ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಯುವಕರು ಸೇರಿದಂತೆ ಯಾವುದೇ ವಯಸ್ಸಿನ ಭೇದವಿಲ್ಲದೆ ದಿಢೀರ್ ಹೃದಯಾಘಾತಕ್ಕೆ (Heart Attack) ಒಳಗಾಗುತ್ತಿರುವುದು ಇಡೀ ದೇಶವನ್ನೇ ಆತಂಕಕ್ಕೆ ತಳ್ಳಿದೆ. ಜಿಮ್ನಲ್ಲಿ ವರ್ಕೌಟ್ ಮಾಡುವಾಗ, ಡ್ಯಾನ್ಸ್ ಮಾಡುವಾಗ ಅಥವಾ ಕುಳಿತಲ್ಲೇ ಕುಸಿದು ಬಿದ್ದು ಪ್ರಾಣ ಕಳೆದುಕೊಳ್ಳುವ ಪ್ರಕರಣಗಳು ಹೆಚ್ಚುತ್ತಿವೆ. ಈ ಬೆನ್ನಲ್ಲೇ ದೇಶದ ಹೆಮ್ಮೆಯ ಹೃದ್ರೋಗ ತಜ್ಞ ಹಾಗೂ ನಾರಾಯಣ ಹೆಲ್ತ್ ಸಂಸ್ಥೆಯ ಸಂಸ್ಥಾಪಕ ಅಧ್ಯಕ್ಷರಾದ ಡಾ. ದೇವಿ ಪ್ರಸಾದ್ ಶೆಟ್ಟಿ ಅವರು ಭಾರತೀಯರ ಆಡಳಿತ ಮತ್ತು ಜೀವನಶೈಲಿಗೆ ಸಂಬಂಧಿಸಿದಂತೆ ಅತ್ಯಂತ ಆಘಾತಕಾರಿ ಸತ್ಯವೊಂದನ್ನು ಬಿಚ್ಚಿಟ್ಟಿದ್ದಾರೆ.
ಹೃದಯದ ರಕ್ತನಾಳಗಳಲ್ಲಿ ಬ್ಲಾಕೇಜ್ ಇದ್ದರೂ ಸಹ ಶೇ. 50 ರಷ್ಟು ಜನರಲ್ಲಿ ಯಾವುದೇ ರೀತಿಯ ಮುನ್ಸೂಚನೆ ಅಥವಾ ಲಕ್ಷಣಗಳು ಕಾಣಿಸಿಕೊಳ್ಳುವುದೇ ಇಲ್ಲ ಎಂದು ಅವರು ಎಚ್ಚರಿಸಿದ್ದಾರೆ.
ಶೇ. 50 ರಷ್ಟು ರೋಗಿಗಳಲ್ಲಿ ಮುನ್ಸೂಚನೆಯೇ ಇರಲ್ಲ
ಸಾಮಾನ್ಯವಾಗಿ ಹೃದಯಾಘಾತ ಸಂಭವಿಸುವ ಮುನ್ನ ಎದೆನೋವು, ಎಡಗೈ ನೋವು ಅಥವಾ ಅತಿಯಾದ ಬೆವರುವಿಕೆ ಕಾಣಿಸಿಕೊಳ್ಳುತ್ತದೆ ಎಂದು ನಾವೆಲ್ಲರೂ ಭಾವಿಸಿದ್ದೇವೆ. ಆದರೆ ಡಾ. ದೇವಿ ಶೆಟ್ಟಿ ಅವರ ಪ್ರಕಾರ, ಕೊರೊನರಿ ರಕ್ತನಾಳಗಳಲ್ಲಿ (Coronary Arteries) ತೀವ್ರ ಬ್ಲಾಕೇಜ್ ಹೊಂದಿರುವ ಶೇ. 50 ರಷ್ಟು ರೋಗಿಗಳಲ್ಲಿ ಯಾವುದೇ ಪೂರ್ವ ಲಕ್ಷಣಗಳು ಇರುವುದಿಲ್ಲ. ಅವರು ಯಾವುದೇ ಎದೆನೋವಿನ ಮುನ್ಸೂಚನೆ ಇಲ್ಲದೆಯೇ ನೇರವಾಗಿ ತೀವ್ರ ಹೃದಯಾಘಾತಕ್ಕೆ ಒಳಗಾಗುತ್ತಾರೆ.
ಮಧುಮೇಹಿಗಳಿಗೆ (Diabetics) ಹೈ-ರಿಸ್ಕ್ ಭಾರತಕ್ಕಿದೆ ದೊಡ್ಡ ಕಂಟಕ
ವಿಶೇಷವಾಗಿ ಸಕ್ಕರೆ ಕಾಯಿಲೆ ಅಥವಾ ಮಧುಮೇಹ ಹೊಂದಿರುವವರಲ್ಲಿ ಈ ಸಮಸ್ಯೆ ಅತಿ ಹೆಚ್ಚು ಎನ್ನಲಾಗಿದೆ. ಮಧುಮೇಹ ಇರುವ ರೋಗಿಗಳಲ್ಲಿ ನರಗಳ ದೌರ್ಬಲ್ಯದಿಂದಾಗಿ ಹೃದಯಕ್ಕೆ ರಕ್ತದ ಹರಿವು ಕಡಿಮೆಯಾದರೂ ಅಥವಾ ಬ್ಲಾಕೇಜ್ ಇದ್ದರೂ ಯಾವುದೇ ನೋವಿನ ಸಂವೇದನೆ ತಿಳಿಯುವುದಿಲ್ಲ. ಇದನ್ನು ವೈದ್ಯಕೀಯ ಲೋಕದಲ್ಲಿ ಸೈಲೆಂಟ್ ಹಾರ್ಟ್ ಅಟ್ಯಾಕ್ ಎನ್ನಲಾಗುತ್ತದೆ.
ಇದಕ್ಕೆ ಮತ್ತೊಂದು ಕಹಿ ಸತ್ಯವನ್ನು ಜೋಡಿಸಿದ ಡಾ. ದೇವಿ ಶೆಟ್ಟಿ, “ಭಾರತವು ಇಂದು ಇಡೀ ಜಗತ್ತಿನಲ್ಲೇ ಮಧುಮೇಹದ ರಾಜಧಾನಿ (Diabetic Capital of the World) ಆಗಿದೆ” ಎಂದಿದ್ದಾರೆ. ನಮ್ಮ ದೇಶದಲ್ಲಿ ಶುಗರ್ ಪೇಷೆಂಟ್ಗಳ ಸಂಖ್ಯೆ ಅತಿ ಹೆಚ್ಚಿರುವುದರಿಂದ, ಸದ್ದಿಲ್ಲದೆ ಬರುವ ಈ ಸೈಲೆಂಟ್ ಹಾರ್ಟ್ ಅಟ್ಯಾಕ್ ಅಪಾಯವು ಭಾರತೀಯರಲ್ಲಿ ದುಪ್ಪಟ್ಟಾಗಿದೆ ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.
ಹೃದಯಾಘಾತ ಈಗ ಹೆಚ್ಚಾಗಿದೆಯೇ? ಡಾ. ಶೆಟ್ಟಿ ವಿಶ್ಲೇಷಣೆ:
ಇತ್ತೀಚಿನ ದಿನಗಳಲ್ಲಿ ಹಾರ್ಟ್ ಅಟ್ಯಾಕ್ ಕೇಸ್ಗಳು ದಿಢೀರ್ ಹೆಚ್ಚಾಗಿವೆಯೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, “ಹೃದಯಾಘಾತಗಳು ಹಿಂದೆ ಕೂಡ ಸಂಭವಿಸುತ್ತಿದ್ದವು, ಈಗಲೂ ಸಂಭವಿಸುತ್ತಿವೆ. ಹಾರ್ಟ್ ಅಟ್ಯಾಕ್ ಸಂಖ್ಯೆ ಹಠಾತ್ ಆಗಿ ಹೆಚ್ಚಾಗಿಲ್ಲ. ಬದಲಿಗೆ, ಇಂದು ಜನರ ಬಳಿ ಇಂಟರ್ನೆಟ್, ಸ್ಮಾರ್ಟ್ಫೋನ್ ಹಾಗೂ ಸೋಷಿಯಲ್ ಮೀಡಿಯಾಗಳಿವೆ. ಮಾಧ್ಯಮಗಳ ಮೂಲಕ ಇದರ ಬಗ್ಗೆ ಚರ್ಚೆಗಳು ಮತ್ತು ಜಾಗೃತಿ ಹಿಂದೆಂದಿಗಿಂತಲೂ ಹೆಚ್ಚಾಗಿದೆ. ಯಾರಿಗಾದರೂ ಅಟ್ಯಾಕ್ ಆದ ತಕ್ಷಣ ಇಡೀ ದೇಶಕ್ಕೆ ತಿಳಿಯುತ್ತದೆ. ಹೀಗಾಗಿ ಪ್ರಕರಣಗಳು ಹೆಚ್ಚಾದಂತೆ ನಮಗೆ ಭಾಸವಾಗುತ್ತಿದೆ ಅಷ್ಟೇ” ಎಂದು ಸ್ಪಷ್ಟಪಡಿಸಿದ್ದಾರೆ.
ಸಾರ್ವಜನಿಕರು ವಹಿಸಬೇಕಾದ ಮುನ್ನೆಚ್ಚರಿಕೆಗಳು:
ನಿಯಮಿತ ತಪಾಸಣೆ: 35 ವರ್ಷ ದಾಟಿದ ಪ್ರತಿಯೊಬ್ಬರೂ, ವಿಶೇಷವಾಗಿ ಮಧುಮೇಹ ಹಾಗೂ ಬಿಪಿ ಇರುವವರು ವರ್ಷಕ್ಕೊಮ್ಮೆಯಾದರೂ ಲಿಪಿಡ್ ಪ್ರೊಫೈಲ್ ಮತ್ತು ಇಸಿಜಿ (ECG) ತಪಾಸಣೆ ಮಾಡಿಸಿಕೊಳ್ಳಬೇಕು.
ಲಕ್ಷಣ ರಹಿತ ಆಪತ್ತು: ನನಗೆ ಯಾವುದೇ ಎದೆನೋವು ಇಲ್ಲ, ನಾನು ಆರೋಗ್ಯವಾಗಿದ್ದೇನೆ ಎಂದು ನಿರ್ಲಕ್ಷ್ಯ ವಹಿಸಬಾರದು.
ಜೀವನಶೈಲಿ ಬದಲಾವಣೆ: ಧೂಮಪಾನ ತ್ಯಜಿಸುವುದು, ದೈಹಿಕ ಶ್ರಮದ ಕಡೆ ಗಮನ ಹರಿಸುವುದು ಹಾಗೂ ಸಕ್ಕರೆ ಅಂಶವಿರುವ ಆಹಾರ ಪದಾರ್ಥಗಳಿಂದ ದೂರವಿರುವುದು ಉತ್ತಮ.
