ಬೆಂಗಳೂರು: ಬರ ಪರಿಸ್ಥಿತಿ ಬಗ್ಗೆ ರಾಜ್ಯ ಸರ್ಕಾರಕ್ಕೆ ಯಾವುದೇ ಗಂಭೀರತೆಯೇ ಇಲ್ಲ. ಹಾಗಾಗಿ ಕೇಂದ್ರದತ್ತ ಬೊಟ್ಟು ಮಾಡುತ್ತಿದೆ. ಮೊದಲು ಎಸ್ ಡಿ ಆರ್ ಎಫ್ ನಿಧಿ ಬಿಡುಗಡೆ ಮಾಡಲಿ ನೋಡೋಣ ಆ ಮೇಲೆ ಕೇಂದ್ರದಿಂದ ಅನುದಾನ ಬರಲಿದೆ ಎಂದು ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ ತಿಳಿಸಿದ್ದಾರೆ.
ಬೆಂಗಳೂರಿನಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ರಾಜ್ಯ ಸರ್ಕಾರ ಮೊದಲು ಎಸ್ ಡಿ ಆರ್ ಎಫ್ ಫಂಡ್ ಬಿಡುಗಡೆ ಮಾಡಿ ಬಳಿಕೆ ಎನ್ ಡಿ ಆರ್ ಎಫ್ ನಿಧಿಗೆ ಕೇಂದ್ರವನ್ನು ಕೇಳಲಿ ಎಂದರು.
ಹಿಂದೆ ಯಡಿಯೂರಪ್ಪ, ಬೊಮ್ಮಾಯಿ ಅವರ ಸರ್ಕಾರದಲ್ಲಿ ಎಸ್ ಡಿ ಆರ್ ಎಫ್ ಫಂಡ್ ನೀಡಿ ಆಮೇಲೆ ಕೇಂದ್ರವನ್ನು ಕೇಳುತ್ತಿದ್ದರು. ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಹಳೆಯ ದಾಖಲೆಗಳನ್ನೊಮ್ಮೆ ತೆರೆದು ನೋಡಲಿ ಎಂದರು.
ರೈತರಿಗೆ ನೆರವಾಗಲು ಎಸ್ ಡಿ ಆರ್ ಎಫ್ ಫಂಡೇ ಇಲ್ಲ ಇವರಲ್ಲಿ. ಅದನ್ನೂ ತಿಂದು ಖಾಲಿ ಮಾಡಿದ್ದಾರೆ. ತಮ್ಮಲ್ಲಿ ಹಣವಿಲ್ಲ ಎಂಬ ಸತ್ಯ ಮುಚ್ಚಿಕೊಳ್ಳಲು ಕೇಂದ್ರದತ್ತ ಬೆರಳು ತೋರುತ್ತಿದ್ದಾರೆ ಎಂದು ಆರೋಪಿಸಿದರು.
ರಾಜೀನಾಮೆಗೆ ಮುಂದಾದ ಶಾಸಕರ ಕ್ಷೇತ್ರ ಮಾತ್ರ ಬರ ಪಟ್ಟಿಗೆ ಸೇರಿಸ್ತಾರೆ. ಈ ಸರ್ಕಾರದಲ್ಲಿ ಶಾಸಕರು ರಾಜೀನಾಮೆಗೆ ಮುಂದಾದರೆ ಆ ತಾಲೂಕು ಬರಪೀಡಿತ ಪಟ್ಟಿಗೆ ಸೇರಿಸಲಾಗುತ್ತಿದೆ. ಇದು ಸರ್ಕಾರ ನಡೆಸುವ ರೀತಿಯೇ? ಎಂದು ಪ್ರಶ್ನಿಸಿದರು.
ರೈತರ ಸಾಲ ಮನ್ನಾ ವಿಚಾರದಲ್ಲಿ ಸಿಎಂ ಡಿ.ಕೆ.ಶಿವಕುಮಾರ್ ಕೇಂದ್ರದತ್ತ ಬೊಟ್ಟು ಮಾಡಿದ್ದಾರೆ. ಕೇಂದ್ರ ಸರ್ಕಾರ ಕರ್ನಾಟಕ ಜನರ ಹಿತಕ್ಕೆ ಏನು ಮಾಡಬೇಕೋ ಅದನ್ನು ಮಾಡುತ್ತದೆ. NDRF ತಂಡ ಬರ ಅಧ್ಯಯನ ಬಳಿಕ ನೆರವಿನ ಬಗ್ಗೆ ತೀರ್ಮಾನಿಸುತ್ತದೆ ಎಂದು ಹೇಳಿದರು.
ರಾಜ್ಯ ಕಾಂಗ್ರೆಸ್ ಸರ್ಕಾರ ದಿವಾಳಿ ಆಗಿರುವುದನ್ನು ಸ್ವತಃ ಆರ್ಥಿಕ ಇಲಾಖೆಯೇ ತೆರೆದಿಟ್ಟಿದೆ. ಯಾವುದೇ ಯೋಜನೆಗೂ ಹಣವಿಲ್ಲ ಎಂದು ಸ್ಪಷ್ಟವಾಗಿ ಹೇಳಿದೆ. ರಾಜ್ಯ ಸರ್ಕಾರ ಮೊದಲು ದಿವಾಳಿ ಅಂಚಿನಿಂದ ಹೊರ ಬರಲಿ ಎಂದು ಸಲಹೆ ನೀಡಿದರು.
ಕಾಂಗ್ರೆಸ್ ಸರ್ಕಾರದಲ್ಲಿ ಭ್ರಷ್ಟಾಚಾರ ತಾಂಡವಾಡುತ್ತಿದೆ. ಪ್ರಮುಖ ಹುದ್ದೆಗಳು ಹರಾಜಾಗುತ್ತಿವೆ. ರಾಹುಲ್ ಗಾಂಧಿಗೆ ATM ಆಗಿ ಕೆಲಸ ಮಾಡುತ್ತಿದೆ ಈ ಸರ್ಕಾರ. ಒಬ್ಬ ತಹಶೀಲ್ದಾರ್ ಕೇವಲ 2 ಎಕರೆ ಜಮೀನು ದಾಖಲೆ ಸರಿಪಡಿಸಲು 50 ಲಕ್ಷ ಲಂಚ ತೆಗೆದುಕೊಂಡಿದ್ದಾರೆ. ಇನ್ನು ಗುತ್ತಿಗೆದಾರರು ಬಿಲ್ ಪಾವತಿಗೆ ಮುಂಗಡ ಕೊಟ್ಟಿದ್ದಾರೆ ಅಂದರೆ ಭ್ರಷ್ಟಾಚಾರ ಅದೆಷ್ಟು ಬಲಿಷ್ಠವಾಗಿದೆ? ಎಂದು ಟೀಕಿಸಿದರು.
ಇನ್ನು ಕಸ್ತೂರಿ ರಂಗನ್ ವರದಿ ಕುರಿತು ಈಗ ಮೋದಿ ಸರ್ಕಾರದ ಮೇಲೆ ಗೂಬೆ ಕೂರಿಸಲು ನೋಡುತ್ತಿದ್ದಾರೆ. ಆದರೆ, ಇವರ ಸರ್ಕಾರ ಇದ್ದಾಗ ಏನು ಕತ್ತೆ ಕಾಯುತ್ತಿದ್ದರೆ? ಎಂದು ತರಾಟೆಗೆ ತೆಗೆದುಕೊಂಡ ಸಚಿವರು, ಕೇಂದ್ರ ಸರ್ಕಾರ ಯಾವತ್ತೂ ಕರ್ನಾಟಕದ ಜನರ ಹಿತಕ್ಕೆ ಬದ್ಧವಾಗಿದೆ. ಜನರ ಹಿತದೃಷ್ಟಿಯಿಂದ ಪರಿಸರ ಅಧ್ಯಯನ, ತಜ್ಞರ ಸಲಹೆ ಪಡೆದು ಸೂಕ್ತ ತೀರ್ಮಾನ ತೆಗೆದುಕೊಳ್ಳುತ್ತದೆ ಎಂದು ಸ್ಪಷ್ಟಪಡಿಸಿದರು.
