ಇಂದಿನ ಒಟಿಟಿ ಜಗತ್ತಿನಲ್ಲಿ ಕ್ರೈಮ್, ಆಕ್ಷನ್ ಮತ್ತು ಸಸ್ಪೆನ್ಸ್ ಸರಣಿಗಳದ್ದೇ ಅಬ್ಬರ. ಇದರ ನಡುವೆ ಪಂಚಾಯತ್, ಗುಲ್ಲಕ್ ಅಥವಾ ಫ್ಯಾಮಿಲಿ ಮ್ಯಾನ್ನಂತಹ ಕೆಲವು ಸರಣಿಗಳು ಜನರಿಗೆ ಇಷ್ಟವಾಗುತ್ತವೆ. ಆದರೆ ಇವೆಲ್ಲದಕ್ಕೂ ಸುಮಾರು ನಾಲ್ಕು ದಶಕಗಳ ಮೊದಲೇ ಭಾರತೀಯ ಕಿರುತೆರೆಯಲ್ಲಿ ಒಂದು ಮೌನ ಕ್ರಾಂತಿ ನಡೆದಿತ್ತು. ಯಾವುದೇ ಭರ್ಜರಿ ಆಕ್ಷನ್ ಅಥವಾ ಹಿಂಸೆ ಇಲ್ಲದಿದ್ದರೂ ಆ ಕಾಲದ ಮನೆಮತಾಗಿದ್ದ ಆ ಸರಣಿ ಬೇರೆ ಯಾವುದೂ ಅಲ್ಲ, ಅದುವೇ ‘ಮಾಲ್ಗುಡಿ ಡೇಸ್’ (Malgudi Days).
ಸರಳತೆಯೇ ಈ ಸರಣಿಯ ಶಕ್ತಿ 1986ರಲ್ಲಿ ಮೊದಲ ಬಾರಿಗೆ ಪ್ರಸಾರವಾದ ಮಾಲ್ಗುಡಿ ಡೇಸ್, ಹೆಸರಾಂತ ಲೇಖಕ ಆರ್.ಕೆ. ನಾರಾಯಣ್ ಅವರ ಕಥೆಗಳನ್ನು ಆಧರಿಸಿತ್ತು. ಈ ಸರಣಿಯ ವಿಶೇಷವೆಂದರೆ ಇದರ ಪ್ರತಿ ಎಪಿಸೋಡ್ ಕೂಡ ಒಂದು ಪುಟ್ಟ ಕಥೆಯನ್ನು ಹೇಳುತ್ತಿತ್ತು ಮತ್ತು ಪ್ರತಿಯೊಂದರಲ್ಲೂ ಜೀವನದ ಮಹತ್ವದ ಪಾಠವಿರುತ್ತಿತ್ತು. ಶಾಲಾ ದಿನಗಳು, ಬಾಲ್ಯದ ತುಂಟಾಟ, ಹಳ್ಳಿಯ ಜೀವನ ಮತ್ತು ಕೌಟುಂಬಿಕ ಮೌಲ್ಯಗಳನ್ನು ಅಷ್ಟೇ ಸುಂದರವಾಗಿ ಇಲ್ಲಿ ತೋರಿಸಲಾಗಿತ್ತು.
ಶಂಕರ್ ನಾಗ್ ಅವರ ಕಲ್ಪನಾ ಶಕ್ತಿ ಈ ಅದ್ಭುತ ಸರಣಿಯನ್ನು ನಿರ್ದೇಶಿಸಿದವರು ಕನ್ನಡದ ಹೆಮ್ಮೆಯ ನಟ, ನಿರ್ದೇಶಕ ‘ಕರಾಟೆ ಕಿಂಗ್’ ಶಂಕರ್ ನಾಗ್. ಅವರ ಅದ್ಭುತ ನಿರ್ದೇಶನ ಮತ್ತು ಕವಿತಾ ಲಂಕೇಶ್ ಅವರ ಸಹಕಾರದಿಂದ ಮೂಡಿಬಂದ ಈ ಸರಣಿ ಭಾರತೀಯ ಟೆಲಿವಿಷನ್ ಇತಿಹಾಸದಲ್ಲಿ ಮೈಲಿಗಲ್ಲಾಯಿತು. ಮಾಸ್ಟರ್ ಮಂಜುನಾಥ್ ಅಭಿನಯದ ‘ಸ್ವಾಮಿ’ ಪಾತ್ರವಂತೂ ಇಂದಿಗೂ ಪ್ರತಿಯೊಬ್ಬ ಭಾರತೀಯನ ನೆನಪಿನಲ್ಲಿ ಅಚ್ಚೊತ್ತಿದೆ.
ಐಎಂಡಿಬಿಯಲ್ಲಿ (IMDb) 9.4 ರೇಟಿಂಗ್! ಇಂದಿನ ಅತ್ಯಾಧುನಿಕ ತಂತ್ರಜ್ಞಾನವಿರುವ ವೆಬ್ ಸರಣಿಗಳಿಗೂ ಸೆಡ್ಡು ಹೊಡೆಯುವಂತೆ ಮಾಲ್ಗುಡಿ ಡೇಸ್ ಐಎಂಡಿಬಿಯಲ್ಲಿ 9.4 ರೇಟಿಂಗ್ ಹೊಂದಿದೆ. ಕೇವಲ 50 ಎಪಿಸೋಡ್ಗಳ ಮೂಲಕ ಸೃಷ್ಟಿಸಿದ ಈ ಪ್ರಭಾವ ಬೇರೆ ಯಾವುದೇ ಸರಣಿಯಿಂದ ಸಾಧ್ಯವಾಗಿಲ್ಲ. ಈ ಸರಣಿಯ ಚಿತ್ರೀಕರಣ ನಡೆದ ಶಿವಮೊಗ್ಗ ಜಿಲ್ಲೆಯ ಆಗುಂಬೆ ಸುತ್ತಮುತ್ತಲ ಪ್ರದೇಶಗಳು ಇಂದಿಗೂ ಪ್ರವಾಸಿಗರನ್ನು ಆಕರ್ಷಿಸುತ್ತವೆ. ಅಷ್ಟೇ ಅಲ್ಲದೆ, ಅರಸಾಳು ರೈಲ್ವೆ ನಿಲ್ದಾಣವನ್ನು ‘ಮಾಲ್ಗುಡಿ ರೈಲ್ವೆ ಸ್ಟೇಷನ್’ ಎಂದೇ ಕರೆಯಲಾಗುತ್ತದೆ.
ದಶಕಗಳು ಕಳೆದರೂ ಮಾಲ್ಗುಡಿ ಡೇಸ್ ತನ್ನ ಮೌಲ್ಯವನ್ನು ಕಳೆದುಕೊಂಡಿಲ್ಲ. ಇಂದಿಗೂ ಅಮೆಜಾನ್ ಪ್ರೈಮ್ ವಿಡಿಯೋದಲ್ಲಿ ಈ ಸರಣಿಯನ್ನು ವೀಕ್ಷಿಸಬಹುದಾಗಿದ್ದು, ಹಳೆಯ ನೆನಪುಗಳನ್ನು ಮೆಲುಕು ಹಾಕಲು ಇದು ಅತ್ಯುತ್ತಮ ಆಯ್ಕೆಯಾಗಿದೆ.
