ಬಾಲಿವುಡ್ ಚಿತ್ರರಂಗದಲ್ಲಿ ತಮ್ಮ ಆಕ್ಷನ್ ಮತ್ತು ವಿಭಿನ್ನ ನಟನೆಯ ಮೂಲಕ ನಾಲ್ಕು ದಶಕಗಳಿಂದ ಗುರುತಿಸಿಕೊಂಡಿರುವ ನಟ, ನಿರ್ಮಾಪಕ ಸುನೀಲ್ ಶೆಟ್ಟಿ ಅವರಿಗೆ ಈಗ 64 ವರ್ಷ. ಇತ್ತೀಚೆಗಷ್ಟೇ ಮಗಳು ಅಥಿಯಾ ಶೆಟ್ಟಿ ಮತ್ತು ಕ್ರಿಕೆಟಿಗ ಕೆ.ಎಲ್. ರಾಹುಲ್ ದಂಪತಿಗೆ ಹೆಣ್ಣು ಮಗು ಜನಿಸಿದ ಹಿನ್ನೆಲೆಯಲ್ಲಿ ಇವರು ತಾತನೂ ಆಗಿದ್ದಾರೆ. ಆದರೆ ಇವರ ದೈಹಿಕ ಫಿಟ್‌ನೆಸ್ ನೋಡಿದರೆ ವಯಸ್ಸು ಉಲ್ಟಾ ತಿರುಗುತ್ತಿದೆಯೇನೋ ಎಂಬ ಅನುಮಾನ ಕಾಡುವುದು ಸಹಜ. ತಮ್ಮ ಈ ಎವರ್‌ಗ್ರೀನ್ ಫಿಟ್‌ನೆಸ್‌ನ ರಹಸ್ಯವನ್ನು ಅವರು ಇತ್ತೀಚಿನ ಸಂದರ್ಶನವೊಂದರಲ್ಲಿ ಬಿಚ್ಚಿಟ್ಟಿದ್ದಾರೆ.
ಪ್ರವಾಸದಲ್ಲೂ ಕಟ್ಟುನಿಟ್ಟಿನ ಆಹಾರ ಪದ್ಧತಿ ಇತ್ತೀಚೆಗೆ ದುಬೈ ಪ್ರವಾಸದಲ್ಲಿದ್ದ ಸುನೀಲ್ ಶೆಟ್ಟಿ, ಅಲ್ಲಿನ ಸಲಾಡ್ ಮತ್ತು ಕಬಾಬ್‌ಗಳನ್ನು ತಾವು ತುಂಬಾ ಇಷ್ಟಪಡುವುದಾಗಿ ತಿಳಿಸಿದ್ದಾರೆ. ಆದರೆ ರಜಾದಿನಗಳಲ್ಲಿದ್ದಾಗಲೂ ಅವರು ತಮ್ಮ ಆಹಾರದ ವಿಚಾರದಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳುವುದಿಲ್ಲ. ದುಬೈನಲ್ಲಿರುವಾಗ ಅವರು ಹಾಲಾಗಲಿ, ಸಕ್ಕರೆಯಾಗಲಿ ಇಲ್ಲದ ಬ್ಲ್ಯಾಕ್ ಕಾಫಿಯನ್ನು ಇಷ್ಟಪಡುತ್ತಾರೆ. ವಿಶೇಷವೆಂದರೆ ಈ ಕಹಿ ಕಾಫಿಯ ಜೊತೆಗೆ ಸಿಹಿಗಾಗಿ ಅವರು ಕೇವಲ ಒಂದು ಖರ್ಜೂರವನ್ನು (ಡೇಟ್ಸ್) ಬಳಸುತ್ತಾರೆ. ತಾವು ಎಲ್ಲೇ ಇದ್ದರೂ ಎಷ್ಟು ಪ್ರಮಾಣದ ಆಹಾರ, ಎಷ್ಟು ಎಣ್ಣೆ ಅಥವಾ ಸಕ್ಕರೆ ದೇಹ ಸೇರಬೇಕು ಎಂಬ ಬಗ್ಗೆ ಕಟ್ಟುನಿಟ್ಟಾದ ನಿಗಾ ಇಟ್ಟಿರುವುದಾಗಿ ಅವರು ಹೇಳಿದ್ದಾರೆ.
ಬೆಳಗಿನ ಉಪಾಹಾರ, ಮಧ್ಯಾಹ್ನ ಮತ್ತು ರಾತ್ರಿಯ ಊಟದ ವಿವರ ಸುನೀಲ್ ಶೆಟ್ಟಿ ಅವರ ದಿನನಿತ್ಯದ ಡಯಟ್ ಚಾರ್ಟ್ ಅತ್ಯಂತ ಸರಳ ಹಾಗೂ ಶಿಸ್ತುಬದ್ಧವಾಗಿದೆ.
- ಬೆಳಗಿನ ಉಪಾಹಾರ: ಇವರ ದಿನದ ಮೊದಲ ಆಹಾರ ಅತ್ಯಂತ ಸರಳವಾಗಿದ್ದು, ಪ್ರೋಟೀನ್‌ನಿಂದ ಕೂಡಿರುತ್ತದೆ. ಇದು ದಿನವಿಡೀ ಉತ್ಸಾಹದಿಂದ ಇರಲು ಸಹಾಯ ಮಾಡುತ್ತದೆ.
- ಮಧ್ಯಾಹ್ನದ ಊಟ: ಮಧ್ಯಾಹ್ನದ ಊಟದಲ್ಲಿ ಕಾರ್ಬೋಹೈಡ್ರೇಟ್ಸ್, ಪ್ರೋಟೀನ್ ಮತ್ತು ಉತ್ತಮ ಕೊಬ್ಬಿನಾಂಶದ ಸಮತೋಲನ ಇರುತ್ತದೆ. ತಾವು ದಕ್ಷಿಣ ಭಾರತದವರಾದ್ದರಿಂದ (ಕರಾವಳಿ ಮೂಲದವರು) ಊಟದಲ್ಲಿ ಅನ್ನ ಇರಲೇಬೇಕು, ಆದರೆ ಅದರ ಪ್ರಮಾಣ ತೀರಾ ಕಡಿಮೆ ಇರುತ್ತದೆ ಎಂದು ಶೆಟ್ಟಿ ತಿಳಿಸಿದ್ದಾರೆ.
- ರಾತ್ರಿಯ ಊಟ: ರಾತ್ರಿಯ ಊಟದಲ್ಲಿ ಅತಿ ಕಡಿಮೆ ಎಣ್ಣೆ ಬಳಸಿದ ಹಗುರವಾದ ಆಹಾರವನ್ನು ಸೇವಿಸುತ್ತಾರೆ. ಎಲ್ಲಕ್ಕಿಂತ ಮುಖ್ಯವಾಗಿ, ಅವರು ಸಂಜೆ 6 ಗಂಟೆಯ ಒಳಗಾಗಿ ತಮ್ಮ ರಾತ್ರಿಯ ಊಟವನ್ನು ಮುಗಿಸುತ್ತಾರೆ. ಇದು ಮಲಗುವ ಮುನ್ನ ಆಹಾರ ಸುಲಭವಾಗಿ ಜೀರ್ಣವಾಗಲು ನೆರವಾಗುತ್ತದೆ.
ವರ್ಕೌಟ್ ದಿನಚರಿ ಮುಂಬೈನಲ್ಲಿದ್ದಾಗ ಸುನೀಲ್ ಶೆಟ್ಟಿ ಅವರು ಪ್ರತಿದಿನ ಮುಂಜಾನೆ 5:30 ಕ್ಕೆ ಎದ್ದು ವರ್ಕೌಟ್ ಮಾಡುತ್ತಾರೆ. ಹೊರಗಡೆ ಪ್ರವಾಸದಲ್ಲಿದ್ದಾಗಲೂ ಈ ದಿನಚರಿ ತಪ್ಪುವುದಿಲ್ಲ. ರಜಾದಿನಗಳಲ್ಲಿ ಮುಂಜಾನೆ ಎದ್ದ ತಕ್ಷಣ ಜಿಮ್‌ಗೆ ಓಡದಿದ್ದರೂ, ಬೆಳಗ್ಗೆ 8 ಗಂಟೆಯ ಸುಮಾರಿಗೆ ಖಂಡಿತವಾಗಿಯೂ ವ್ಯಾಯಾಮ ಮಾಡುತ್ತಾರೆ. ನಿಯಮಿತ ವ್ಯಾಯಾಮ ಮತ್ತು ಶಿಸ್ತಿನ ಆಹಾರ ಪದ್ಧತಿಯೇ ಇವರ ಈ ಯಂಗ್ ಲುಕ್‌ನ ಅಸಲಿ ಸೀಕ್ರೆಟ್ ಆಗಿದೆ.
