ಮುಲ್ಲಾನ್ ಪುರ: ಐಪಿಎಲ್ ನಲ್ಲಿ 18 ವರ್ಷಗಳ ಕಪ್ ಗೆಲುವಿನ ಆಸೆ ಈಡೇರಿಸಲು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಕ್ಕೆ ಇನ್ನೊಂದು ಮೆಟ್ಟಿಲು ಬಾಕಿ ಇದೆ. ಗುರುವಾರ ಚಂಡೀಗಢದ ಮುಲ್ಲಾನ್ ಪುರದಲ್ಲಿ ನಡೆದ ಪಂಜಾಬ್ ಕಿಂಗ್ಸ್ ವಿರುದ್ಧದ ಮೊದಲ ಕ್ವಾಲಿಫೈಯರ್ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಎಂಟು ವಿಕೆಟ್ ಗಳ ಭರ್ಜರಿ ಗೆಲುವು ಸಾಧಿಸಿದೆ.
ಆರ್‌ಸಿಬಿ ತಂಡ 2016ರ ನಂತರ ಮತ್ತೆ ಫೈನಲ್ ಪ್ರವೇಶಿಸಿದೆ. ತಂಡಕ್ಕೆ ಇದು ನಾಲ್ಕನೆಯ ಫೈನಲ್ ಆಗಿದೆ. ಆರ್.ಸಿ.ಬಿ. 2009, 2011 ಮತ್ತು 2016ರಲ್ಲಿ ಫೈನಲ್ ಪ್ರವೇಶಿಸಿತ್ತು. ಆದರೆ ಮೂರು ಬಾರಿಯೂ ಟ್ರೋಫಿ ಗೆಲ್ಲಲು ಸಾಧ್ಯವಾಗಿರಲಿಲ್ಲ.
ಪ್ಲೇ ಆಫ್ ನಿಯಮ ಜಾರಿಗೆ ಬಂದ 2011ರ ನಂತರ 14 ಆವೃತ್ತಿಗಳ ಪೈಕಿ 11ರಲ್ಲಿ ಕ್ವಾಲಿಫೈಯರ್ ಒಂದರಲ್ಲಿ ಗೆದ್ದ ತಂಡಕ್ಕೆ ಟ್ರೋಫಿ ಲಭಿಸಿದೆ. ಇದನ್ನು ಆರ್‌ಸಿಬಿ ಈ ಬಾರಿಯೂ ಮುಂದುವರೆಸುವ ಸಾಧ್ಯತೆ ಇದೆ.
ಆರ್‌ಸಿಬಿಗೆ ನಾಕೌಟ್ ಪಂದ್ಯದಲ್ಲಿ ಇದು ಅತಿ ದೊಡ್ಡ ಜಯವಾಗಿದೆ. 60 ಎಸೆತಗಳು ಬಾಕಿ ಉಳಿಸಿಕೊಂಡು ಆರ್‌ಸಿಬಿ ಜಯಭೇರಿ ಬಾರಿಸಿದೆ. ಮೊದಲು ಬ್ಯಾಟಿಂಗ್ ಮಾಡಿದ ಪಂಜಾಬ್ ಕಿಂಗ್ಸ್ 14.1 ಓವರ್ ಗಳಲ್ಲಿ 101 ರನ್ ಗೆ ಎಲ್ಲಾ ವಿಕೆಟ್ ಕಳೆದುಕೊಂಡಿತು. ಆರ್‌ಸಿಬಿ 10 ಓವರ್‌ಗಳಲ್ಲಿ ಎರಡು ವಿಕೆಟ್ ನಷ್ಟಕ್ಕೆ 106 ಗಳಿಸಿತು.
