ಕೋಝಿಕ್ಕೋಡ್: ಕ್ಯಾಲಿಕಟ್ ಎಫ್‌ಸಿ ತಂಡದ ಡಿಫೆಂಡರ್ ಹಾಗೂ ಫುಟ್‌ಬಾಲ್ ಆಟಗಾರ ರಿಜಾನ್ ಜೋಸ್ (29) ಸೋಮವಾರ ಮುಂಜಾನೆ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿದ್ದಾರೆ. ಕೇರಳ ಸೂಪರ್ ಲೀಗ್ ಆರಂಭಕ್ಕೆ ಕೆಲವೇ ದಿನಗಳಿರುವಾಗ ಆಟಗಾರನ ಅಕಾಲಿಕ ನಿಧನ ಕೇರಳದ ಫುಟ್‌ಬಾಲ್ ವಲಯದಲ್ಲಿ ತೀವ್ರ ದುಃಖಕ್ಕೆ ಕಾರಣವಾಗಿದೆ.
ತ್ರಿಶೂರ್ ಜಿಲ್ಲೆಯ ಒಲ್ಲೂರು ಮೂಲದ ರಿಜಾನ್ ಜೋಸ್, ಕ್ಯಾಲಿಕಟ್ ಎಫ್‌ಸಿ ತಂಡದ ಮತ್ತೊಬ್ಬ ಆಟಗಾರ ಹಾಗೂ ಸಂತೋಷ್ ಟ್ರೋಫಿ ಫುಟ್‌ಬಾಲ್ ಆಟಗಾರ ಗನಿ ಅಹಮದ್ ನಿಗಮ್ ಅವರೊಂದಿಗೆ ಭಾನುವಾರ ರಾತ್ರಿ ಬೈಕ್‌ನಲ್ಲಿ ಪ್ರಯಾಣಿಸುತ್ತಿದ್ದರು. ರಾತ್ರಿ ಸುಮಾರು 10.30ರ ವೇಳೆಗೆ ಅವರ ಬೈಕ್ ಮತ್ತೊಂದು ಬೈಕ್‌ಗೆ ಡಿಕ್ಕಿ ಹೊಡೆದಿದೆ.
ಡಿಕ್ಕಿಯ ರಭಸಕ್ಕೆ ಇಬ್ಬರೂ ರಸ್ತೆಗೆ ಬಿದ್ದಿದ್ದು, ರಿಜಾನ್ ಗಂಭೀರವಾಗಿ ಗಾಯಗೊಂಡಿದ್ದರು. ಇಬ್ಬರನ್ನೂ ಕೂಡಲೇ ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ, ಸೋಮವಾರ ಮುಂಜಾನೆ ಸುಮಾರು 12.15ರ ವೇಳೆಗೆ ಚಿಕಿತ್ಸೆ ಫಲಿಸದೆ ರಿಜಾನ್ ಮೃತಪಟ್ಟಿದ್ದಾರೆ. ಗನಿ ಅಹಮದ್ ನಿಗಮ್ ಕೂಡ ಗಾಯಗೊಂಡಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅವರ ಆರೋಗ್ಯ ಸ್ಥಿರವಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸೆಪ್ಟೆಂಬರ್ 25ರಿಂದ ಆರಂಭವಾಗಲಿರುವ ಕೇರಳ ಸೂಪರ್ ಲೀಗ್‌ನ ಮುಂದಿನ ಆವೃತ್ತಿಗೆ ಕ್ಯಾಲಿಕಟ್ ಎಫ್‌ಸಿ ತಂಡ ಸಿದ್ಧತೆ ಆರಂಭಿಸಿದ್ದ ಸಂದರ್ಭದಲ್ಲೇ ಈ ದುರ್ಘಟನೆ ಸಂಭವಿಸಿದೆ. ರಿಜಾನ್ ಮತ್ತು ಗನಿ ಇತ್ತೀಚೆಗಷ್ಟೇ ಕೋಝಿಕ್ಕೋಡ್‌ಗೆ ಆಗಮಿಸಿ ತಂಡದ ಪೂರ್ವಸಿದ್ಧತಾ ಶಿಬಿರದಲ್ಲಿ ಭಾಗವಹಿಸಿದ್ದರು.
2024ರಲ್ಲಿ ನಡೆದ ಮೊದಲ ಕೇರಳ ಸೂಪರ್ ಲೀಗ್ ಪ್ರಶಸ್ತಿ ಗೆದ್ದ ಕ್ಯಾಲಿಕಟ್ ಎಫ್‌ಸಿ ತಂಡದ ಭಾಗವಾಗಿದ್ದ ರಿಜಾನ್, ತಂಡದ ರಕ್ಷಣಾ ವಿಭಾಗದಲ್ಲಿ ವಿಶ್ವಾಸಾರ್ಹ ಆಟಗಾರನಾಗಿ ಗುರುತಿಸಿಕೊಂಡಿದ್ದರು. ತಮ್ಮ ವೃತ್ತಿಜೀವನದಲ್ಲಿ ಶ್ರೀಭೂಮಿ ಎಫ್‌ಸಿ, ಜಾರ್ಜ್ ಟೆಲಿಗ್ರಾಫ್ ಎಸ್‌ಸಿ, ಎಫ್‌ಸಿ ಡೆಕ್ಕನ್, ಫೋರ್ಕಾ ಕೊಚ್ಚಿ ಸೇರಿದಂತೆ ಹಲವು ದೇಶೀಯ ಕ್ಲಬ್‌ಗಳ ಪರ ಆಡಿದ್ದರು.
ಕೇರಳ ಪ್ರೀಮಿಯರ್ ಲೀಗ್ ಮತ್ತು ಕಲ್ಕತ್ತಾ ಫುಟ್‌ಬಾಲ್ ಲೀಗ್ ಸೇರಿದಂತೆ ಹಲವು ಪ್ರಮುಖ ಟೂರ್ನಿಗಳಲ್ಲೂ ರಿಜಾನ್ ಭಾಗವಹಿಸಿದ್ದರು. ಉತ್ತಮ ರಕ್ಷಣಾತ್ಮಕ ಆಟ ಹಾಗೂ ದೈಹಿಕ ಸಾಮರ್ಥ್ಯಕ್ಕೆ ಹೆಸರಾಗಿದ್ದ ಅವರಿಗೆ ಕ್ಯಾಲಿಕಟ್ ಎಫ್‌ಸಿಯಲ್ಲಿ “ದಿ ಇಂಟರ್‌ಸೆಪ್ಟರ್” ಎಂಬ ಅಡ್ಡಹೆಸರು ಕೂಡ ಇತ್ತು.
ಅಪಘಾತಕ್ಕೆ ಸಂಬಂಧಿಸಿದಂತೆ ಕ್ಯಾಲಿಕಟ್ ಎಫ್‌ಸಿ ಮ್ಯಾನೇಜರ್ ನೀಡಿದ ದೂರಿನ ಆಧಾರದ ಮೇಲೆ ನಾಡಕ್ಕಾವು ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ಮುಂದುವರಿಸಿದ್ದಾರೆ. ಅಪಘಾತ ಸಂಭವಿಸಿದ ಸಮಯದಲ್ಲಿ ಆ ಪ್ರದೇಶದಲ್ಲಿ ಮಳೆ ಸುರಿಯುತ್ತಿತ್ತು ಎಂದು ವರದಿಗಳು ತಿಳಿಸಿವೆ.
ರಿಜಾನ್ ಜೋಸ್ ಅವರ ನಿಧನಕ್ಕೆ ಸಂತಾಪ ಸೂಚಿಸಿರುವ ಮುಖ್ಯಮಂತ್ರಿ ವಿ.ಡಿ. ಸತೀಶನ್, ಕೇರಳದ ಫುಟ್‌ಬಾಲ್ ಕ್ಷೇತ್ರಕ್ಕೆ ರಿಜಾನ್ ನೀಡಿದ ಕೊಡುಗೆಯನ್ನು ಸ್ಮರಿಸಿದ್ದಾರೆ. ಗಾಯಗೊಂಡಿರುವ ಗನಿ ಅಹಮದ್ ನಿಗಮ್ ಅವರು ಶೀಘ್ರ ಗುಣಮುಖರಾಗಲಿ ಎಂದು ಹಾರೈಸಿದ್ದಾರೆ.
ಕೋಝಿಕ್ಕೋಡ್‌ನ ಇಎಂಎಸ್ ಕಾರ್ಪೊರೇಷನ್ ಕ್ರೀಡಾಂಗಣದಲ್ಲಿ ರಿಜಾನ್ ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು. ಬಳಿಕ ಮೃತದೇಹವನ್ನು ತ್ರಿಶೂರ್‌ನ ಒಲ್ಲೂರಿಗೆ ಕೊಂಡೊಯ್ಯಲಾಯಿತು. ರಿಜಾನ್ ಜೋಸ್ ಅವರು ತಂದೆ ಜೋಸ್ ಎಂ.ಪಿ., ತಾಯಿ ಟ್ರೀಸಾ ಹಾಗೂ ಸಹೋದರ ಟಿಜೋ ಎಂ.ಜೆ. ಅವರನ್ನು ಅಗಲಿದ್ದಾರೆ.
