಂಟ್ನೊಳಗೆ ಪ್ರವೇಶಿಸುವಲ್ಲಿ ಯಶಸ್ವಿಯಾದರು. ಒಳಗಡೆ ಹೋದಾಗ ವ್ಯಕ್ತಿ ಈಗಾಗಲೇ ವಿಷ ಸೇವಿಸಿ ವಾಂತಿ ಮಾಡುತ್ತಿರುವುದು ಕಂಡುಬಂದಿದೆ. ತಕ್ಷಣವೇ ಕಾನ್ಸ್ಟೆಬಲ್ ಶೈಲೇಶ್ ಅವರು ವ್ಯಕ್ತಿಯ ಬಳಿಯಿದ್ದ ಉಳಿದ ವಿಷದ ಬಾಟಲಿಯನ್ನು ವಶಪಡಿಸಿಕೊಂಡು, ಆತನನ್ನು ನಿಯಂತ್ರಣಕ್ಕೆ ಪಡೆದರು.
ಆಂಬ್ಯುಲೆನ್ಸ್ಗೆ ಕಾಯದೆ ಆಸ್ಪತ್ರೆಗೆ ರವಾನೆ
ಸಮಯ ವ್ಯರ್ಥ ಮಾಡದ ಪೊಲೀಸ್ ತಂಡವು ತಕ್ಷಣವೇ ಆ ವ್ಯಕ್ತಿಯನ್ನು ಕೆಳಗೆ ಕರೆತಂದಿದೆ. ಆಂಬ್ಯುಲೆನ್ಸ್ ಬರುವುದು ತಡವಾಗಬಹುದು ಎಂದು ಅರಿತು, ಪೊಲೀಸರು ತಮ್ಮ ವಾಹನದಲ್ಲೇ ಆತನನ್ನು ಕಾಮ್ರೇಜ್ನಲ್ಲಿರುವ ಆಸ್ಪತ್ರೆಗೆ ಕರೆದೊಯ್ಯಲು ಆರಂಭಿಸಿದರು. ಮಾರ್ಗಮಧ್ಯೆ ಆಂಬ್ಯುಲೆನ್ಸ್ ಸಿಕ್ಕ ತಕ್ಷಣ ಅದಕ್ಕೆ ಶಿಫ್ಟ್ ಮಾಡಿ ತುರ್ತು ಚಿಕಿತ್ಸೆ ಕೊಡಿಸುವ ಮೂಲಕ ವ್ಯಕ್ತಿಯ ಪ್ರಾಣ ಉಳಿಸಿದ್ದಾರೆ. ಸದ್ಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಈ ವ್ಯಕ್ತಿ ಸೂರತ್ನ ವಜ್ರ ಕತ್ತರಿಸುವ ಮತ್ತು ಪಾಲಿಶ್ ಮಾಡುವ ಉದ್ಯಮದಲ್ಲಿ ಕೆಲಸ ಮಾಡುತ್ತಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ರೋಚಕ ರಕ್ಷಣಾ ಕಾರ್ಯಾಚರಣೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಪೊಲೀಸರ ಸಮಯಪ್ರಜ್ಞೆ ಮತ್ತು ಕರ್ತವ್ಯ ನಿಷ್ಠೆಗೆ ಸಾರ್ವಜನಿಕರು ಮತ್ತು ನೆಟ್ಟಿಗರು ಸಾಷ್ಟಾಂಗ ನಮನ ಸಲ್ಲಿಸುತ್ತಿದ್ದಾರೆ. ಗುಜರಾತ್ ಗೃಹ ಸಚಿವ ಹರ್ಷ್ ಸಂಘವಿ ಅವರು ಕೂಡ ಪೊಲೀಸರ ಈ ಸಮಯೋಚಿತ ಸಾಹಸವನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ.
