ಭಾರತದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಸ್ಯಾಟಲೈಟ್ ಕಮ್ಯುನಿಕೇಷನ್ ಮಾರುಕಟ್ಟೆಗೆ ಪ್ರವೇಶಿಸಲು ಸಿಂಗಾಪುರದ ಪ್ರಮುಖ ಟೆಲಿಕಾಂ ಸಂಸ್ಥೆ ಸಿಂಗ್‌ಟೆಲ್ ಸಿದ್ಧತೆ ನಡೆಸುತ್ತಿದೆ.ಹೌದು. ತನ್ನ ಭಾರತೀಯ ಅಂಗಸಂಸ್ಥೆ ಸಿಂಗಾಪುರ್ ಟೆಲಿಕಾಂ ಇಂಡಿಯಾ ಮೂಲಕ ಸ್ಯಾಟಲೈಟ್ ಕಮ್ಯುನಿಕೇಷನ್ ಸೇವೆಗಳನ್ನು ಒದಗಿಸಲು ಕೇಂದ್ರ ಸರ್ಕಾರದಿಂದ ವಿದೇಶಿ ನೇರ ಹೂಡಿಕೆ (FDI) ಅನುಮತಿ ಕೋರಿ ಅರ್ಜಿ ಸಲ್ಲಿಸಿದೆ ಎಂದು ವರದಿಯಾಗಿದೆ.
ಸರ್ಕಾರಿ ಮತ್ತು ಖಾಸಗಿ ಕಂಪನಿಗಳಿಗೆ ಸ್ಯಾಟಲೈಟ್ ಕಮ್ಯುನಿಕೇಷನ್ ಸೇವೆಗಳನ್ನು ಒದಗಿಸುವುದು ಸಿಂಗ್‌ಟೆಲ್‌ನ ಉದ್ದೇಶವಾಗಿದೆ. ಈ ಮೂಲಕ ಭಾರತದ ಉದಯೋನ್ಮುಖ ಮತ್ತು ಭವಿಷ್ಯದಲ್ಲಿ ಭಾರೀ ಪ್ರಮಾಣದಲ್ಲಿ ಬೆಳೆಯುವ ನಿರೀಕ್ಷೆಯಿರುವ ಸ್ಯಾಟ್‌ಕಾಮ್ ಮಾರುಕಟ್ಟೆಗೆ ಪ್ರವೇಶಿಸುತ್ತಿರುವ ಮತ್ತೊಂದು ಅಂತಾರಾಷ್ಟ್ರೀಯ ಸಂಸ್ಥೆಯಾಗಿ ಸಿಂಗ್‌ಟೆಲ್ ಗುರುತಿಸಿಕೊಳ್ಳಲಿದೆ.
ಈ ಕುರಿತು ಮಾಹಿತಿ ಹೊಂದಿರುವ ವ್ಯಕ್ತಿಗಳ ಪ್ರಕಾರ, ಸಿಂಗಾಪುರ್ ಟೆಲಿಕಾಂ ಇಂಡಿಯಾ (STIPL) ಈಗಾಗಲೇ ಎರಡು ದಶಕಗಳಿಗೂ ಹೆಚ್ಚು ಕಾಲ ಭಾರತದಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಇದೀಗ ತನ್ನ ಸೇವೆಗಳ ವ್ಯಾಪ್ತಿಯನ್ನು ಸ್ಯಾಟಲೈಟ್ ಕಮ್ಯುನಿಕೇಷನ್‌ಗೂ ವಿಸ್ತರಿಸುತ್ತಿರುವುದರಿಂದ ಹೊಸ FDI ಅನುಮತಿ ಅಗತ್ಯವಿದೆ ಎಂದು ತಿಳಿದುಬಂದಿದೆ.
ಏನಿದು ಸಿಂಗ್‌ಟೆಲ್ ಪ್ಲಾನ್?
ಸೇವೆಗಳು: ಸರ್ಕಾರಿ ಮತ್ತು ಖಾಸಗಿ ವಲಯದ ಸಂಸ್ಥೆಗಳಿಗೆ ವೇಗದ ಸ್ಯಾಟಲೈಟ್ ಇಂಟರ್ನೆಟ್ ಹಾಗೂ ಬ್ರಾಡ್‌ಬ್ಯಾಂಡ್ ಸೇವೆಗಳನ್ನು ಒದಗಿಸುವುದು ಸಿಂಗ್‌ಟೆಲ್‌ನ ಪ್ರಮುಖ ಗುರಿಯಾಗಿದೆ.ಸುಮಾರು 36ರಿಂದ 38 ಜಿಯೋಸ್ಟೇಷನರಿ (GEO) ಉಪಗ್ರಹಗಳ ಜಾಲದ ಜೊತೆಗೆ, ಎಲಾನ್ ಮಸ್ಕ್ ಅವರ ಸ್ಟಾರ್‌ಲಿಂಕ್ನಂತಹ ಕಂಪನಿಗಳ ಸಹಭಾಗಿತ್ವದ ಮೂಲಕ ಸೇವೆ ಒದಗಿಸುವ ಯೋಜನೆಯನ್ನು ಸಿಂಗ್‌ಟೆಲ್ ಹೊಂದಿದೆ ಎಂದು ವರದಿಯಾಗಿದೆ.
ಇನ್ನು ಸಿಂಗ್‌ಟೆಲ್‌ಗೆ ಭಾರತದ ಎರಡನೇ ಅತಿದೊಡ್ಡ ಟೆಲಿಕಾಂ ಸಂಸ್ಥೆಯಾದ ಭಾರ್ತಿ ಏರ್‌ಟೆಲ್‌ನಲ್ಲಿ ನೇರ ಮತ್ತು ಪರೋಕ್ಷವಾಗಿ ಶೇ.26.85ರಷ್ಟು ಪಾಲು ಇದೆ ಎಂಬುದು ಗಮನಾರ್ಹ.
ಸ್ಯಾಟಲೈಟ್ ಇಂಟರ್ನೆಟ್ ಕ್ಷೇತ್ರದಲ್ಲಿ ಈಗಿನ ಸ್ಪರ್ಧೆ ಹೇಗಿದೆ?
ಭಾರತದ ಸ್ಯಾಟಲೈಟ್ ಇಂಟರ್ನೆಟ್ ಕ್ಷೇತ್ರದಲ್ಲಿ ಭವಿಷ್ಯದಲ್ಲಿ ಭಾರೀ ಬೇಡಿಕೆ ಸೃಷ್ಟಿಯಾಗುವ ನಿರೀಕ್ಷೆಯಿದ್ದು, ಹಲವು ಜಾಗತಿಕ ದಿಗ್ಗಜ ಕಂಪನಿಗಳು ಈ ಕ್ಷೇತ್ರಕ್ಕೆ ಪ್ರವೇಶಿಸಲು ಪೈಪೋಟಿ ನಡೆಸುತ್ತಿವೆ.
ಪ್ರಮುಖ ಕಂಪನಿಗಳು:
-
ಸ್ಟಾರ್‌ಲಿಂಕ್ – ಎಲಾನ್ ಮಸ್ಕ್
-
ಅಮೆಜಾನ್ ಕೈಪರ್/LEO – ಜೆಫ್ ಬೆಜೋಸ್
-
ರಿಲಯನ್ಸ್ ಜಿಯೋ – ಮುಖೇಶ್ ಅಂಬಾನಿ
-
ಯುಟೆಲ್ಸಾಟ್ ಒನ್‌ವೆಬ್ – ಭಾರ್ತಿ ಗ್ರೂಪ್
ಆದರೆ ಭದ್ರತಾ ಅನುಮತಿಗಳು, ಸ್ಪೆಕ್ಟ್ರಂ ಹಂಚಿಕೆ ಮತ್ತು ಬೆಲೆ ನಿಗದಿ ಸೇರಿದಂತೆ ಹಲವು ಕಾರಣಗಳಿಂದ ಈ ಕಂಪನಿಗಳಲ್ಲಿ ಯಾವುದೂ ಭಾರತದಲ್ಲಿ ಇನ್ನೂ ವಾಣಿಜ್ಯಿಕವಾಗಿ ಸ್ಯಾಟಲೈಟ್ ಇಂಟರ್ನೆಟ್ ಸೇವೆ ಆರಂಭಿಸಿಲ್ಲ.
ಭಾರತದ ಸ್ಪೇಸ್ ಎಕಾನಮಿ ಬೆಳವಣಿಗೆ
ಅಂದಾಜಿನ ಪ್ರಕಾರ, 2033ರ ವೇಳೆಗೆ ಭಾರತದ ಬಾಹ್ಯಾಕಾಶ ಆರ್ಥಿಕತೆ 44 ಬಿಲಿಯನ್ ಡಾಲರ್‌ಗೆ ತಲುಪುವ ಸಾಧ್ಯತೆಯಿದೆ. ಜಾಗತಿಕ ಬಾಹ್ಯಾಕಾಶ ಮಾರುಕಟ್ಟೆಯಲ್ಲಿ ಭಾರತದ ಪಾಲು ಈಗಿರುವ ಶೇ.2ರಿಂದ ಶೇ.8ಕ್ಕೆ ಏರಿಕೆಯಾಗುವ ನಿರೀಕ್ಷೆ ಇದೆ.
ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ಇಂಡಿಯನ್ ಸ್ಪೇಸ್ ಪಾಲಿಸಿ ಮೂಲಕ ಖಾಸಗಿ ಮತ್ತು ವಿದೇಶಿ ಕಂಪನಿಗಳಿಗೆ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಹೆಚ್ಚಿನ ಅವಕಾಶಗಳನ್ನು ಕಲ್ಪಿಸಲಾಗಿದೆ.
ಭಾರತದಲ್ಲಿ ಸ್ಯಾಟಲೈಟ್ ಕಮ್ಯುನಿಕೇಷನ್ ಸೇವೆ ಆರಂಭಿಸಲು ಕಂಪನಿಗಳು IN-SPACe (ಇಂಡಿಯನ್ ನ್ಯಾಷನಲ್ ಸ್ಪೇಸ್ ಪ್ರಮೋಷನ್ ಆ್ಯಂಡ್ ಆಥರೈಸೇಶನ್ ಸೆಂಟರ್)ನಿಂದ ಅನುಮತಿ ಪಡೆಯುವುದರ ಜೊತೆಗೆ, ದೂರಸಂಪರ್ಕ ಇಲಾಖೆಯಿಂದ ಸ್ಪೆಕ್ಟ್ರಂ ಪಡೆಯುವ ಪ್ರಕ್ರಿಯೆಯನ್ನೂ ಪೂರ್ಣಗೊಳಿಸಬೇಕು.
ಸಿಂಗ್‌ಟೆಲ್ ಅರ್ಜಿ ಪರಿಶೀಲನೆ
ಸಿಂಗಾಪುರದ ಸರ್ಕಾರಿ ಹೂಡಿಕೆ ಸಂಸ್ಥೆಯಾದ ಟೆಮಾಸೆಕ್ ಹೋಲ್ಡಿಂಗ್ಸ್ ಸಿಂಗ್‌ಟೆಲ್‌ನಲ್ಲಿ ಬಹುಪಾಲು ಷೇರುಗಳನ್ನು ಹೊಂದಿದೆ. ಇದೇ ಸಂಸ್ಥೆಯು ಭಾರತದ ಎರಡನೇ ಅತಿದೊಡ್ಡ ಟೆಲಿಕಾಂ ಆಪರೇಟರ್ ಭಾರ್ತಿ ಏರ್‌ಟೆಲ್‌ನಲ್ಲೂ ನೇರ ಮತ್ತು ಪರೋಕ್ಷವಾಗಿ ಶೇ.26.85ರಷ್ಟು ಪಾಲು ಹೊಂದಿದೆ.
ಸಿಂಗ್‌ಟೆಲ್ ಸಲ್ಲಿಸಿರುವ ಅರ್ಜಿಯನ್ನು ಕೇಂದ್ರ ಸರ್ಕಾರ ಪರಿಶೀಲಿಸುತ್ತಿದೆ ಎಂದು ಸರ್ಕಾರಿ ಅಧಿಕಾರಿಯೊಬ್ಬರು ದೃಢಪಡಿಸಿದ್ದಾರೆ. ಆದರೆ ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸಿಲ್ಲ.
ಇನ್ನೂ ಯಾರೂ ಸೇವೆ ಆರಂಭಿಸಿಲ್ಲ
ಭಾರತದಲ್ಲಿ ಸ್ಯಾಟ್‌ಕಾಮ್ ಸೇವೆ ಆರಂಭಿಸಲು ಮುಂದಾಗಿರುವ ಕಂಪನಿಗಳ ಪಟ್ಟಿಗೆ ಇದೀಗ ಸಿಂಗ್‌ಟೆಲ್ ಸೇರ್ಪಡೆಯಾಗಿದೆ. ಈ ಪಟ್ಟಿಯಲ್ಲಿ ಎಲಾನ್ ಮಸ್ಕ್ ಅವರ ಸ್ಟಾರ್‌ಲಿಂಕ್, ಜೆಫ್ ಬೆಜೋಸ್ ಅವರ ಅಮೆಜಾನ್ LEO, ರಿಲಯನ್ಸ್ ಜಿಯೋ ಮತ್ತು ಭಾರ್ತಿ ಗ್ರೂಪ್‌ನ ಯುಟೆಲ್ಸಾಟ್ ಒನ್‌ವೆಬ್ ಪ್ರಮುಖವಾಗಿವೆ.
ಈ ಕಂಪನಿಗಳು ಕಡಿಮೆ ಭೂ ಕಕ್ಷೆಯ (LEO) ಉಪಗ್ರಹಗಳ ಮೂಲಕ ಸೇವೆ ಒದಗಿಸಲು ಯೋಜನೆ ರೂಪಿಸಿವೆ.ಸ್ಟಾರ್‌ಲಿಂಕ್ ಬಳಿ ಮಾತ್ರವೇ ಸುಮಾರು 11,000 LEO ಉಪಗ್ರಹಗಳಿವೆ ಎಂದು ವರದಿಯಾಗಿದೆ. ಭದ್ರತಾ ಅನುಮತಿಗಳ ಕೊರತೆ, ಸ್ಪೆಕ್ಟ್ರಂ ಬೆಲೆ ನಿಗದಿಯಲ್ಲಿನ ಅನಿಶ್ಚಿತತೆ ಹಾಗೂ ಸಾಂಪ್ರದಾಯಿಕ ಟೆಲಿಕಾಂ ಆಪರೇಟರ್‌ಗಳೊಂದಿಗೆ ಇರುವ ನಿಯಂತ್ರಣಾತ್ಮಕ ವಿವಾದಗಳಿಂದಾಗಿ ಈ ಕಂಪನಿಗಳಲ್ಲಿ ಯಾವುದೂ ಭಾರತದಲ್ಲಿ ಇನ್ನೂ ವಾಣಿಜ್ಯ ಸೇವೆ ಆರಂಭಿಸಲು ಸಾಧ್ಯವಾಗಿಲ್ಲ.
ಇದರ ನಡುವೆ, ಗ್ರಾಹಕರ ಸಾಧನಗಳಿಗೆ ನೇರವಾಗಿ ಸೇವೆ ಒದಗಿಸುವ ಸಾಮರ್ಥ್ಯ ಹೊಂದಿರುವ ತನ್ನ Gen 2 LEO ಉಪಗ್ರಹ ಸಮೂಹಕ್ಕಾಗಿ ಸ್ಟಾರ್‌ಲಿಂಕ್ ಇತ್ತೀಚೆಗೆ ಕೇಂದ್ರ ಸರ್ಕಾರದಿಂದ ಅನುಮತಿ ಕೋರಿದೆ ಎಂದು ವರದಿಯಾಗಿದೆ.
