ರೈಲಿನಲ್ಲಿ ಪ್ರಯಾಣಿಸುವ ಪ್ರಯಾಣಿಕರಿಗೆ ರೈಲ್ವೇ ಇಲಾಖೆ ಮಹತ್ವದ ಎಚ್ಚರಿಕೆ ನೀಡಿದೆ. 2026ರ ಅಕ್ಟೋಬರ್ 1ರಿಂದ 31ರವರೆಗೆ ವಿಶೇಷ ಟಿಕೆಟ್ ತಪಾಸಣೆ ಅಭಿಯಾನ ನಡೆಯಲಿದ್ದು, ಟಿಕೆಟ್ನೊಂದಿಗೆ ಅಗತ್ಯ ID ದಾಖಲೆಗಳನ್ನೂ ಪರಿಶೀಲಿಸಲಾಗುತ್ತದೆ.
ಒಂದೇ PNRನಲ್ಲಿ ಹಲವು ಪ್ರಯಾಣಿಕರು ಬುಕ್ ಆಗಿದ್ದರೆ, ನಿಗದಿತ ID ದಾಖಲೆ ನೀಡಲು ಸಾಧ್ಯವಾಗದ ಸಂದರ್ಭಗಳಲ್ಲಿ ಆ ಟಿಕೆಟ್ನಲ್ಲಿರುವ ಎಲ್ಲ ಪ್ರಯಾಣಿಕರ ಮೇಲೂ ನಿಯಮಾನುಸಾರ ದಂಡ ಅಥವಾ ಕ್ರಮ ಕೈಗೊಳ್ಳುವ ಸಾಧ್ಯತೆ ಇದೆ.
ಹೌದು. ಟಿಕೆಟ್ ಇಲ್ಲದೆ ಅಥವಾ ಮಾನ್ಯ ದಾಖಲೆಗಳಿಲ್ಲದೆ ರೈಲು ಪ್ರಯಾಣ ಮಾಡುವವರಿಗೆ ಮಧ್ಯ ರೈಲ್ವೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲು ಮುಂದಾಗಿದೆ. 2026ರ ಅಕ್ಟೋಬರ್ 1ರಿಂದ 31ರವರೆಗೆ ಮಧ್ಯ ರೈಲ್ವೆ ವಿಶೇಷ ಟಿಕೆಟ್ ತಪಾಸಣೆ ಅಭಿಯಾನ ನಡೆಸಲಿದೆ. ಈ ಅಭಿಯಾನದ ವೇಳೆ ಪ್ರಯಾಣಿಕರ ಟಿಕೆಟ್ನ ಮಾನ್ಯತೆ, ನೈಜತೆ ಮತ್ತು ಪ್ರಾಮಾಣಿಕತೆಯನ್ನು ವಿಶೇಷವಾಗಿ ಪರಿಶೀಲಿಸಲಾಗುತ್ತದೆ. ರಿಯಾಯಿತಿ ದರದಲ್ಲಿ ಬುಕ್ ಮಾಡಲಾದ ಟಿಕೆಟ್ಗಳು, ನಿಗದಿತ ಮೀಸಲಾತಿ ಕೋಟಾ ಹಾಗೂ ವಿವಿಧ ರೀತಿಯ ಪಾಸ್ಗಳ ಅಡಿಯಲ್ಲಿ ಪ್ರಯಾಣಿಸುವವರ ಮೇಲೆ ವಿಶೇಷ ಗಮನ ಹರಿಸಲಾಗುತ್ತದೆ.
ರೈಲು ನಿಲ್ದಾಣಗಳಲ್ಲಿ ಮಾತ್ರವಲ್ಲದೆ, ರೈಲುಗಳಲ್ಲಿ ಪ್ರಯಾಣದ ವೇಳೆಯೂ ಟಿಕೆಟ್ ತಪಾಸಣೆ ನಡೆಯಲಿದೆ. ರಿಯಾಯಿತಿ ಅಥವಾ ನಿಗದಿತ ಮೀಸಲಾತಿ ಕೋಟಾದಡಿ ಪ್ರಯಾಣಿಸುವವರು ತಮ್ಮ ಅರ್ಹತೆಯನ್ನು ಸಾಬೀತುಪಡಿಸುವ ಮಾನ್ಯ ID ದಾಖಲೆ ಹೊಂದಿದ್ದಾರೆಯೇ ಎಂಬುದನ್ನು ಟಿಕೆಟ್ ತಪಾಸಣೆ ಸಿಬ್ಬಂದಿ ಪರಿಶೀಲಿಸಲಿದ್ದಾರೆ.
ಪ್ರಯಾಣಿಕರಿಗೆ ಏನು ಕಡ್ಡಾಯ?
ಒಂದು ಟಿಕೆಟ್ನಲ್ಲಿ ಒಂದಕ್ಕಿಂತ ಹೆಚ್ಚು ಪ್ರಯಾಣಿಕರು ಬುಕ್ ಆಗಿದ್ದರೆ, ಆ ಟಿಕೆಟ್ನಲ್ಲಿ ಪ್ರಯಾಣಿಸುವ ಕನಿಷ್ಠ ಒಬ್ಬ ಪ್ರಯಾಣಿಕರ ಬಳಿ ನಿಗದಿತ ID ದಾಖಲೆ ಇರುವುದು ಕಡ್ಡಾಯ ಎಂದು ರೈಲ್ವೆ ತಿಳಿಸಿದೆ.
ಅಗತ್ಯವಿರುವ ID ದಾಖಲೆ ನೀಡಲು ಸಾಧ್ಯವಾಗದಿದ್ದರೆ, ಅನ್ವಯಿಸುವ ನಿಯಮಗಳ ಪ್ರಕಾರ ಆ ಟಿಕೆಟ್ನಲ್ಲಿ ಪ್ರಯಾಣಿಸುವ ಎಲ್ಲ ಪ್ರಯಾಣಿಕರನ್ನು ಮಾನ್ಯ ಟಿಕೆಟ್ ಇಲ್ಲದೆ ಪ್ರಯಾಣಿಸುತ್ತಿರುವವರು ಎಂದು ಪರಿಗಣಿಸಿ, ನಿಯಮಾನುಸಾರ ಕ್ರಮ ಅಥವಾ ದಂಡ ವಿಧಿಸಬಹುದು.
ಅದೇ ರೀತಿ, ರಿಯಾಯಿತಿ ಅಥವಾ ನಿಗದಿತ ಮೀಸಲಾತಿ ಕೋಟಾದಡಿ ಪ್ರಯಾಣಿಸುವವರು ತಮ್ಮ ಅರ್ಹತೆಯನ್ನು ಸಾಬೀತುಪಡಿಸುವ ಅಗತ್ಯ ದಾಖಲೆಗಳನ್ನು ಹೊಂದಿರಬೇಕು.
E-Pass/PTO ಹೊಂದಿರುವವರಿಗೆ ಸೂಚನೆ
E-Pass/PTO ಆಧಾರದಲ್ಲಿ ಪ್ರಯಾಣಿಸುವ ಪ್ರಯಾಣಿಕರು ನಿಗದಿತ ಮೂಲ ID ದಾಖಲೆಗಳನ್ನು ತಮ್ಮೊಂದಿಗೆ ಕಡ್ಡಾಯವಾಗಿ ಇಟ್ಟುಕೊಳ್ಳಬೇಕು. ರೈಲು ಪ್ರಯಾಣ ಆರಂಭಿಸುವ ಮೊದಲು E-Pass/PTO ಅನ್ನು ನಿಯಮಾನುಸಾರ Authority to Travel (ಅಥಾರಿಟಿ ಟು ಟ್ರಾವೆಲ್) ಆಗಿ ಪರಿವರ್ತನೆ/ಎಕ್ಸ್ಚೇಂಜ್ ಮಾಡಲಾಗಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು.
E-Pass ಎಂದರೆ ರೈಲ್ವೆ ನೌಕರರು ಮತ್ತು ಅವರ ಕುಟುಂಬ ಸದಸ್ಯರಿಗೆ ರೈಲಿನಲ್ಲಿ ಉಚಿತ ಪ್ರಯಾಣಕ್ಕಾಗಿ ನೀಡಲಾಗುವ ಡಿಜಿಟಲ್ ಸೌಲಭ್ಯ. PTO (Privilege Ticket Order) ಎಂದರೆ ರೈಲ್ವೆ ನೌಕರರು ಸಾಮಾನ್ಯ ಪ್ರಯಾಣ ದರಕ್ಕಿಂತ ರಿಯಾಯಿತಿ ದರದಲ್ಲಿ ಟಿಕೆಟ್ ಪಡೆಯಲು ಬಳಸುವ ಸೌಲಭ್ಯ.
ಈ ಕ್ರಮ ಏಕೆ?
ಟಿಕೆಟ್ಗಳ ನೈಜತೆ ಮತ್ತು ಪ್ರಾಮಾಣಿಕತೆಯನ್ನು ಪರಿಶೀಲಿಸುವುದರ ಜೊತೆಗೆ, ವಿಶೇಷವಾಗಿ ಅನಾರಕ್ಷಿತ ಟಿಕೆಟ್ಗಳ ಪರಿಶೀಲನೆಗೂ ಹೆಚ್ಚಿನ ಒತ್ತು ನೀಡಲಾಗುತ್ತದೆ.ಅಗತ್ಯವಿದ್ದಲ್ಲಿ ಟಿಕೆಟ್ ತಪಾಸಣೆ ಸಿಬ್ಬಂದಿ ಟಿಕೆಟ್ನ ನೈಜತೆ ಮತ್ತು ಪರಿಶೀಲನೆಗಾಗಿ TTE ಆ್ಯಪ್ ಬಳಸಬಹುದು.
ಈ ವಿಶೇಷ ಅಭಿಯಾನದ ಪ್ರಮುಖ ಉದ್ದೇಶಗಳು:
-
ಮೀಸಲಾತಿ ಸೌಲಭ್ಯಗಳ ದುರುಪಯೋಗ ತಡೆಯುವುದು
-
ರಿಯಾಯಿತಿಗಳ ಅಕ್ರಮ ಅಥವಾ ದುರುಪಯೋಗವನ್ನು ನಿಯಂತ್ರಿಸುವುದು
-
ಪಾಸ್ಗಳ ನಕಲಿ/ಅನಧಿಕೃತ ಬಳಕೆಗೆ ಕಡಿವಾಣ ಹಾಕುವುದು
-
ರೈಲ್ವೆಗೆ ಉಂಟಾಗುವ ಆದಾಯ ನಷ್ಟವನ್ನು ತಡೆಯುವುದು
-
ಟಿಕೆಟ್ಗಳ ನೈಜತೆ ಮತ್ತು ಪ್ರಾಮಾಣಿಕತೆಯನ್ನು ಖಚಿತಪಡಿಸುವುದು
ಹೀಗಾಗಿ ಅಕ್ಟೋಬರ್ 1ರಿಂದ 31ರವರೆಗೆ ರೈಲಿನಲ್ಲಿ ಪ್ರಯಾಣಿಸುವವರು ತಮ್ಮ ಟಿಕೆಟ್ ಹಾಗೂ ಅಗತ್ಯವಿರುವ ಮೂಲ ID ದಾಖಲೆಗಳನ್ನು ಕಡ್ಡಾಯವಾಗಿ ತಮ್ಮೊಂದಿಗೆ ಇಟ್ಟುಕೊಳ್ಳುವುದು ಮುಖ್ಯವಾಗಿದೆ.
