ಸಾರ್ವಜನಿಕ ವಲಯದ ಪ್ರಮುಖ ಬ್ಯಾಂಕ್ ಆಗಿರುವ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ನಿರುದ್ಯೋಗಿಗಳಿಗೆ ಸಿಹಿಸುದ್ದಿ ನೀಡಿದೆ. ಪ್ರಸಕ್ತ ಹಣಕಾಸು ವರ್ಷದಲ್ಲಿ ಬ್ಯಾಂಕಿಂಗ್ ಸೇವೆಗಳ ವಿಸ್ತರಣೆಯ ಭಾಗವಾಗಿ ಹೊಸದಾಗಿ 12,000 ಉದ್ಯೋಗಿಗಳನ್ನು ನೇಮಕ ಮಾಡಿಕೊಳ್ಳಲು ಮುಂದಾಗಿದೆ.
ಹೌದು.ಉದ್ಯೋಗಾಕಾಂಕ್ಷಿಗಳಿಗೆ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಭರ್ಜರಿ ಸಿಹಿಸುದ್ದಿ ನೀಡಿದೆ. ಪ್ರಸಕ್ತ ಹಣಕಾಸು ವರ್ಷದಲ್ಲಿ 12 ಸಾವಿರ ಹೊಸ ಹುದ್ದೆಗಳಿಗೆ ನೇಮಕಾತಿ ಮಾಡಿಕೊಳ್ಳಲು ಎಸ್ಬಿಐ ಸಿದ್ಧತೆ ನಡೆಸಿದೆ. ಇದರ ಜೊತೆಗೆ ದೇಶಾದ್ಯಂತ 200ರಿಂದ 250 ಹೊಸ ಶಾಖೆಗಳನ್ನು ತೆರೆಯುವ ಯೋಜನೆಯನ್ನೂ ಹೊಂದಿದೆ. ಕ್ಲೆರಿಕಲ್ ಹಾಗೂ ಅಧಿಕಾರಿ ಹುದ್ದೆಗಳಲ್ಲಿ ಈ ನೇಮಕಾತಿ ನಡೆಯಲಿದೆ.
ಬ್ಯಾಂಕಿಂಗ್ ಜಾಲವನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ದೇಶಾದ್ಯಂತ 200ರಿಂದ 250 ಹೊಸ ಶಾಖೆಗಳನ್ನು ತೆರೆಯಲು ಯೋಜನೆ ರೂಪಿಸಲಾಗಿದೆ ಎಂದು ಎಸ್ಬಿಐ ಅಧ್ಯಕ್ಷ ಚಲ್ಲಾ ಶ್ರೀನಿವಾಸುಲು ಶೆಟ್ಟಿ ತಿಳಿಸಿದ್ದಾರೆ.
ಮುಖ್ಯವಾಗಿ ಕ್ಲರ್ಕ್ ಮತ್ತು ಅಧಿಕಾರಿ ಹುದ್ದೆಗಳಲ್ಲಿ ಈ ನೇಮಕಾತಿಗಳು ನಡೆಯಲಿವೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಉದ್ಯೋಗಿಗಳ ನಿವೃತ್ತಿಯಿಂದ ಉಂಟಾಗಿರುವ ಖಾಲಿ ಹುದ್ದೆಗಳನ್ನು ಭರ್ತಿ ಮಾಡುವುದರ ಜೊತೆಗೆ, ಬ್ಯಾಂಕಿಂಗ್ ಸೇವೆಗಳ ಅಗತ್ಯಕ್ಕೆ ಅನುಗುಣವಾಗಿ ಹೊಸ ಉದ್ಯೋಗಾವಕಾಶಗಳನ್ನು ಸೃಷ್ಟಿಸಲಾಗುತ್ತಿದೆ ಎಂದು ತಿಳಿಸಿದ್ದಾರೆ.
ಈಗಾಗಲೇ ಎಸ್ಬಿಐ ದೇಶದಲ್ಲೇ ಅತಿದೊಡ್ಡ ಬ್ಯಾಂಕಿಂಗ್ ಜಾಲವನ್ನು ಹೊಂದಿದೆ. ಆದರೂ ಗ್ರಾಹಕರಿಗೆ ಇನ್ನಷ್ಟು ಉತ್ತಮ ಸೇವೆ ಒದಗಿಸುವ ಉದ್ದೇಶದಿಂದ 200ರಿಂದ 250 ಹೊಸ ಶಾಖೆಗಳನ್ನು ಆರಂಭಿಸಲು ಯೋಜಿಸಲಾಗಿದೆ ಎಂದು ಅವರು ಹೇಳಿದ್ದಾರೆ.
2026ರ ಮಾರ್ಚ್ ವೇಳೆಗೆ ಎಸ್ಬಿಐನಲ್ಲಿ ಒಟ್ಟು ಉದ್ಯೋಗಿಗಳ ಸಂಖ್ಯೆ 2.45 ಲಕ್ಷ ದಾಟಿದೆ ಎಂದು ಬ್ಯಾಂಕ್ ಮೂಲಗಳು ತಿಳಿಸಿವೆ. ಕಳೆದ ಹಣಕಾಸು ವರ್ಷದಲ್ಲಿ ಎಸ್ಬಿಐ ಒಟ್ಟು 25,633 ಮಂದಿಯನ್ನು ನೇಮಕ ಮಾಡಿಕೊಂಡಿತ್ತು. ಇದೀಗ ಮತ್ತೊಮ್ಮೆ ದೊಡ್ಡ ಪ್ರಮಾಣದಲ್ಲಿ ನೇಮಕಾತಿ ನಡೆಸಲು ಮುಂದಾಗಿರುವುದು ಗಮನಾರ್ಹವಾಗಿದೆ.
ಇನ್ನೊಂದೆಡೆ, ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (NSE) ಪ್ರಸ್ತಾಪಿಸಿರುವ ಸುಮಾರು ₹30,000 ಕೋಟಿ ಮೊತ್ತದ IPO ವಿಚಾರದಲ್ಲೂ ಎಸ್ಬಿಐ ಮತ್ತು ಅದರ ಅಂಗಸಂಸ್ಥೆ ಎಸ್ಬಿಐ ಕ್ಯಾಪಿಟಲ್ ಮಾರ್ಕೆಟ್ಸ್ ಪ್ರಮುಖ ಪಾತ್ರ ವಹಿಸುವ ಸಾಧ್ಯತೆ ಇದೆ.
ಒಟ್ಟಾರೆ, ನಿವೃತ್ತಿಯಿಂದ ಖಾಲಿಯಾಗುವ ಹುದ್ದೆಗಳನ್ನು ಭರ್ತಿ ಮಾಡುವುದರ ಜೊತೆಗೆ ಬ್ಯಾಂಕಿಂಗ್ ಸೇವೆಗಳ ವಿಸ್ತರಣೆಗೆ ಎಸ್ಬಿಐ ಒತ್ತು ನೀಡುತ್ತಿದೆ. 12 ಸಾವಿರ ನೇಮಕಾತಿ ಮತ್ತು 250 ಹೊಸ ಶಾಖೆಗಳ ಆರಂಭದಿಂದ ಉದ್ಯೋಗಾವಕಾಶಗಳು ಹೆಚ್ಚುವ ನಿರೀಕ್ಷೆಯಿದ್ದು, ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಉದ್ಯೋಗ ಹುಡುಕುತ್ತಿರುವವರಿಗೆ ಇದು ಮಹತ್ವದ ಅವಕಾಶವಾಗಲಿದೆ.
SBIಯಿಂದ NSE ಷೇರು ಪಾಲು ಕಡಿತಕ್ಕೆ ಯೋಜನೆ
ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (NSE)ನಲ್ಲಿ ಹೊಂದಿರುವ ಷೇರು ಪಾಲನ್ನು ಕಡಿಮೆ ಮಾಡುವ ಕುರಿತು ಮಾತನಾಡಿದ ಸೆಟ್ಟಿ, SBI ಮತ್ತು ಅದರ ಅಂಗಸಂಸ್ಥೆ SBI Capital Markets Ltd ಒಟ್ಟಾಗಿ NSEಯ ಪ್ರಸ್ತಾವಿತ ₹30,000 ಕೋಟಿ ಆರಂಭಿಕ ಸಾರ್ವಜನಿಕ ಕೊಡುಗೆ (IPO) ಮೂಲಕ ಶೇ.1ರಷ್ಟು ಪಾಲನ್ನು ಮಾರಾಟ ಮಾಡಲು ಯೋಜಿಸಿರುವುದಾಗಿ ತಿಳಿಸಿದ್ದಾರೆ.
“ನಾವು ಈ ಪಾಲು ಮಾರಾಟದಲ್ಲಿ ಭಾಗವಹಿಸುತ್ತಿದ್ದೇವೆ. SBI ತನ್ನ ಶೇ.0.65ರಷ್ಟು ಪಾಲನ್ನು ಹಾಗೂ SBI Capital Markets ಶೇ.0.35ರಷ್ಟು ಪಾಲನ್ನು ಮಾರಾಟ ಮಾಡಲು ಉದ್ದೇಶಿಸಿದೆ. ಎರಡೂ ಸಂಸ್ಥೆಗಳು ಪಾಲು ಹೊಂದಿರುವುದರಿಂದ, SBI ಸಮೂಹವಾಗಿ ಒಟ್ಟಾರೆ ಸುಮಾರು ಶೇ.1ರಷ್ಟು ಪಾಲನ್ನು ಮಾರಾಟ ಮಾಡಲಿದೆ. ಆದರೆ ಇತರ ಷೇರುದಾರರು ಕೂಡ ಪಾಲು ಮಾರಾಟಕ್ಕೆ ಮುಂದಾದರೆ ಈ ಪ್ರಮಾಣ ಕಡಿಮೆಯಾಗಬಹುದು,” ಎಂದು ಅವರು ಹೇಳಿದ್ದಾರೆ.
ಪ್ರಸ್ತುತ SBI, NSEಯಲ್ಲಿ ಶೇ.3.23ರಷ್ಟು ಪಾಲು ಹೊಂದಿದೆ. ಮತ್ತೊಂದೆಡೆ, SBI Capital Markets ದೇಶದ ಅತಿದೊಡ್ಡ ಷೇರು ವಿನಿಮಯ ಕೇಂದ್ರವಾಗಿರುವ NSEಯಲ್ಲಿ ಶೇ.4.33ರಷ್ಟು ಪಾಲು ಹೊಂದಿದೆ.
NSE IPO ದೇಶದ ಅತಿದೊಡ್ಡ IPO ಆಗುವ ಸಾಧ್ಯತೆ
ಬಹುಕಾಲದಿಂದ ನಿರೀಕ್ಷಿಸಲಾಗುತ್ತಿದ್ದ ₹30,000 ಕೋಟಿ ಮೌಲ್ಯದ NSE IPOಗೆ ಕಳೆದ ವಾರ ನಿಯಂತ್ರಣ ಸಂಸ್ಥೆಯಿಂದ ಅನುಮೋದನೆ ದೊರೆತಿದೆ. ಈ IPO ದೇಶದ ಇತಿಹಾಸದಲ್ಲೇ ಅತಿದೊಡ್ಡ IPO ಆಗುವ ಸಾಧ್ಯತೆ ಇದೆ.
NSE IPO, 2024ರಲ್ಲಿ ನಡೆದ ಹ್ಯುಂಡೈ ಮೋಟಾರ್ ಇಂಡಿಯಾದ ₹27,858.75 ಕೋಟಿ IPO ಹಾಗೂ 2022ರಲ್ಲಿ ನಡೆದ LICಯ ₹20,557.23 ಕೋಟಿ IPOಯನ್ನು ಮೀರಿಸಲಿದೆ. ಇದಲ್ಲದೆ, 2021ರ Paytm (One97 Communications) ₹18,300 ಕೋಟಿ, 2025ರ Tata Capital ₹15,511.87 ಕೋಟಿ ಮತ್ತು 2010ರ Coal India ₹15,200 ಕೋಟಿ IPOಗಳಿಗಿಂತಲೂ NSE IPO ದೊಡ್ಡದಾಗಲಿದೆ.
ಸದ್ಯಕ್ಕೆ ಇತರೆ ಅಂಗಸಂಸ್ಥೆಗಳ ಪಾಲು ಮಾರಾಟವಿಲ್ಲ
ಇತರೆ ಅಂಗಸಂಸ್ಥೆಗಳ ಷೇರು ಪಾಲನ್ನು ಸದ್ಯದಲ್ಲೇ ಮಾರಾಟ ಮಾಡುವ ಯಾವುದೇ ಯೋಜನೆ ಇಲ್ಲ ಎಂದು ಸೆಟ್ಟಿ ಸ್ಪಷ್ಟಪಡಿಸಿದ್ದಾರೆ.
ಜುಲೈನಲ್ಲಿ SBI ತನ್ನ ವಿದೇಶಿ ಪಾಲುದಾರ, ಪ್ಯಾರಿಸ್ ಮೂಲದ Amundi ಜೊತೆಗೂಡಿ SBI Mutual Fundನ ಸುಮಾರು ಶೇ.10ರಷ್ಟು ಪಾಲನ್ನು ಕಡಿಮೆ ಮಾಡಿತ್ತು. ಇದರಲ್ಲಿ ಪ್ರೀ-IPO ಪಾಲು ಕೂಡ ಸೇರಿತ್ತು.
ದೇಶದ ಅತಿದೊಡ್ಡ ಮ್ಯೂಚುವಲ್ ಫಂಡ್ ಸಂಸ್ಥೆಯ ₹11,675 ಕೋಟಿ ಮೌಲ್ಯದ ಈ ಪಾಲು ಮಾರಾಟ ಭರ್ಜರಿ ಯಶಸ್ಸು ಕಂಡಿದ್ದು, IPO 41.66 ಪಟ್ಟು ಚಂದಾದಾರಿಕೆಯನ್ನು ಪಡೆದಿತ್ತು.
ಲಿಸ್ಟಿಂಗ್ ಬಳಿಕ SBIಯ ಪಾಲು ಶೇ.61.86ರಿಂದ ಶೇ.55.56ಕ್ಕೆ ಇಳಿಕೆಯಾಗಿದೆ. ಇದೇ ವೇಳೆ Amundiಯ ಪಾಲು 3.7 ಶೇಕಡಾ ಅಂಶಗಳಷ್ಟು ಕಡಿಮೆಯಾಗಿ ಶೇ.32.63ಕ್ಕೆ ಇಳಿದಿದೆ.
