ಅಮೆರಿಕದ ಪ್ರಮುಖ ರಾಜಕಾರಣಿ ಹಾಗೂ ಪ್ರಸ್ತುತ ಆರೋಗ್ಯ ಸಚಿವರಾಗಿರುವ ರಾಬರ್ಟ್ ಎಫ್. ಕೆನಡಿ ಜೂನಿಯರ್ (RFK Jr) ಅವರು ಕಡಲತೀರದ ನಿವಾಸವೊಂದರಲ್ಲಿ ಯಾವುದೇ ಭಯವಿಲ್ಲದೆ ಬರಿಗೈಯಲ್ಲೇ ಎರಡು ಹಾವುಗಳನ್ನು ಹಿಡಿದಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ. ಈ ವಿಡಿಯೋ ನೆಟ್ಟಿಗರಲ್ಲಿ ಏಕಕಾಲಕ್ಕೆ ಆಶ್ಚರ್ಯ ಮತ್ತು ಆತಂಕವನ್ನು ಉಂಟುಮಾಡಿದೆ.
ಸ್ವತಃ ಕೆನಡಿ ಅವರೇ ತಮ್ಮ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಹಂಚಿಕೊಂಡಿರುವ ಈ ವಿಡಿಯೋದಲ್ಲಿ, ಅವರು ಬ್ಲ್ಯಾಕ್ ರೇಸರ್ (Black Racer) ಜಾತಿಗೆ ಸೇರಿದ ಎರಡು ಕಪ್ಪು ಹಾವುಗಳನ್ನು ಅತ್ಯಂತ ಸುಲಭವಾಗಿ ಕೈಯಲ್ಲಿ ಎತ್ತಿಕೊಳ್ಳುವುದನ್ನು ಕಾಣಬಹುದು. ಅವರು ಹಾವುಗಳನ್ನು ಕೈಯಲ್ಲಿ ಹಿಡಿದು ಅಲ್ಲಿದ್ದವರಿಗೆ ತೋರಿಸುತ್ತಿದ್ದಾಗ, ಆ ಹಾವುಗಳು ಅವರ ಕೈಯಿಂದ ತಪ್ಪಿಸಿಕೊಳ್ಳಲು ತೀವ್ರವಾಗಿ ಒದ್ದಾಡುತ್ತಾ ಕಚ್ಚಲು ಮುನ್ನುಗ್ಗುತ್ತಿದ್ದವು. ಈ ವೇಳೆ ಅಲ್ಲಿದ್ದ ಅವರ ಸ್ನೇಹಿತರು ಮತ್ತು ಕುಟುಂಬದವರು ತೀವ್ರ ಆತಂಕಕ್ಕೆ ಒಳಗಾಗಿದ್ದರು. ಕೆನಡಿ ಅವರ ಪತ್ನಿ ಹಾಗೂ ಖ್ಯಾತ ನಟಿ ಚೆರಿಲ್ ಹೈನ್ಸ್ ಅವರು, “ಅವು ಅಪಾಯಕಾರಿ, ದಯವಿಟ್ಟು ಅವುಗಳನ್ನು ಬಿಟ್ಟುಬಿಡು” ಎಂದು ಪದೇ ಪದೇ ಕೂಗುತ್ತಾ ಎಚ್ಚರಿಕೆ ನೀಡುತ್ತಿರುವುದು ವಿಡಿಯೋದಲ್ಲಿ ಕೇಳಿಬಂದಿದೆ.
ಸುತ್ತಲಿದ್ದವರೆಲ್ಲಾ ಭಯದಿಂದ ಕಿರುಚಾಡುತ್ತಿದ್ದರೂ ಕೆನಡಿ ಮಾತ್ರ ಮುಗುಳ್ನಗುತ್ತಾ ಅತ್ಯಂತ ಶಾಂತರಾಗಿ ಹಾವುಗಳನ್ನು ಹಿಡಿದುಕೊಂಡಿದ್ದರು. ಒಂದು ಹಂತದಲ್ಲಿ ಹಾವೊಂದು ಅವರ ಕೈಗೆ ಕಚ್ಚಿದಂತೆ ಕಂಡುಬಂದರೂ, ಅವರು ಅದಕ್ಕೆ ಯಾವುದೇ ಪ್ರತಿಕ್ರಿಯೆ ನೀಡದೆ ಸಾಮಾನ್ಯವಾಗಿಯೇ ಇದ್ದರು. ವನ್ಯಜೀವಿ ತಜ್ಞರ ಪ್ರಕಾರ, ಅಮೆರಿಕದ ಕರಾವಳಿ ಮತ್ತು ಅರಣ್ಯ ಪ್ರದೇಶಗಳಲ್ಲಿ ಹೆಚ್ಚಾಗಿ ಕಂಡುಬರುವ ಈ ಬ್ಲ್ಯಾಕ್ ರೇಸರ್ ಹಾವುಗಳು ವಿಷಪೂರಿತವಲ್ಲ. ಆದರೆ ಇವು ಅತ್ಯಂತ ವೇಗವಾಗಿ ಚಲಿಸುವ ಮತ್ತು ತಮಗೆ ಅಪಾಯ ಎದುರಾದಾಗ ತಕ್ಷಣವೇ ಕಚ್ಚುವ ಸ್ವಭಾವ ಹೊಂದಿವೆ. ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಈ ವಿಡಿಯೋ ಧೂಳೆಬ್ಬಿಸಿದ್ದು, ಕೆಲವರು ಕೆನಡಿ ಅವರ ಧೈರ್ಯವನ್ನು ಶ್ಲಾಘಿಸಿದರೆ, ಇನ್ನು ಕೆಲವರು ಕಾಡು ಪ್ರಾಣಿಗಳನ್ನು ಈ ರೀತಿ ಹಿಂಸಿಸುವುದು ಸರಿಯಲ್ಲ ಎಂದು ಟೀಕಿಸಿದ್ದಾರೆ.
