ಮಧುಮೇಹ ಅಥವಾ ಸಕ್ಕರೆ ಕಾಯಿಲೆ ಇರುವವರು ಆಹಾರದ ವಿಷಯದಲ್ಲಿ ತುಂಬಾ ಜಾಗರೂಕರಾಗಿರಬೇಕಾಗುತ್ತದೆ. ಅದರಲ್ಲೂ ಹಣ್ಣುಗಳ ವಿಷಯಕ್ಕೆ ಬಂದಾಗ ಯಾವ ಹಣ್ಣು ಸಕ್ಕರೆ ಮಟ್ಟವನ್ನು ಹೆಚ್ಚಿಸುತ್ತದೆಯೋ ಎಂಬ ಆತಂಕ ಸದಾ ಇರುತ್ತದೆ. ನೋಡಲು ಆಕರ್ಷಕ ಮತ್ತು ರುಚಿಯಲ್ಲಿ ಅದ್ಭುತವಾಗಿರುವ ಸ್ಟ್ರಾಬೆರಿ ಹಣ್ಣುಗಳ ಬಗ್ಗೆಯೂ ಇಂತಹದ್ದೇ ಗೊಂದಲ ಅನೇಕರಲ್ಲಿದೆ. ಆದರೆ ಇತ್ತೀಚಿನ ವೈದ್ಯಕೀಯ ವರದಿಗಳು ಮತ್ತು ಪೌಷ್ಟಿಕಾಂಶ ತಜ್ಞರ ಪ್ರಕಾರ ಮಧುಮೇಹಿಗಳಿಗೆ ಸ್ಟ್ರಾಬೆರಿ ಒಂದು ವರದಾನ ಎನ್ನಲಾಗಿದೆ.
ಸಂಶೋಧನೆಗಳು ಹೇಳುವುದೇನು? ಇತ್ತೀಚೆಗೆ ಪ್ರಕಟವಾದ ಆಂಟಿಆಕ್ಸಿಡೆಂಟ್ಸ್ ಎಂಬ ವೈದ್ಯಕೀಯ ನಿಯತಕಾಲಿಕೆಯ ವರದಿಯ ಪ್ರಕಾರ, ಮಧುಮೇಹ ಪೂರ್ವ ಹಂತದಲ್ಲಿರುವವರು ದಿನಕ್ಕೆ ಒಂದು ಕಪ್ ಸ್ಟ್ರಾಬೆರಿ ಸೇವಿಸುವುದರಿಂದ ಅವರ ರಕ್ತದಲ್ಲಿನ ಸಕ್ಕರೆ ಮಟ್ಟದಲ್ಲಿ ಸುಧಾರಣೆ ಕಂಡುಬಂದಿದೆ. ಸುಮಾರು 12 ವಾರಗಳ ಕಾಲ ನಡೆಸಿದ ಈ ಅಧ್ಯಯನದಲ್ಲಿ ಸ್ಟ್ರಾಬೆರಿ ಸೇವನೆಯು ದೇಹದಲ್ಲಿನ ಉರಿಯೂತವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ ಎಂಬುದು ದೃಢಪಟ್ಟಿದೆ. 2025 ರ ಇತ್ತೀಚಿನ ಸಂಶೋಧನೆಯೊಂದು ಕೂಡ ಇದೇ ಅಂಶವನ್ನು ಪುಷ್ಟೀಕರಿಸಿದ್ದು, ನಿಯಮಿತವಾಗಿ ಸ್ಟ್ರಾಬೆರಿ ಸೇವಿಸುವುದು ಟೈಪ್ 2 ಮಧುಮೇಹ ಬರುವ ಅಪಾಯವನ್ನು ಕಡಿಮೆ ಮಾಡುತ್ತದೆ ಎಂದು ತಿಳಿಸಿದೆ.
ಮಧುಮೇಹಿಗಳಿಗೆ ಇದು ಏಕೆ ಸುರಕ್ಷಿತ? ಸ್ಟ್ರಾಬೆರಿ ಹಣ್ಣುಗಳಲ್ಲಿ ಗ್ಲೈಸೆಮಿಕ್ ಇಂಡೆಕ್ಸ್ ಕಡಿಮೆ ಇರುತ್ತದೆ. ಅಂದರೆ ಇದನ್ನು ತಿಂದ ತಕ್ಷಣ ರಕ್ತದಲ್ಲಿ ಸಕ್ಕರೆಯ ಪ್ರಮಾಣ ಹಠತ್ತಾಗಿ ಏರುವುದಿಲ್ಲ. ಇದರಲ್ಲಿ ನಾರಿನಂಶ ಹೆಚ್ಚಿರುವುದರಿಂದ ಜೀರ್ಣಕ್ರಿಯೆ ನಿಧಾನವಾಗಿ ಸಕ್ಕರೆಯ ಅಂಶ ರಕ್ತಕ್ಕೆ ನಿಧಾನವಾಗಿ ಸೇರ್ಪಡೆಯಾಗುತ್ತದೆ. ಜೊತೆಗೆ ಇದರಲ್ಲಿರುವ ವಿಟಮಿನ್ ಸಿ ಮತ್ತು ಆಂಥೋಸಯಾನಿನ್ ಎಂಬ ಅಂಶಗಳು ಹೃದಯದ ಆರೋಗ್ಯವನ್ನು ಕಾಪಾಡಲು ನೆರವಾಗುತ್ತವೆ.
ಸೇವಿಸುವ ಕ್ರಮ ಹೇಗೆ? ಮಧುಮೇಹಿಗಳು ಸ್ಟ್ರಾಬೆರಿ ತಿನ್ನುವಾಗ ಕೆಲವು ಮುನ್ನೆಚ್ಚರಿಕೆಗಳನ್ನು ವಹಿಸುವುದು ಉತ್ತಮ. ಹಣ್ಣನ್ನು ಜ್ಯೂಸ್ ಮಾಡಿ ಕುಡಿಯುವ ಬದಲು ಹಾಗೆಯೇ ತಿನ್ನುವುದು ಒಳ್ಳೆಯದು. ಒಂದು ಬಾರಿಗೆ ಸುಮಾರು ಒಂದು ಕಪ್ ನಷ್ಟು ಸ್ಟ್ರಾಬೆರಿ ಸೇವನೆಗೆ ತಜ್ಞರು ಅನುಮೋದನೆ ನೀಡುತ್ತಾರೆ. ಇದನ್ನು ಮೊಸರು ಅಥವಾ ಬಾದಾಮಿಯಂತಹ ಒಣಫಲಗಳ ಜೊತೆಗೆ ಸೇವಿಸಿದರೆ ಸಕ್ಕರೆ ಮಟ್ಟವು ಇನ್ನು ಹೆಚ್ಚಿನ ನಿಯಂತ್ರಣದಲ್ಲಿರುತ್ತದೆ. ಮುಖ್ಯವಾಗಿ ಸ್ಟ್ರಾಬೆರಿ ಫ್ಲೇವರ್ ಇರುವ ಐಸ್ ಕ್ರೀಮ್ ಅಥವಾ ಸಕ್ಕರೆ ಮಿಶ್ರಿತ ಡಬಾಗಳಲ್ಲಿ ಬರುವ ಹಣ್ಣುಗಳಿಂದ ದೂರವಿರುವುದು ಒಳಿತು.
ಒಟ್ಟಾರೆಯಾಗಿ ಹೇಳುವುದಾದರೆ ಸ್ಟ್ರಾಬೆರಿ ಕೇವಲ ರುಚಿಕರವಾದ ಹಣ್ಣಷ್ಟೇ ಅಲ್ಲ, ಮಧುಮೇಹಿಗಳ ಆರೋಗ್ಯಕ್ಕೆ ಪೂರಕವಾದ ಪೌಷ್ಟಿಕಾಂಶದ ಗಣಿಯೂ ಹೌದು. ಆದರೆ ಯಾವುದೇ ಹೊಸ ಆಹಾರ ಕ್ರಮವನ್ನು ಅಳವಡಿಸಿಕೊಳ್ಳುವ ಮೊದಲು ನಿಮ್ಮ ವೈಯಕ್ತಿಕ ಆರೋಗ್ಯ ಸ್ಥಿತಿಗೆ ಅನುಗುಣವಾಗಿ ವೈದ್ಯರ ಸಲಹೆ ಪಡೆಯುವುದು ಯಾವಾಗಲೂ ಉತ್ತಮ.
