ನಿನ್ನೆ ( ಮೇ 4 ) ತಮಿಳುನಾಡು ರಾಜಕೀಯದಲ್ಲಿ ಮಹತ್ತರವಾದ ಬೆಳವಣಿಗೆಗಳಾಗಿದ್ದು, ವಿಜಯ್ ನೇತೃತ್ವದ ಟಿವಿಕೆ ವಿಧಾನಸಭಾ ಚುನಾವಣೆಯಲ್ಲಿ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ.
108 ಸೀಟುಗಳನ್ನು ಗೆದ್ದಿರುವ ಟಿವಿಕೆಗೆ ಅಧಿಕಾರದ ಚುಕ್ಕಾಣಿ ಹಿಡಿಯಲು ಇನ್ನೂ ಹತ್ತು ಸೀಟುಗಳ ಅಗತ್ಯವಿದ್ದು, ವಿಜಯ್ ಯಾವ ಪಕ್ಷದ ಜತೆ ಕೈಜೋಡಿಸಲಿದ್ದಾರೆ ಎಂಬ ಕುತೂಹಲ ಮನೆ ಮಾಡಿದೆ.
ಹೀಗೆ ಅನಿರೀಕ್ಷಿತ ಗೆಲುವು ಸಾಧಿಸಿದ ವಿಜಯ್ಗೆ ವಿವಿಧ ಕ್ಷೇತ್ರಗಳ ಗಣ್ಯರು ಸಾಮಾಜಿಕ ಜಾಲತಾಣದಲ್ಲಿ ಶುಭಾಶಯ ಕೋರುತ್ತಿದ್ದು, ಸಿನಿಮಾ ಕಲಾವಿದರೂ ಸಹ ಟ್ವೀಟ್ ಮಾಡಿ ಶುಭ ಹಾರೈಸಿದ್ದಾರೆ.
ಕನ್ನಡದ ಶಿವರಾಜ್ಕುಮಾರ್ ಸಹ ವಿಜಯ್ ಗೆಲುವಿನ ಕುರಿತು ಟ್ವೀಟ್ ಮಾಡಿದ್ದು, ‘ವಿಜಯ್ ಅವರೇ ಇದೊಂದು ಅತ್ಯಂತ ಅರ್ಹ ಗೆಲುವು. ಟೀಕಾಪ್ರಹಾರಗಳಾದಾಗ ಮಾತನಾಡದೇ ಇದ್ದು, ನಿಮ್ಮ ಕೆಲಸ ಮಾತನಾಡುವಂತೆ ಮಾಡುವುದು ದೊಡ್ಡ ಗೆಲುವು ಮಾಧ್ಯಮದವರೊಡನೆ ಮಾತನಾಡುವಾಗ ತಮಾಷೆಗಾಗಿ ಟಿವಿಕೆ ಎಂದರೆ Try Vijay as King ಎಂದು ಹೇಳಿದ್ದೆ. ಹಾಗೆಯೇ ನೀವು ಇಂದು ರಾಜನಂತೆ ಎತ್ತರದಲ್ಲಿ ನಿಂತಿದ್ದೀರಿ. ತಮಿಳುನಾಡು ಜನತೆಗೆ ನೀವು ಕೊಟ್ಟ ಆಶ್ವಾಸನೆಗಳನ್ನು ಉಳಿಸಿಕೊಳ್ಳಿ ಹಾಗೂ ಪ್ರಗತಿ ಕಾಣಲಿ ಎಂದು ಆಶಿಸುತ್ತೇನೆ’ ಎಂದು ಬರೆದುಕೊಂಡಿದ್ದಾರೆ.
